ფუტსალის თასისთვის კსუ და დინამო, ერთმანეთს ფინალში შეერკინენ. ბოლო ორ სეზონში, კსუ-მ დინამოს ექვსივე შეხვედრა მოუგო და ამ წყვილში კავკასიელთა გუნდი ფავორიტად იყო მიჩნეული. თუმცა, ფინალი ერთი მატჩისგან შედგება და ერთ შეხვედრაში კი ნებისმიერ გუნდს ძალუძს სიურპრიზის ავტორობა. მით უმეტეს, შარშან ფინალში, დინამოელები ნიუ ვიჟენ ჯორჯიანსთან დამარცხდნენ და თავიდანვე ცხადი იყო, რომ ამ ტიტულის მოსაპოვებლად ყველაფერს გაიღებდნენ.

მატჩი მართლაც ფინალის საკადრისი გამოდგა - ლაღი, სანახაობრივი, დინამიური, უხვგოლიანი. პირველად კსუ-დან გიორგი ჩიმაკაძემ გაისროლა, მაგრამ დინამოს კარი ძელმა იხსნა. მეტოქეს დინამოელებიც არ ჩამორჩნენ, თეიმურაზ ექიზაშვილის პირველ დარტყმას სტუდენტთა მეკარე ალი ასლანი გადაეფარა. ექიზაშვილის მეორე გასროლა კი შედეგიანი აღმოჩნდა და მეორე წუთზე დინამო დაწინაურდა, 0:1. სტუდენტები გაცხარდნენ და მეტოქეზე ზეწოლა გააძლიერეს, გოლიც მოამწიფეს და შედეგიც არაერთი მიიღეს. მე-8 წუთზე ნოდარ მ. ქურცაძემ მეტოქეს ბურთი მოპარა, ლუკა ფარცვანიას გადააწოდა და მანაც ანგარიში გაათანაბრა, 1:1. წუთში საბა ტყეშელაშვილმა შორიდან ძლიერად დარატყა და სტუდენტები დაწინაურდნენ, 2:1. ორმხრივი შეტევები გაგრძელდა, მაგრამ უგოლოდ. ტაიმის ბოლო 2 წუთი გამორჩეული აღმოჩნდა. მე-18 წუთზე ჯანიკო გიორგაიამ ეფექტურ გოლით კსუ-ს ფორა გააორმაგა, 3:1. დინამომ მეკარიანად შეუტია და დაისაჯა კიდეც. მე-19 წუთზე სტუდენტების მეკარე ალი ასლანმა ბურთი მოიპოვა და დინამოს კარის ბადეში მიუჩინა ადგილი, 4:1. შესვენებამდე 20 წამით ადრე გიორგი ჩიმაკაძემ შედეგიანად გასროლა და პრაქტიკულად გადაწყვიტა გამარჯვებულის ვინაობა, 5:1.

დინამოელებმა მეორე ტაიმი უფრო აქტიურად დაიწყეს და 23-ე წუთზე ომარ ასაშვილმა ერთი ბურთი გაქვითა, 5:2. დრო საკმაო იყო და მატჩის გადასარჩენად დინამო ვა-ბანკზე წავიდა. მათ მეკარიანად შეუტიეს, მაგრამ მხოლოდ ერთის გატანა შეძლეს. 36-ე წუთზე დავით ხუბუტიამ საბოლოო ანგარიში დააფიქსირა, 5:3.

ფუტსალის ლიგის ფავორიტები, არმია, ნიუ ვიჟენ ჯორჯიანსი და პსპ, კავკასიელებმა ფინალამდე დაჯაბნეს. ამ რთული გზის შემდეგ, კსუ-მ ფინალში დინამოს სძლია და სეზონის პირველ ტიტულს სრულიად დამსახურებულად დაეუფლა.