ფუტსალის უმთავრესი ლიგის რეგულარული ჩემპიონატი მართლაც რომ გრანდიოზულად, გოლების ფოიერვერკით დაიხურა. დასკვნითი ტურის თითო მატჩში, მინიმუმ 10 გოლი გავიდა. შედეგად, მთელ რეგულარულს ჩემპიონატში,  სარეკორდოდ უხვგოლიანი (48 გატანილი გოლით) ბოლო ტური აღმოჩნდა. ზედა ანუ ფლეი ოფისა და ქვედა, ფლეი აუტის ოთხეულები მეოცე ტურში გაირკვა და ამ მხრივ არაფერი შეცვლილა.

დასკვნითი ტური იმითაც იყო გამორჩეული, რომ პსპ-ს ერთი პოკერი, 4 ჰეთ თრიკი და 3 დუბლი დაფიქსირდა. ერთი ჰეთ თრიკის ავტორი, კავკასიელთა ჯანი, ჯანიკო გიორგაია, 21 გატანილი ბურთით, ჩემპიონატის ბომბარდირი გახდა. მეგოლეთა შორის, არმიელი გიორგი ქურდაძე 20 გოლით მეორეზეა. მესამეზე სამი ფორვარდია -  ლევან სვანიძემ და ნიკოლოზ კურტანიძემ (ორივე პსპ), ასევე ნიკოლოზ გაბრიჩიძემ (ნიუ ვიჟენ ჯორჯიანსი) 18-18 ბურთი გაიტანეს... ასეთი იყო დასკვნითი ტური, რომელსაც მოკლედ აქვე მიმოვიხილავთ.

ნიუ ვიჟენ ჯორჯიანსმა ზედიზედ მე-5 მატჩი მოიგო და ჩემპიონატი მე-2 ადგილზე დამსახურებულად დაასრულა. ავთანდილ ასათიანის ბიჭებმა UG-ს მესამედაც სძლიეს, მაგრამ ამჯერად ასტრონომიული ანგარიშით. ჯორჯიანსელებმა სტუდენტებს 12:1 მოუგეს და თითო ტაიმში 6-6 ბურთი გაუტანეს. ნუკრი ჭუმბურიძემ და ნიკოლოზ გაბრიჩიძემ ჰეთ თრიკი შეასრულეს, ირაკლი თოდუამ დუბლი მიითვალა. შოთა თოფურიამ, ვახტანგ ჯვარაშვილმა, ნიკა ბიძინაშვილმა და ვახტანგ კეკელიამ თითო ბურთი გაიტანეს. მატჩის მიწურულს, სტუდენტებიდან პრესტიჟის გოლი ვანო კუტალაძემ მიითვალა. ნიუ ვიჟენი 48 ქულით მეორეზე, ხოლო UG 13 ქულით მე-6-ზე დარჩა.

კსუ-მ FLC03-ს მესამედაც სძლია, მაგრამ მესამედ საკმაოდ გაუჭირდა. შევარდნებმა კინაღამ ფრე გაახერხეს. არა და, სტუდენტებმა შევარდნებს წინა 2 შეხვედრა მშრალად მოუგეს და თანაც 16 ბურთი გაუტანეს. პირველ ტაიმში კავკასიელებმა მეტოქე 6 გოლით დაასაჩუქრეს. ჯანიკო გიორგაიამ ჰეთ თრიკი გაიფორმა, თითო ბურთი კი ნიკა მანგოშვილმა, ნოდარ მ. ქურცაძემ და საბა მაჩიტიძემ გაიტანეს. შევარდნებმა სტუდენტებს შესვენებამდე 2, მეორე ტაიმში კი 3 გოლით უპასუხეს. FLC03-დან გოგი ლობჯანიძემ და გიორგი ტაბახმელაშვილმა 2-2 ბურთი გაიტანეს, ერთი გოლი კი საბა აბრამიშვილმა. კავკასიელებმა 6:5 მოიგეს და ცხრილის ლიდერობით 55 ქულა დააგროვეს, შევარდნები კი 6 ქულით და ბოლო საფეხურზე დარჩნენ.

არმიამ დინამოს მესამედაც მოუგო. ამჯერად დიდი სხვაობით, 8:2. არმიელთაგან ვანო ბექაურმა ჰეთ თრიკი მიითვალა, გიორგი ქურდაძემ დუბლი შეასრულა, თითო ბურთი გიორგი ზუნტუროვმა, ოთარ ბერეჩიკიძემ და ლაშა ფოფხაძემ გაიტანეს. დინამოელთაგან ლაშა კაკაჩიამ დუბლი გაიფორმა. არმია 43 ქულით მესამეზე დარჩა, დინამო კი 31 ქულით მეხუთეზეა.

პსპ-მაც იგოლავა. ფარმაცევტებმა სეუ-ს კვლავ დიდი სხვაობით 11:3 სძლიეს. პსპ-ში ახალი მეგოლე, მირიან მირგატია პოკერით წარმოჩნდა. მერაბ აჭარაძემ, ნიკოლოზ კურტანიძემ, ნიკა ჩალაძემ, ალექსანდრე ორაგველიძემ, მელტონ ახალაიამ, გიორგი ხაბალაევმა და გიორგი გაზდელიანმა თითო ბურთი იკმარეს. სეუ-დან ნიკა სიდამონიძემ, გიორგი წიქვაძემ და ბექა მურღულმა თითო ბურთი გაიტანეს. პსპ 38 ქულით მეოთხეა, სეუ კი 14 ქულით მეექვსე საფეხურზეა.

ამით რეგულარული ჩემპიონატი დასრულდა და მალე სეზონის დასკვნითი ნაწილი აიღებს სტარტს. 13 მაისს ფლეი ოფის პირველ ნახევარფინალში კსუ პსპ-ს შეეჭიდება, ნიუ ვიჟენი კი არმიას. ფინალში გასასვლელად გუნდებს ორი მოგება სჭირდებათ. ფლეი აუტიც 13 მაისს დაიწყება. დინამო, სეუ, UG და FLC03-ი უკვე მოპოვებული ქულებით, 3 წრეს ითამაშებენ. ამ კვარტეტიდან ბოლოადგილოსანი გუნდი ქვედა ლიგაში დაქვეითდება, ბოლოსწინა ადგილზე გასული გუნდი კი ქვედა ლიგის მეორეადგილოსანთან ფლეი აუტში იასპარეზებს.