სეზონის დასკვნითი ნაწილი დაძაბულად და საინტერესოდ დაიწყო. მოქმედმა და ძველმა ჩემპიონმა, შესაბამისად კსუ-მ და ნიუ ვიჟენ ჯორჯიანსმა, მიზანი სანახევროდ შეასრულეს და ფინალს მიუახლოვდნენ. ორივე შეხვედრა დრამატული გამოდგა, პენალტების სერიამდე საქმე არ მისულა, მაგრამ 5 პენალტი კი ვიხილეთ... ქვედა ოთხეულში დინამომ მე-5 ადგილი გაინაღდა, შევარდნები კი ფუტსალის მთავარი ლიგიდან დაქვეითდნენ. სეუ და UG ლიგაში დარჩენისთვის ბრძოლას აგრძელებენ. სეუ-ს ქულებში უპირატესობა აქვს და ფლეი აუტის ასაცილებლად 2 ქულა სჭირდება... ეს იყო მოკლე რეზიუმე, დეტალური მიმოხილვისთვის თანმიმდევრობას მივყვეთ.

ფლეი ოფი მოქმედი ჩემპიონისა და პსპ-ს დაპირისპირებით დაიწყო. თამამად შეიძლება ითქვას, რომ მეტოქეებმა საოცრად გამორჩეული თამაში აჩვენეს. სტარტზე კსუ-მ იძალა და მე-3 წუთზე გიორგი ჩიმაკაძემ ანგარიში გახსნა, 1:0. ფარმაცევტები გაცხარდნენ, თამაში კიდევ უფრო გამწვავდა, რაც სტუდენტების გაფრთხილებების სიმრავლეში აისახა. მე-12 წუთისთვის კსუ-მ ჯარიმების ლიმიტი ამოწურა. წუთში პსპ-მ პენალტი მოიპოვა და მერაბ აჭარაძემ წონასწორობა აღადგინა, 1:1. იმავე აჭარაძეს შანსი ჰქონდა მე-19 წუთზე დანიშნული პენალტიც გაეტანა, მაგრამ კსუ-ს მეკარე ალი ასლანმა ბურთი კუთხურზე მოიგერია. მეორე ტაიმიც ორმხრივი შეტევებით და უფრო დაძაბულად წარიმართა. სტუდენტებმა იმარჯვეს და 30-ე წუთზე ზურაბ ლუკავამ კსუ წინ გაიყვანა, 2:1. ოთხ წუთში ჩიმაკაძემ მეორე ბურთი გაიტანა და სხვაობა გააორმაგა, 3:1. კსუ ამას არ დასჯერდა და 38-ე წუთზე ნიკა ხარატიშვილმა მატჩს წერტილი დაუსვა. კავკასიელებმა 4:1 მოიგეს და ფინალს მიუახლოვდნენ.

რეგულარულ ჩემპიონატში ნიუ ვიჟენ ჯორჯიანსმა ორჯერ მოუგო არმიას და არმიელებს ამჯერადაც შედეგიანად შეუტია. ჯორჯიანსელები სწრაფი გოლებით დაწინაურდნენ, თანაც გვარიანი ფორით. პირველივე წუთზე ნუკრი ჭუმბურიძემ ანგარიში გახსნა. 3 წუთში ნიკა ბიძინაშვილმა გაიტანა, წუთნახევარში კი ვახტანგ ჯვარაშვილმა სხვაობა გაზარდა, 3:0. ამან არმიელები გაახელა,  მაგრამ შესვენებამდე ანგარიში არ შეცვლილა. მეორე ტაიმშიც ორმხრივი შეტევები ვიხილეთ. თუმცა, მატჩის ბოლო 5 წუთი განსაკუთრებით დრამატული და გოლებიანი აღმოჩნდა. 34-ე წუთზე ნიუ ვიჟენმა ჯარიმების ლიმიტი ამოწურა და წუთში პსპ-მ პენალტი დაიმსახურა, რომელიც გიორგი ზუნტუროვმა გოლად აქცია, 3:1. აქედან ნახევარი წუთიც არ იყო გასული და გიორგი ზუნტუროვმა კიდევ ერთი პენალტი გაიტანა, 3:2. იმავე ზუნტუროვმა 36-ე წუთზე მესამე ათმეტრიანიც გაიტანა და ანგარიში გაათანაბრა, 3:3. დარჩენილ ოთხ წუთში ორივე გუნდს შეეძლო გოლის გატანა, მაგრამ... ბოლო წამზე ვახტანგ ჯვარაშვილის დარტყმული ბურთი, არმიას მეკარე ბექა გოგსაძემ მოიგერია, დამატებაზე ვახტანგ კეკელიამ იმარჯვა და ნიუ ვიჟენმა 4:3 მოიგო.

ფლეი აუტი დინამო თბილისისა და FLC03-ის მატჩით დაიწყო. შევარდნები მეორე წუთზე ლაშა კაკაჩიას ავტოგოლით დაწინაურდნენ (0:1), მაგრამ დინამოელებმა 8 წუთში არა თუ ანგარიში გაათანაბრეს, არამედ ფორაც შეიქმნეს. მე-5 წუთზე ლუკა ელიზბარაშვილმა წონასწორობა აღადგინა, კიდევ 4 წუთში ბექა ონიანმა დინამო წინ გაიყვანა. გავიდა წუთი და ელიზბარაშვილმა მეორედაც დალაშქრა მეტოქის კარი, 3:1. შევარდნები გაცხარდნენ და მე-17 წუთზე ილარიონ ფუფიამ სხვაობა მინიმუმამდე შეამცირა, 3:2. დინამოელებმა მეორე ტაიმიც აქტიურად დაიწყეს და 28-ე წუთზე კახა მაღლაკელიძემ ორბურთიანი უპირატესობა აღადგინა, 4:2. კიდევ წუთში კი ალექსანდე ცირეკიძემ სხვაობა კიდევ გაზარდა, 5:2. FLC03-იმ ბოლომდე იბრძოლა, მაგრამ მხოლოდ გიორგი ტაბახმელაშვილის ერთ გოლს გამორჩა. დინამომ 5:3 მოიგო, FLC03 ლიგიდან გავარდა.

სეუ-ს მიზანი მე-6 ადგილის შენარჩუნებაა, რომელშიც ქულით ნაკლების მქონე UG ეცილება. ასეთი დაძაბულობის ფონზე, სტუდენტურ დერბის დრამატულობა არ აკლდა. მეტოქეებმა ორი განსხვავებული ტაიმი აჩვენეს. პირველი ნახევრის დამთავრებამდე 5 წუთით ადრე, ორივე გუნდმა ამოწურა გაფრთხილებების ლიმიტი, მაგრამ პენალტამდე საქმე არ მისულა. გარდამავალი უპირატესოით მიმდინარე ტაიმის დასრულებამდე წუთნახევრით ადრე, სანდრო ობოლაძემ იმარჯვა და სეუ დააწინაურა, 1:0. მეორე ნახევარშიც უკომპრომისო ბრძოლა გაგრძელდა და ისევ სეუ-მ იძალა. 30-ე წუთზე ლუკა ჯოლოხავამ ფორა გააორმაგა, 2:0. ორი წუთში კი ობოლაძემ ორი ბურთის გატანა შეძლო, ჰეთ თრიკი მიითვალა და სხვაობა სოლიდური გახადა, 4:0. UG-მ მეტოქეს არ დანებდა და ბოლომდე იბრძოლა. 34-ე წუთში დავით თაბაგარმა, კიდევ წუთში ვაჟა კვარაცხელიამ თითო ბურთი გაქვითეს, 4:2. ლაშა კურტანიძემ 37-ე წუთზე სხვაობა მინიმუმამდე შეამცირა, 4:3. UG-ს თამაშის გადასარჩენად დარჩენილი არასრული 4 წუთი ჰქონდა, მაგრამ ანგარიში აღარ შეცვლილა. სეუ 17 ქულით მე-7 ადგილზეა, მდევარ UG-ს უკვე 4 ქულით უსწრებს.