შარშან და 2022 წელს სწორედ იმ გუნდებმა ითამაშეს საჩემპიონო ფინალი, რომლებიც ამჯერადაც ოქროს მედლებისთვის შეერკინებიან ერთმანეთს. ამ დუელში გასულ ზაფხულს კსუ-მ იმარჯვა, 4 წლის წინ ნიუ ვიჟენ ჯორჯიანსმა. საჩემპიონო ფინალური სერია, რომელიც 3 გამარჯვებამდეა, 25 მაისს აიღებს სტარტს. მანამდე კი ზედა და ქედა ოთხეულებში, ბოლოს ჩატარებული მატჩები მიმოვიხილოთ.

არმიასთან გამარჯვების (4:3) შემდეგ, ნიუ ვიჟენს ერთი მოგება აკლდა საჩემპიონო ფინალში გასასვლელად. ამ გუნდების მეორე დერბი უფრო ხისტი აღმოჩნდა. არმიელებმა 5 ყვითელი და 2 წითელი ბარათი მიიღეს, ჯორჯიანსელებმა კი 2 ყვითელი ბარათი. გიორგი ზუნტუროვის 2-წუთიანი გაძევებით, ნიუ ვიჟენმა ისარგებლა და მე-8 წუთზე ვახტანგ კეკელიამ ანგარიში გახსნა, 0:1. იმავე კეკელიამ 5 წუთში კიდევ ორი გაიტანა და ჰეთ თრიკის გაფორმებით, ჯორჯიანსელებს საკმაო ფორა შეუქმნა, 0:3. თუმცა, არმიელებმა შესვენებამდე ერთი ბურთი გაქვითეს და ეს ოთარ ბერეჩიკიძემ შეძლო, 1:3. მეორე ტაიმი არმიამ უკეთ დაიწყო და ეს შედეგშიც აისახა. 24-ე წუთზე გიორგი ქურდაძემ სხვაობა მინიმუმამდე შეამცირა. 29-ე წუთზე კი შაკო ცირამუამ ანგარიში გაათანაბრა, 3:3. ამან ნიუ ვიჟენი გაახელა, მათ მეტოქეზე ზეწონა გააძლიერეს და ორბურთიანი ფორაც შეიქმნეს. 36-ე წუთზე ირაკლი თოდუამ, კიდევ 2 წუთში ვახტანგ ჯვარაშვილმა თითოჯერ დალაშქრეს მეტოქის კარი. 3:5. არმიელებმა მხოლოდ ერთი ბურთის გაქვითვა შეძლეს, ქურდაძემ მეორედაც გაიტანა. ნიუ ვიჟენმა 4:5 იმარჯვა და ფინალში გავიდა.

პსპ-სთან, ფლეი ოფის პირველი მატჩის მოგებით (4:1), კავკასიელებმა ფინალისკენ დიდი ნაბიჯი გადადგეს და სანახევრომდე მიყვანილი საქმე წარმატებით გააგრძელეს. სტუდენტებმა თავიდანვე გამოაჩინეს ბრჭყალები და სწრაფი გოლით დაწინაურდნენ. კსუ-ს მოთამაშეების მიერ კარში მეორე დარტყმა შედეგიანი აღმოჩნდა. საგოლე კომბინაცია მეკარე ალი ასლანმა დაიწყო, რომელმაც ფლანგზე გიორგი ჩიმაკაძე მოძებნა. ჩიმაკაძემ მეკარის ბაქანზე გამჭოლი პასი გააკეთა, სადაც საბა ტყეშელაშვილმა ყველას დაასწრო და ანგარიში გახსნა, 0:1. რა თქმა უნდა, პსპ გათანაბრებას შეეცადა და თამაში ორმხრივი შეტევებით წარიმართა მაგრამ ანგარიშის შეცვლა მხოლოდ ტაიმის ბოლო წუთზე მოხერხდა. ფარმაცევტების შეტევისას ნიკა გვაზავამ ნიკოლოზ კურტანიძეს უპასა. მანაც უხერხული სიტუაციიდან, ტერფით ეფექტური გოლი გაიტანა და წონასწორობას აღადგინა, 1:1.  მეორე ტაიმიც გარდამავალი უპირატესობით წარიმართა, დაძაბულ ბრძოლაში სტუდენტებმა იძალეს და 37-ე წუთზე ჯანიკო გიორგაიამ მეტოქის იერიში ჩაჭრა, ჩიმაკაძესთან კედელი გაითამაშა და გამაჯვების გოლი გაიტანა, 1:2. დარჩენლ, არასრულ 3 წუთში პსპ-მ ბოლომდე იბრძოლა, მაგრამ მეორედ გათანაბრება ვეღარ შეძლო. კავკასიელებმა მიჯრით მეორე მატჩიც მოიგეს და საჩემპიონო ფინალში გავიდნენ.

ფლეი აუტში კი ბოლოსწინა ტურის მატჩები გაიმართა. უკვე გარკვეულია, რომ შევარდნებს ფუტსალის მთავარი ლიგის დატოვება მოუწიათ, დინამო კი მე-5 ადგილზე, წინა ტურშივე მიუწვდომელი შეიქმნა. მიუხედავად ამისა, კახა მაღლაკელიძისა და ლუკა ელიზბარაშვილის თითო სწრაფი გოლით, დინამოელები ფორით დაწინაურდნენ, 2:0. ტაიმის ბოლო წუთები მეტად დრამატული აღმოჩნდა. ჯერ იყო და ელიზბარაშვილმა კიდევ ერთი ბურთი გაიტანა (3:0). თუმცა, დინამოელებმა ჯარიმების ლიმიტი ამოწურეს. სეუ-მ ბოლომდე იბრძოლა და ნიკა სიდამონიძემ ორი გოლით, სხვაობა მინიმუმამდე შეამცირა, 3:2. შესვენებამდე, სიდამონიძეს მესამეს გატანაც შეეძლო, მაგრამ პენალტი ვერ გამოიყენა. მოგვიანებით, მანვე კიდევ ერთი პენალტი ვერ გამოიყენა, მაგრამ 23-ე წუთზე წონასწორობა მაინც აღადგინა, 3:3. დინამომ შეტევები გაამწვავა და 32-ე წუთზე ლაშა კაკაჩიას გოლით დაწინაურდა, 4:3. თუმცა, მატჩის ბოლო წუთზე სიდამონიძემ მეოთხე ბურთიც გაიტანა (4:4) და თავის გუნდს ოქროს ქულა მოუტანა. სეუ-ს 18 ქულა აქვს და მდევარ UG-ს უკვე 2 ქულით უსწრებს.

შევარდნებისა და UG-ს დაპირისპირება ხისტად და დრამატულად წარიმართა, განსაკუთრებით მეორე ტაიმი. მეტოქეებმა თითო წითელი ბარათი მიიღეს, 4 და 3 ყვითელი, შესაბამისად FLC03-მა და UG-მ. სტუდენტებმა პირველი ტაიმი მინიმალურად, 0:1 მოიგეს. მეორე ნახევარში თორნიკე ზოიძემ ანგარიში გაათანაბრა. თუმცა, წუთში ვაჟა კვარაცხელიამ უნივერსიტეტელები წინ გაიყვანა, 1:2. ნახევარ წუთში გიორგი ტაბახმელაშვილმა წონასწორობა აღადგინა, 2:2. თამაშის ბოლო 4 წუთში ლაშა კურტანიძემ, ვაჟა კვარაცხელიამ და დავით თაბაგარმა თითო ბურთი გაიტანეს, 2:5. მართალია, UG 2 ქულით ჩამორჩება სეუ-ს, მაგრამ ვინ ასცდება ფლეი აუტს და ვინ ვერა, ეს დასკვნით ყურში გაირკვევა.