ქვედა ოთხეული სრულად დაკომპლექტდა. დინამოს გარდა, ლიგაში სეუ დარჩა. ფუტსალის მთავარ ლიგაში ადგილის შესანარჩუნებლად, UG ფლეი აუტში იბრძოლებს. ასეთია ქვედა კვარტეტის დასკვნითი ტურის მოკლე რეზიუმე, ახლა კი უფრო ვრცლად მიმოვიხილოთ.

ლიგიდან შევარდნების გავარდნა წინა მატჩებში გადაწყდა, მაგრამ მათ კარის გაჯახუნება ჩაიფიქრეს. რეგულარულ ჩემპიონატში ჩატარებული სამი მატჩიდან, FLC03-მ მხოლოდ პირველ შეხვედრაში სძლია სეუ-ს. დანარჩენ ორში კი დამარცხდა. ამჯერად კი, მე-6 წუთზე ანგარიში გიორგი ტაბახმელაშვილმა გახსნა და შევარდნები დაწინაურდნენ, მაგრამ ტაიმის ბოლოს სტუდენტებმა არა თუ ანგარიში გაათანაბრეს, არამედ 2:1 მოიგეს. მეორე ნახევარში სეუ-მ მეტოქე დაბომბა და უნივერსიტეტელებმა 8:3 მოიგეს. სტუდენტებიდან გიორგი წიქვაძემ ჰეთ თრიკი შეასრულა, ანდრია ძიძიგურმა და სანდრო ობოლაძემ დუბლები გაიფორმეს, შალვა გუგუნავა კი ერთ გოლს დასჯერდა. FLC03-დან ტაბახმელაშვილის გარდა, თორნიკე ზოიძემ და საბა აბრამიშვილმა თითო ბურთი გაიტანეს. ამ მოგებით და 21 ქულით სეუ მე-6 ადგილზე გამაგრდა. 6-ქულიანი შევარდნები კი მომავალ სეზონში ქვედა ლიგაში იასპარეზებენ.

დინამოსთან დაპირისპირებაში UG სწრაფი გოლით დაწინაურდა, მე-3 წუთზე დავით თაბაგარმა გახსნა ანგარიში (1:0) და გუნდები შესვენებაზე ამ შედეგით გავიდნენ. მეორე ტაიმის სტარტზე კახა მაღლაკელიძემ წონასწორობა აღადგინა, 1:1. თუმცა, გიორგი ქავთარაძემ სტუდენტები ისევ წინ გაიყვანა, ვაჟა კვარაცხელიამ კი ფორა გააორმაგა, 3:1. მატჩის ბოლო 3 წუთში დინამომ იძალა მაღლაკელიძემ კიდევ 2 ბურთი გაიტანა და ჰეთ თრიკი გაიფორმა. ერთიც ლუკა ელიზბარაშვილმა გაიტანა და დინამომ 3:4 იმარჯვა. 16-ქულიანი UG, ფუტსალის მთავარ ლიგაში დასარჩენად ფლეი აუტში, ქვედა ლიგის მეორეადგილოსანთან იბრძოლებს.