ისევე როგორც შარშან და 2022 წელს, ფუტსალის საჩემპიონო ფინალურ სერიაში, ამჯერადაც კსუ და ნიუ ვიჟენ ჯორჯიანსი წარსდგნენ ერთმანეთის წინაშე. მათ შორის პირველი დუელი ჯორჯიანსელებმა მოიგეს და პირველად გახდნენ ჩემპიონები. გასულ წელს კი ოქროს მედლები კავკასიელებმა მოიპოვეს. აღსანიშნავია ის, რომ 2021 წლიდან მოყოლებული, ფუტსალის უმთავრესი ლიგის ოქროს მედლები, ამ ორი გუნდიდან ერთ-ერთს რჩებოდა. ნიუ ვიჟენი 3-ჯერ გახდა ჩემპიონი, კსუ-მ კი 2-ჯერ მოიპოვა ოქროს მედლები. ასეთია ამ გუნდების მდიდარი წარსული, ახლა კი მათ პირველ შერკინებაზე ვთქვათ...

საჩემპიონო ფინალური სერიის პირველი შეხვედრა სწრაფ ტემპში, დაძაბულად და საინტერესოდ წარიმართა. ორმხრივ შეტევებში ნიუ ვიჟენმა იძალა - მე-7 წუთზე ირაკლი თოდუამ მეტოქეს ბურთი მოპარა და ანგარიში გახსნა, 0:1. სტუდენტებს უმალ შეეძლოთ ეპასუხათ, მაგრამ ნიკა ხარატიშვილმა ბურთი კარს გადააცილა. მეტოქეებმა იერიშები გააგრძელეს და 9 წუთში სტუდენტების ჯერი დადგა. შეტევა მეკარე ალი ასლანმა წამოიწყო, ფლანგზე გიორგი ჩიმაკაძეს უპასა, რომელმაც ჯანიკო გიორგაია მოძებნა და მანაც წონასწორობა აღადგინა, 1:1. ორივე გუნდი შეეცადა ბურთის გატანას, მაგრამ შესვენებამდე დარჩენილ არასრულ 5 წუთში, არაფერი შეცვლილა. მეორე ტაიმიც სწრაფ ტემპში, დაძაბულად წარიმართა და ერთით მეტი გოლი გავიდა. საწყისი წუთები მშრალი აღმოჩნდა, 28-ე წუთზე ლუკა ფარცვანიამ ჯორჯიანსელთა იერიში ჩაჭრა, კონტრშეტევა წამოიწყო, ფლანგზე ხარატიშვილი მოძებნას, რომლის პასით ჩიმაკაძემ მეტად რთული სიტუაციიდან გაიტანა ბურთი და კსუ წინ გაიყვანა, 2:1. ბრძოლა გაგრძელდა და 35-ე წუთზე კავკასილებმა ისევ კონტრშიერიშით იხეირეს. ჩიმაკაძემ მეტოქეს ბურთი აართვა და მისი დარყმა მეკარე ბექა ტყემალაძემ მოიგერია, მაგრამ ჩიმაკაძემ მაინც შეძლო გიორგაიასთვის ბურთის გადაწოდება, მანაც მეორე გოლი გაიტანა და სტუდენტების ფორა გააორმაგა, 3:1.

ამ გოლმა სტუდენტები გამარჯვებასთან დაახლოვა. მიუხედავად ამისა ნიუ ვიჟენმა თამაშის გადარჩენისთვის ბოლომდე იბრძოლა. დარჩენილ 5 წუთში ჯორჯიანსელებმა მეკარიანად შეუტიეს, რითაც სტუდენტებმა იხეირეს. მატჩის დასრულებამდე 7 წამით ადრე, კსუ-ს კიპერი ალი ასლანი ბურთს დაეუფლა და ნიუ ვიჟენის ცარიელ კარში გაიტანა. კსუ-მ 4:1 მოიგო და ჩემპიონობის შესანარჩუნებლად ერთი დიდი ნაბიჯი გადადგა.

საჩემპიონო ფინალური სერიის მეორე შეხვედრა თბილისის ოლიმპიურ სასახლეში, პარასკევს, 29 მაისს, 19 სათზე დაიწყება.