ფუტსალის უმთავრესი ლიგის საჩემპიონო ფინალურ სერიაში მეორე მატჩი გაიმართა, რომელშიც კსუ-მ პირველი შეხვედრის მსგავსად, 4:1 მოიგო. ამ გამარჯვებით სტუდენტებმა ოქროს მედლები თითქმის გაინაღდეს. ჩემპიონობის შენარჩუნებამდე მათ ერთი მოგება სჭირდებათ.

უკვე თამამად შეიძლება ითქვას, კავკასიელებმა დაამტკიცეს, რომ ნიუ ვიჟენ ჯორჯიანსთან ურთიერთშეხვედრები მხოლოდ წარსული და ის სტატისტიკა, რომლის შეცვლაც მათ ძალუძთ. მიმდინარე საჩემპიონო სერიამდე, ფუტსალის უმთავრეს ლიგაში, ნიუ ვიჟენმა 17 მატჩი მოუგო კსუ-ს. სტუდენტებმა 11 შეხვედრაში იმარჯვეს, 3 თამაში კი ფრედ დასრულდა. მიუხედავად ამისა, კავკასიელებმა ზედიზედ მეორედ მოიგეს.

ფლეი ოფის წინა შეხვედრის მსგავსად, ანგარიში კვლავ ნიუ ვჟენმა გახსნა. თუმცა, ამჯერად უკვე სწრაფი გოლით: 25-ე წამზე, ფლანგიდან ვახტანგ კეკელიას გამჭოლი პასი ნუკრი ჭუმბირიძემ გოლად აქცია, 1:0. თამაში ორმხრივი შეტევებით გაგრძელდა. სტუდენტებმა მეკარიანად შეუტიეს და მე-19 წუთზე წონასწორობა აღადგინეს. ფლანდიდან არჩილ სებისკვერაძის ჩაწოდებისას, ჯანიკო გიორგაიამ ბურთი გაატარა და მის ზურგსუკან მყოფმა საბა ტყეშელაშვილმა ანგარიში გაათანაბრა, 1:1.

მეორე ტაიმიც არანაკლებ დაძაბულად და ორმხრივი იერიშებით წარიმართა. ტაიმის სტარტზე ჯორჯიანსელებს, ბარე ორი შანსი ჰქონდა გოლის გატანისა, მაგრამ მათ ეს ვერ შეძლეს. მე-8 წუთზე ფლანგიდან ტყეშელაშვილის გამჭოლი პასისას, ნიკა მანგოშვილმა ბურთი შეუჩერებლად გადაგზავნა კარში და კაპიტანმა კსუ წინ გაიყვანა, 1:2. ორიოდე წუთში სებისკვერაძემ მეტოქეს ბურთი აართვა, ჩიმაკაძეს გადააწოდა, რომელმაც სტუდენტების ფორა გააორმაგა, 1:3. მატჩის გადასარჩენად ნიუ ვიჟენს არასრული ნახევარი ტაიმი ჰქონდათ, მაგრამ დარჩენილ დროში ისევ სტუდენტებმა იძალეს. 33-ე წუთზე საბა მაჩიტიძემ მეტოქის მეკარის, მცველის მისამართით გადაცემა ჩაჭრა და ბურთს კარში მიუჩინა ადგილი, 1:4. ჯორჯიანსელებს 7 წუთი ჰქონდათ ვითარების შესაცვლელად, მაგრამ ანგარიში აღარ შეცვლილა.

საჩემპიონო სერიაში კსუ-მ ზედიზედ მეორე მატჩში იმარჯვა და ჩემპიონობის შესანარჩუნებლად ერთი გამარჯვება სჭირდებათ. ფლეი ოფის მესამე მატჩი 3 ივნისს გაიმართება.