ფუტსალის უმთავრესი ლიგის ჩემპიონი უცვლელია, კსუ-მ საჩემპიონო თასი მესამედ აღმართა. შესაბამისად, ნიუ ვიჟენ ჯორჯიანსის მსგავსად, კავკასიელებიც უკვე 3-ჯერ არიან ქვეყნის ჩემპიონები. ფუტსალის თასის შემდეგ, კსუ-მ ჩემპიონობაც იზეიმა და მესამე ტიტულისთვის, სუპერთასისთვის იბრძოლებს. თუმცა, მანამდე გადამწვეტი მატჩი მიმოვიხილოთ...

ფლეი ოფის ფინალური სერიის მეოთხე შეხვედრა ყველაზე უხვგოლიანი აღმოჩნდა. სამი შეხვედრიდან ორში კსუ-მ იმარჯვა და კავკასიელებმა ეს შანსი ხელიდან არ გაუშვეს. დინალური სერიის ეს მატჩიც გამორჩეულად სამახსოვრო იყო. შეხვედრა ორმხრივი შეტევებით წარიმართა. კსუ ახლოს იყო ანგარიშის გახსნასთან, თუმცა ჯორჯიანსელები მეკარემ იხსნა. შემდეგ ნიუ ვიჟენსაც შეეძლო გატანა, მაგრამ პირველი გოლი მე-12 წუთზე გავიდა. ნოდარ მ. ქურცაძემ ჯორჯიანსელებს ბურთი მოპარა და ფლანგზე გორგი ჩიმაკაძეს უპასა, რომელმაც მახვილი კუთხიდან გაისროლა და კსუ წინ გაიყვანა, 0:1. ნიუ ვიჟენმა მეკარიანად შეუტია და 4 წუთში უპასუხა. მე-16 წუთზე ვახტანგ კეკელიამ გრძელი, გამჭოლი პასით ვახტანგ ჯვარაშვილი მოძებნა, რომელმაც ტექნიკური დარტყმით ანგარიში გაათანაბრა, 1:1.

მეორე ნახევარი უფრო დრამატულად წარიმართა. 25-ე წუთზე ლუკა ფარცვანიამ მეტოქის გადაცემა ჩაჭრა, ნოდარ მ. ქურცაძემ სტუდენტები ისევ წინ გაიყვანა 1:2. ამან ჯორჯიანსელები გაახელა და მათ მეკარიანად შეუტიეს, რითაც კსუ-მ ისარგებლა. 28-ე წუთზე სტუდენტების მეკარე ალი ასლანმა მოწინააღმდეგის იერიში დაასრულა და გრძელი პასით საბა მაჩიტიძე მოძებნა. მან უკეთეს პოზიციაში მყოფ ლუკა ფარცვანიას გადააწოდა ბურთი, რომელმაც კსუ-ს ფორა გააორმაგა, 1:3. ჯორჯიანსელებს საკმაო დრო, 12 წუთი ჰქონდათ მატჩის გადასარჩენად და მათ ხუთეულით შეუტიეს. კავკასიელები დაცვაში გამაგრდნენ და მოწინააღმდეგეს კონტრშეტევებით პასუხობდნენ. 32-ე წუთზე, ჯანიკო გიორგაიამ ნიუ ვიჟენის შეტევა ჩაშალა, საბა ტყეშელაშვილმა კი შორეული ზუსტი დარტყმით, ცარიელ კარში გაიტანა, 1:4. მატჩის დასრულებამდე 8 წუთი იყო დარჩენილი და ჯორჯიანსელებმა მეტოქეზე ზეწოლა გააძლიერეს, მაგრამ მხოლოდ ერთი ბურთის გაქვითვა მოახერხეს. 36-ე წუთზე ვახტანგ კეკელიამ საბოლოო შედეგი დააფიქსირა, 2:4. კსუ-მ მოიგო და მესამედ გახდა ფუტსალის უმთავრესი ლიგის ჩემპიონი.

ფინალური სერიიის დასრულების შემდეგ, საქართველოს ფეხბურთის ფედერაციის გენერალურმა მდივანმა დავით მუჯირმა და ფუტსალის ასოციაციიის პრეზიდენტმა ლევან ცქიტიშვილმა, ვიცე-ჩემპიონი ვერცხლის მედლებით, ჩემპიონი ოქროს მედლებითა და საჩემპიონო თასით დაჯილდოვეს. ამას გარდა, 2025-2026 წლების სეზონი 7 ნომინანტს შესაბამისი ჯილდოები გადასცეს. ნომინანტთა შვიდეული ასეთია: 

საუკეთესო მეკარე - ალი ასლანი (კსუ)

საუკეთესო მცველი - საბა ტყეშელაშვილი (კსუ)

საუკეთესო უნივერსალი - ირაკლი თოდუა (ნიუ ვიჟენ ჯორჯიანსი)

საუკეთესო თავდამსხმელი - ჯანიკო გიორგაია (კსუ)

საუკეთესო მწვრთნელი - ლევან კობაიძე (კსუ)

საუკეთესო ფეხბურთელი - ალი ასლანი (კსუ)

საუკეთესო ბომბარდირი - ჯანიკო გიორგაია (კსუ) – 21 გოლი