ფუტსალში, ევროპის ჩემპიონთა ლიგის საკვალიფიკაციო ეტაპზე გასული გუნდები, შვეიცარიის ქალაქ ნიონში ჩატარებულმა წილისყრამ კვარტეტებად სხვადასხვა ჯგუფში დააწყვილა. რაღა თქმა უნდა, მათ შორისაა კსუ (საქართველოს ჩემპიონი კავკასიის საერთაშორისო უნივერსიტეტი). კავკასიელები C ჯგუფში მოხვდნენ და მათი მეტოქეებია, ბუბა მარა (ბოსნია-ჰერცოგოვინა), უტლეირა იდრეტსლაგი (ნორვეგია) და ლინქსი (გიბრალტარი). ჩვენი ჯგუფის მატჩები ბოსნიაში, ქალაქ კაზინში 25-30 აგვისტოს გაიმართება. მატჩების განრიგი მოგვიანებით გაცხადდება, მანამდე კი ორიოდე სიტყვით მეტოქეები გავიცნოთ.

ბოსნიური ბუბა მარა, მეტოქეთა ამჟამინდელი ტრიოდან, ჩვენი ჩემპიონისთვის ყველაზე ნაცნობია. ფუტსალში, ჩემპიონთა ლიგის წინასწარ რაუნდში, ჯგუფის მატჩები, შარშანაც ბოსნიის ქალაქ კაზინში ჩატარდა და მაშინაც ბუბა მარასთან მოგვიწია დაპირისპირება. 27 აგვისტოს გამართულ მატჩში, მე-18 წუთზე ჯანიკო გიორგაიამ გახსნა ანგარიში. თუმცა, მასპინძლებმა მალევე გაათანაბრეს და საბოლოოს ჩვენი გუნდი 4:1 დამარცხდა. 2008 წელს დაარსებულ ბუბა მარას ბორკო სურუჯიჩი წვრთნის. ბოსნიური ვებგვერდების მიხედვით, სლოვენიელი იგორ ოსრედკარი, ბოსნიელები ალმადეინ ბუნდევიცა და აჰმედ კადიჩი გუნდის წამყვანი მოთამაშეებია. ბუბა მარამ სლოვენიელი პეტარ ნიკოლიჩი, ასევე ბრაზილიელები, დიეგო ფავერო და პედრინიო დაიმატა.

ნორვეგიული უტლეირა იდრეტსლაგი, 1972 წელს დაარსებული გუნდია, რომელსაც კაი ბარდალი წვრთნის და რომელიც 3-ჯერ გახდა ნორვეგიის ჩემპიონი. გუნდს მეტსახელად ნარინჯისფდრ ვეფხვებს ეძახიან. მაგნუს იოჰანსენი, ანდრეას ოკლანდი, სინდრე ველო,  ოსკარ ანდრეასენი, ანდრეას ოკლანდი გუნდის წამყვანი მოთამაშეები არიან. ფუტსალის ჩემპიონთა ლიგის საკვალიფიკაციო ეტაპზე ჩატარებული ბოლო 5 მატჩიდან, უტლეირამ 2 წააგო და 3 მოიგო. სამი წლის წინ, 1:5 დამარცხდა კოსოვოს პრიშტინასთან, 6:1 სძლია ისლანდიურ აისბჯორნინს, 2024 წელს დანიურ ჰჯორინგთან 4:3 იმარჯვა, იტალიურ კატანიასთან 0:4 დამარცხდა, გიბრალტარულ ევროპას 5:0 მოუგო.

გუბრალტარული ფუტსალის გუნდი ლინქსი 2007 წელსაა დაარსებული და ამავე სახელწოდების საფეხბურთო კლუბის ნაწილია. გუნდის მთავარი მწვრთნელი რაფაელ ბერგესია. გუნდს, რომელსააც ყვითლებს, ზოგჯერ ყვითელ კატებს ეძახიან,  არაერთი ლეგიონერია: ბრაზილიელები - ვინიციუსი, ანდრე დოს სანტოსი, ბერნანდესი, ესპანელები - ნანდო, რომერო, სერანო, პერესი, არგენტინელი მალემაკი, ნიდერლანდებიდან მოჰამი, ბელგიელი დიალო... ლინქსმა ევროპის ჩემპიონთა ლიგის წინასწარ რაუნდში ბოლო 5 მატჩიდან ყველა წააგო. 2018 წელს რუმინულ ტიმიშოარასთან 0:6, 2019 წელს 3-ჯერ დამარცხდა - ნიდერკლანდურ ჰოვოკუბოსთან 1:6, 4:9 ლონდონურ ჰელვეციასთან, 1:5 შოტლანდიურ სანტირესთან, 2020-ში კი ბელგიურმა შარლერუამ 13:1 გაანადგურა.