თბილისის ოლიმპიურ სასახლეში, ფუტსალის სუპერთასისთვის ყველაზე ტიტულოვანი ქართული კლუბები, კსუ და ნიუ ვიჟენ ჯორჯიანსი დაუპირისპირდნენ ერთმანეთს. ლომების ჭიდილი სუპერთასის საკადრისად წარიმართა, რაზეც ანგარიშის გარდამავალი ცვლილება და უხვგოლიანობა მეტყველებს.

მე-5 წუთზე ნიკა ხარატიშვილის გოლით კავკასიელები დაწინაურდნენ, 1:0. თუმცა, მათ ეს არ იკმარეს და მე-12 წუთზე ნოდარ ვ. ქურცაძემ სხვაობა გააორმაგა, 2:0. ტაიმის მიწურულს ჯორჯიანსელებმა იძალეს. ჯერ იყო და მე-18 წუთზე ავტოგოლით სხვაობა შეამცირეს. წუთში კი ნიკოლოზ გაბრიჩიძემ ანგარიში გაათანაბრა, 2:2.

მეორე ტაიმი ნიუ ვიჟენმა სწრაფი გოლით დაიწყო და 22-ე წუთზე ლევან სვანიძემ ჯორჯიანსელები წინ გაიყვანა, 2:3. სამიოდე წუთში გიორგი ჩიმაკაძემ წონასწორობა აღადგინა, 3:3. კიდევ სამ წუთში ხარატიშვილმა კსუ დააწინაურა. ჯორჯიანსელებმა ბოლომდე იბრძოლეს და 32-ე წუთზე, კიდევ ერთი ავტოგოლით ანგარიში კიდევ ერთხელ გათანაბრდა. თუმცა, 36-ე წუთზე ხარატიშვილმა მესამედაც გაიტანა და სუპერთასიც კავკასიელებმა აღმართეს. ჩემპიონობისა და ფუტსალის თასის შემდეგ, კსუ-სთვის სუპერთასი გასული სეზონის რიგით მესამე ტიტულია. ფუტსალის უმთავრესი ლიგა ამ თვეში აიღებს სტარტს, შესაბამისად, წინ ახალი ბატალიები გველის.