ფუტსალის მთავარი ლიგაში ახალი სეზონი, მოულოდნელობებითა და სენსაციებით დაიწყო. მოქმედ ჩემპიონ, თასისა და სუპერთასის მფლობელისთვის, სტარტი წარუმატებელი აღმოჩნდა. უფრო დიდი სენსაცია, თითქმის უცნობი ლიგის დებიუტანტის რიხიანი სტარტი გახლდათ. ვიცე-ჩემპიონმა შედეგიანად დაიწყო. ფლეი ოფის ნახევარფინალისტი კი ფრეს დასჯერდა. ასეთი გახლდათ ფუტსალის ლიგაში ახალი, 2026-27 წლების სეზონის პირველი ტურის მოკლე რეზიუმე. ახლა კი თანმიმდევრობას მივყვეთ.

ვიცე-ჩემპიონმა ნიუ ვიჟენ ჯორჯიანსმა UG-ს უმასპინძლა და 13 წუთში მატჩის ბედი გადაწყვიტა. ავთანდილ ასათიანის ბიჭები, ლევან სვანიძის სწრაფი გოლით, პირველივე წუთზე დაწინაურდნენ. სვანიძემ მეათე წუთზე მეორედაც გაიტანა. სამიოდე წუთში კი ნიკოლოზ გაბრიჩიძემ საბოლოო შედეგი, 3:0 დააფიქსირა.

ფლეი ოფის ნახევარფინალისტი პსპ, დინამო თბილისს შეეჭიდა და ეს დერბი დაძაბული აღმოჩნდა. ამაზე ისიც მეტყველებს, რომ დერბის პირველი ნახევარი უგოლოდ დასრულდა. გოლები კი ბოლო 13 წუთში გავიდა. 27-ე წუთზე თეიმურაზ ექიზაშვილმა ფარმაცევტები წინ გაიყვანა. თუმცა, 9 წუთში ომარ ასაშვილმა ანგარიში გაათანაბრა, 1:1. მეტოქეებმა თითო ბურთი და თითო ქულა გაცვალეს.

გაცილებით დაძაბული და თანაც უხვგოლიანი, ტურის ცენტრალური მატჩი აღმოჩნდა, რომელშიც ჩემპიონმა კსუ-მ, მთავარ ლიგაში დაბრუნებულ თსუ-ს უმასპინძლა. დერბი ორი განსხვავებული ტაიმისგან შედგებოდა. შესვენებამდე ქომაგებმა მხოლოდ ერთი გოლი იხილეს - მე-14 წუთზე საბა მაჩიტიძემ ანგარიში გახსნა და კავკასიელები დააწინაურა. ჩემპიონებმა მეორე ნახევარიც აქტიურად დაიწყეს და 21-ე წუთზე ჯანიკო გიორგაიამ სხვაობა გააორმაგა, 2:0. თუმცა, სამიოდე წუთში, 7-წამიან შუალედში თსუ-მ მეტოქეს ორი ბურთით უპასუხა. ზურაბ ლუკავას ავტოგოლს, გიორგი თოდუამ ერთი ბურთი შეაშველა და ანგარიში გათანარდა, 2:2. კავკასიელებმა მაინც იძალეს და 27-ე წუთზე ნიკა ხარატიშვილმა კსუ წინ გაიყვანა, 3:2. თუმცა, ხუთ წუთში გეგა კოშაძემ კიდევ ერთხელ აღადგინა წონასწორობა, 3:3. მატჩის დასრულებამდე 8 წამით ადრე საბა ეგრისელაშვილმა გამარჯვების გოლი გაიტანა. თსუ-მ 3:4 იმარჯვა და ლიდერთა ტრიოში გაერია.

მთავარი სენსაცია ლომისამ გამოჭედა. უცნობმა დებიუტანტმა, რომელსაც მოთამაშე-მწვრთნელი ვანო ბექაური ხელმძღვანელობს, სეუ-სთან იმარჯვა. ლომისელთა გამარჯვებას სწორედ ბექაურმა დაუდო სათავე, თანაც მე-2 წუთზე გახსნა ანგარიში, 1:0. სტუდენტებს შესვენებამდე შეეძლოთ წონასწორობის აღდგენა, მაგრამ სანდრო ობოლაძემ შანსი ვერ გამოიყენა. ლომისელებმა მეორე ტაიმიც აქტიურად დაიწყეს. 27-ე წუთზე გიორგი კურტანიძემ სხვაობა გააორმაგა. წუთში ბექაურმა მეორე ბურთის გატანით დუბლი შეასრულა, 3:0. ბექაურს გიორგი კურტანიძეც არ ჩამორჩა და მანაც დუბლი ჩაიწერა. კიდევ ერთი გოლი ლაშა კურტანიძის ანგარიშზეა. სეუ-დან პრესტიჟის გოლის ავტორობა სანდრო ობოლაძეს ერგო. ლომისამ 5:1 იმარჯვა და ბურთების უკეთესი ბალანსით ცხრილს სათავეში მოექცა. მეორეზე ნიუ ვიჟენია. ასევე 3 ქულა აქვს მესამე მყოფ თსუ-ს.

მეორე ტურის მატჩები 25 სექტემბერს გაიმართება. UG ლომისას ეთამაშება, სეუ პსპ-ს. ტურის ცენტრალური მატჩი, ჩემპიონისა და ვიცე-ჩემპიონის, შესაბამისად კსუ-სა და ნიუ ვიჟენ ჯორჯიანსის შერკინება იქნება. არანაკლებ საინტერესო უნდა იყოს თსუ-სა და დინამო თბილისის შეხვედრაც. ასე რომ, წინ საინტერესო ბატალიები გველის.