უცნობმა დებიუტანტმა მეორედაც მოიგო, ჩემპიონის მძლეველი დინამოსთან დამარცხდა, კავკასიელებმა დერბიში იმარჯვეს, პსპ-მ კი პირველი გამარჯვება იზეიმა. ასეთია ფუტსალის უმთავრესი ლიგის მე-2 ტურის რეზიუმე. იმ ტურის, რომელიც სასტარტოზე უხგოლიანი გამოდგა (4 გოლით მეტი გავიდა)... ეს მოკლედ, დეტალური მიმოხილვისთვის თანმიმდევრობას მივყვეთ.

სეუ-სთან გამარჯვების შემდეგ, ლომისამ მეორე მატჩში მოიგო და დაამტკიცა რომ სულაც არ ხუმრობს. ვანო ბექაურის ბიჭებმა კიდევ ერთ სტუდენტურ გუნდს სძლიეს. UG-სთან შეხვედრის მე-4 წუთზე, ლომისელთაგან გიორგი გურულმა გახსნა ანგარიში, 0:1. თამაში საინტერესოდ, მაგრამ მშრალად გაგრძელდა და ტაიმი ამ შედეგით დასრულდა. ლომისამ მეორე ნახევარი უკეთესად დაიწყო. 23-ე წთზე საბა დავითულიანმა ფორა გააორმაგა. 3 წუთში გიორგი ლაგაზაშვილმა სხვაობა კიდევ უფრო გაზარდა, 0:3. ნახევარ წუთში თეგა პატარაიამ ერთი ბურთი გაქვითა, 1:3. მატჩის ორმრივი შეტევებით გაგრძელდა, მაგრამ ბოლო ორი წუთი დრამატული გამოდგა. 38-ე წუთზე ვაჟა კვარაცხელიამ სხვაობა მინიმუმამდე შეამცირა, 2:3. თუმცა, მატჩის დასრულებამდე ნახევარი წუთით ადრე დავითულიანმა მეორე გოლი იზეიმა. ლომისამ 2:4 იმარჯვა და 6 ქულით ერთპიროვნულად პირველ ადგილზეა. UG-ს ჯერჯერობით ქულა არ აქვს და მეშვიდეზეა.

ფუტსალის ყველაზე ტიტულოვანი გუნდების (3-3 ჩემპიონობა), კსუ-სა და ნიუ ვიჟენ ჯორჯიანსის ჭიდილი ტურის ცენტრალური მატჩი გახლდათ. კავკასიელები მე-3 წუთზე დაწინაურდნენ - რონინიომ ყოფილ გუნდს გაუტანა. ამან ჯორჯიანსელები გაახელა. მათ წონასწორობის აღდგენა არაერთხელ შეეძლოთ, მაგრამ ხან ძელმა იხსნა კსუ და ხანაც მეკარე ალი ასლანმა. მე-14 წუთზე კი ნოდარ ვ. ქურცაძემ სხვაობა გააორმაგა, 2:0. ტაიმის დასრულებამდე 13 წამით ადრე, ნიკოლოზ გაბრიჩიძემ შორიდან გაისროლა და სხვაობა მინიმუმამდე შეამცირა, 2:1. მეორე ტაიმი კავკასიელებმა კვლავ აქტიურად დაიწყეს და 28-ე წუთზე გიორგი ჩიმაკაძემ ორბურთიანი ფორა აღადგინა, 3:1. თამაშის დასრულებამდე ნახევარი წუთით ადრე ლევან სვანიძემ საბოლოო შედეგი (3:2) დააფიქსირა და ბომბარდირთა დავაში 3 გოლით პირველ ადგილზე გადაინაცვლა. კსუ-მ სეზონის პირველი მოგება ჩაიწერა და 3 ქულით მე-5 ადგილზეა. ნიუ ვიჟენსაც 3 ქულა აქვს და ბურთების უკეთესი მაჩვენებლით მეოთხეა.

პსპ-სთან ფრის შემდეგ, დინამო თბილისმაც პირველად მოიგო, თანაც კსუ-ს მძლეველი თსუ გააწბილა. მე-9 წთზე ლაშა-გიორგი ობოლაძემ გახსნა ანგარიში, 0:1. წუთნახევარში დინამოელთა მოთამაშე-მწვრთნელმა კახაბერ მაისაიამ სხვაობა გააორმაგა, 0:2. სტუდენტებმა მხოლოდ მე-16 წუთზე, საბა ეგრისელაშვილის გოლით უპასუხეს, 1:2. უნივერსიტეტელებმა მეორე ტაიმი უკეთ დაიწყეს და 25-ე წუთზე მოსე ჩიკიროვმა წონასწორობა აღადგინა, 2:2. თუმცა, 38-ე წუთზე დავით ხუბუტიამ გამარჯვებისა გაიტანა. დინამომ 2:3 მოიგო და 4 ქულით პსპ-სთან ერთად მეორე-მესამე ადგილზეა. თსუ კი 3 ქულით მე-6-ეა.

სეუ-ს პსპ-სთან ხელი მოეცარა, თორემ პრესტიჟისას მაინც გაიტანდა -ფარმაცევტებმა სტუდენტებს 6 უპასუხო გოლი გაუტანეს. პსპ-დან ლუკა ელიზბარაშვილმა და ალექსანდრე ორაგველიძემ დუბლები მიითვალეს. ნიკოლოზ კოპლატაძე და გიორგი ქურხული თითო გოლს დასჯერდნენ. პსპ 4 ქულით მეორე ადგილზეა, უქულო სეუ კი ბოლო საფეხურზე.

მომდევნო ტურის მატჩები 30 სექტემბერს გაიმართება და მინიმუმ ორი საინტერესო მატჩი გველის. ნიუ ვიჟენ ჯორჯიანსი თსუ-ს ეთამაშება, ლომისა კი მოქმედ ჩემპიონ კსუ-ს მიიღებს.