უცნობი დებიუტანტი სეზონში პირველად დამარცხდა და პირველობის დათმობასაც ვერ ასცდა. პსპ სტუდენტებთან იგოლავა და ცხრილს სათავეში მოექცა. მეორე ადგილზე უკვე ტრიოა - ერთბაშად სამი გუნდი. ასეთია ფუტსალის უმთავრესი ლიგის მე-3 ტურის მოკლე რეზიუმე, რომელშიც ამ სეზონის სარეკორდო გოლების (30 გოლი) რაოდენობა გავიდა და სარეკორდო მოგებაც დაფიქსირდა... ახლა კი თანმიმდევრობას მივყვეთ.

ნიუ ვიჟენ ჯორჯიანსისა და თსუ-ს დაპირისპირება ერთ-ერთი გამორჩეული გახლდათ. ჯერ სტუდენტებმა იძალეს და მე-12 წუთზე გიორგი თოდუამ გახსნა ანგარიში, 0:1. ჯორჯიანსელებმა მეტოქეს ორი გოლით უპასუხეს. ერთწუთიან მონაკვეთში არჩილ სებისკვერაძემ დუბლი მიითვალა და ნიუ ვიჟენი წინ გაიყვანა, 2:1. ტაიმის ბოლო წუთზე გეგა კოშაძემ წონასწორობა აღადგინა, 2:2. მეორე ნახევარი უნივერსიტეტელებმა აქტიურად დაიწყეს და რომან კუხიანიძემ სტუდენტები დააწინაურა, 2:3. ჯორჯიანსელებმა ნიკოლოზ გაბრიჩიძის გოლით, ნახევარ წუთში, უპასუხეს, 3:3. თუმცა, 29-ე წუთზე კოშაძემ მეორედაც გაიტანა, 3:4. ხუთ წუთში ლაშა ჯიქიამ სტუდენტების ფორა გააორმაგა, 3:5. ამან ნიუ ვიჟენი გაახელა და სამწუთიან მონაკვეთში ნიკა ბიძინაშვილმა, გიორგი ზუნტუროვმა და ვახტანგ ჯვარაშვილმა თითო გოლი იზეიმეს. ჯორჯიანსელებმა 6:5 მოიგეს და სხვა ორ გუნდთან ერთად, მეორე ადგილზე არიან.

ლიგის დებიუტანტმა და პირველ ადგილზე მყოფმა ლომისამ პირველი მარცხი იწვნია. ვანო ბექაურის ბიჭები მოქმედ ჩემპიონ კსუ-სთან დამარცხდნენ. მე-10 წუთზე კავკასიელთაგან რონინიომ გახსნა ანგარიში, 0:1. მეორე ტაიმში, 25-ე წუთზე ანგარიში ავტოგოლით გათანაბრდა. თუმცა,  ჯანიკო გიორგაიამ 31-ე წუთზე კსუ ისევ წინ გაიყვანა, 1:2. მაატჩის დასრულებამდე 9 წამით ადრე საბა მაჩიტიძემ საბოლოო ანგარიში, 1:3 დააფიქსირა.

პსპ-მ UG-სთან იგოლავა და ამ სეზონში ყველაზე დიდი სხვაობით მოგებაც დააფიქსირა. ფარმაცევტებმა 10:1 იმარჯვეს და ცხრილს სათავეში მოექცნენ. პსპ-დან გიორგი ქურხულმა ჰეთ თრიკი შეასრულა. ალექსანდრე ორაგველიძემ და ნიკოლოზ კოპლატაძემ დუბლები მიითვალეს. ნიკოლოზ კურტანიძემ, გიორგი სილაგავამ და ლუკა ელიზბარაშვილმა თითო გოლი იკმარეს. სტუდენტებიდან პრესტიჟის გოლის ავტორობა გიორგი ქავთარაძემ ითავა.

დინამო თბილისისა და სეუ-ს მატჩი დრამატული გამოდგა. არბიტრმა ამ შეხვედრაში ყვითლების გარდა, წითელი ბარათი 3-ჯერ გამოიყენა. ორჯერ დინამოელებს უჩვენა და ერთხელ სტუდენტებს. უგოლო პირველი ნახევრის შემდეგ, მეორე ტაიმში 4 გოლი გავიდა. 23-ე წუთზე ომარ ასაშვილმა დინამო წინ გაიყვანა, 1:0. აქედან 15 წუთში კახა მაღლაკელიძემ დინამოს უპირატესობა გააორმაგა, 2:0. ნახევარ წუთში ცოტნე შანშიაშვილმა სხვაობა მინიმუმამდე შეამცირა, 2:1. მატჩის დასრულებამდე 10 წამით ადრე სანდრო ობოლაძემაც გაიტანა, 2:2. სეუ-მ ქამბექი მოახერხა და სეზონის პირველი ქულა მოიპოვა. ახლა უქულოდ მხოლოდ UG-ია.

მომდევნო ტურში ცენტრალური მატჩი გველის, მოქმედი ჩემპიონი კსუ ცხრილის ლიდერ პსპ-ს უმასპინძლებს. თსუ სეუ-ს მიიღებს, ნიუ ვიჟენი ლომისას, UG კი დინამო თბილისს და ალბათ სიურპრიზების გარეშე ეს მატჩებიც არ ჩაივლის.