ფრე ტურის ცენტრალურ მატჩში, ჯორჯიანსელთა სარეკორდო მოგება და პირველზე აღზევება, სენსაცია ერთ-ერთ სტუდენტური გუნდისგან - ასეთია ფუტსალის უმთავრესი ლიგაში, მე-4 ტურის მოკლე რეზიუმე. დეტალური მიმოხილვას თანმიმდევრობით მივყვეთ.

მოქმედ ჩემპიონ კსუ-სა და ცხრილის ლიდერ პსპ-ს შერკინება უდავოდ ტურის ცენტრალური მატჩი გახლდათ.  პირველი ტაიმის 17-მა წუთმა უგოლოდ ჩაიარა. მე-18 წუთზე ლუკა ელიზბარაშვილმა ფარმაცევტები დააწინაურა, 0:1. თუმცა, კავკასიელებმა მეორე ნახევარი აქტიურად დაიწყეს და 22-ე წუთზე ნუკრი ჭუმბურიძემ წონასწორობა აღადგინა, 1:1.  დარჩენილ დროში ორივე გუნდს შეეძლო ბურთის გატანა, მაგრამ ანგარიში აღარ შეცვლილა. მეტოქეები 1:1 ფრეზე გაიყარნენ. შედეგად, პსპ 8 ქულით მე-2 საფეხურზე დაეშვა, კსუ კი 7 ქულით მე-3 ადგილზეა.

სტუდენტურ დერბიში თსუ-მ სეუ-ს დიდი სხვაობით, 9:3 სძლია. მოსე ჩიკირიოვმა, გიორგი თოდუამ და საბა ეგრისელაშვილმა დუბლები მიითვალეს. გეგა კოშაძემ და ალექსი ტკაჩოვმა თითო ბურთი ჩაიწერეს, თსუ-მ ერთი ავტოგოლიც იზეიმა. სეუ-დან თითო გოლის ავტორობა სანდრო ობოლაძეს და დაჩი ბუცხრიძეს ერგოთ.

ნიუ ვიჟენ ჯორჯიანსმა ლომისასთან გოლების ფოიერვერკი მოიწყო და 13:0 მოგებით, სეზონის სარეკორდო გამარჯვება დააფიქსირა. ნიკა ჩალაძემ ჰეთ თრიკი შეასრულა. ვახტანგ ჯვარაშვილმა, ნიკოლოზ გაბრიჩიძემ და ლევან სვანიძემ 2-2 ბურთი გაიტანეს. არჩილ სებისკვერაძე, ნიკა ბიძინაშვილი, ლუკა ჯოლოხავა და გიორგი ტაბახმელაშვილი თითო გოლს დასჯერდნენ. საგულისხმოა ის, რომ ლევან სვანიძე და ნიკოლოზ გაბრიჩიძე ბომბარდირთა ცხრილს, 5-5 გოლით ლიდერობენ. პსპ-სა და კსუ-ს ფრით, ნიუ ვიჟენმა ისარგებლა და 9 ქულით პირველ ადგილზე აღზევდა. ლომისა კი 6 ქულით თსუ-სთან ერთად, მეოთხე-მეხუთე ადგილზეა.

სეზონის სტარტზე 3 მარცხის შემდეგ, UG-მ პირველი სენსაციით პირველი გამარჯვება იზეიმა. ვაჟა კვარაცხელიას მიერ, მე-10 წუთზე გატანილი გოლით, სტუდენტები დინამო თბილისთან დაწინაურდნენ, 1:0. მართალია, კახა მაღლაკელიძემ 21-ე წუთზე წონასწორობა აღადგინა, 1:1. ორ წუთში ლაშა-გიორგი ობოლაძემ დინამო წინ გაიყვანა (1:2), მაგრამ სტუდენტებმა ბოლომდე იბრძოლეს და დაუფასდათ კიდეც - დავით ჯერანოვმა ბოლო 6 წუთში, დუბლი შეასრულა. UG-მ 3:2 მოიგო და 3 ქულით ბოლოდან მე-7 საფეხურზე აინაცვლა. დინამო კი 5 ქულით მე-6 ადგილზეა.

ამ ტურის შემდეგ, ფუტსალის ლიგაში სანაკრებო პაუზა დაიწყო. საქართველოს ფუტსალის ეროვნული გუნდი, 14 ოქტომბერს კოსოვოს ნაკრებს უმასპინძლებს. 20 ოქტომბერს კი იტალიას სტუმრად ეთამაშება.

ფუტსალის ლიგა ოქტომბრის ბოლოს განახლდება. მე-5 ტურში საინტერესო ბატალიები გველის. ლომისა თსუ-ს დაუპირისპირდება, დინამო კსუ-ს, სეუ UG-ს. ტურის ცენტრალური მატჩი პსპ-სა და ნიუ ვიჟენ ჯორჯიანსის შერკინება იქნება.