სანაკრებო პაუზის შემდეგ, ფუტსალის უმთავრესი ლიგა განახლდა. თითო ფრესა და მარცხს, მოქმედმა ჩემპიონმა რიგით მესამე მოგება შეაშველა. ცხრილის ლიდერმა ნიუ ვიჟენმა ტურის ცენტრალურ მატჩში იმარჯვა. თსუ-მ ლომისას დამაჯერებლად სძლია, სტუდენტურ დერბიში გამარჯვება UG-ს დარჩა. ასეთია მე-5 ტურის მოკლე რეზიუმე. უმჯობესია, დეტალური მიმოხილვისთვის თანმიმდევრობას მივყვეთ.

კსუ-სთან შეხვედრაში დინამო თბილის,ა სწრაფი გოლი იზეიმა. მართალია, მე-3 წუთზე გიორგი გაზდელიანის მიერ გატანილი ბურთით დინამოელები დაწინაურდნენ (1:0), მაგრამ მათი ეს გოლი პრესტიჟისა აღმოჩნდა. კავკასიელებმა მეტოქეს 5 გოლით უპასუხეს. 3 წუთში საბა მაჩიტიძემ ანგარიში გაათანაბრა, 1:1. ხუთ წუთში რონინიომ კსუ წინ გაიყვანა. მე-14 წუთზე გიორგი ჩიმაკაძემ სხვაობა გააორმაგა, 1:3. მეორე ტაიმის მეორე ნახევარში ნოდარ ვ. ქურცაძემ და ნუკრი ჭუმბურიძე თითო ბურთი გაიტანეს. კავკასიელემა 1:5 მოიგეს, 10 ქულით მეორე ადგილზე აინაცვლეს, ლიდერს 2 ქულით ჩამორჩებიან, მდევარს კი ერთი ქულით უსწრებენ. ამ მარცხის შედეგად 5-ქულიანი დინამო ცხრილში მე-7 საფეხურზე დაეშვა.

სეუ-სა და UG-ს სტუდენტურ დერბიში ანგარიში მხოლოდ ტაიმის მიწურულს გაიხსნა. მე-8 წუთზე გიორგი ქავთარაძემ UG წინ გაიყვანა. იმავე ქავთარაძემ 23-ე წუთზე კიდევ ერთი ბურთი გაიტანა. UG-მ 0:2 მოიგო, ქულებით ლომისას გაუთანაბრდა, მაგრამ 6 ქულითა და ბურთების უკეთესი ბალანსით მე-5 ადგილი ერგო. სეუ-ს კი მხოლოდ 1 ქულა აქვს და ბოლო საფეხურზეა.

ლომისამ თსუ-ს სტუდენტურ შტორმს მხოლოდ პირველ ტაიმში გაუძლო. მე-5 წუთზე გეგა კოშაძემ უნივერსიტეტელები დააწინაურა. მე-14 წუთზე კი გიორგი კურტანიძემ ანგარიში გაათანაბრა. მეორე ტაიმში სტუდენტების შტორმი დაიწყო. საბა ეგრისელაშვილმა დუბლი მიითვალა, მოსე ჩიკიროვმა, ლაშა ჯიქიამ და ალექსი ტკაჩოვმა თითი ბურთი გაიტანეს. ამას ლომისამ, შალვა გუგუნავას ერთი გოლით უპასუხა. თსუ-მ 2:6 მოიგო, პსპ-ს მარცხით ისარგებლა და 9 ქულით მე-3 ადგილზე აღზევდა. ლომისა კი 6 ქულით მე-6 საფეხურზეა.

პსპ-სა და ნიუ ვიჟენ ჯორჯიანსის ჭიდილი უდავოდ ტურის ცენტრალური მატჩი გახლდათ. თამაში დაძაბულად და საინტერესოდ წარიმართა და ამისი დასტურია ისიც, რომ პირველი ტაიმი უგოლოდ დასრულდა. მეორე ნახევარის სტარტზე ჯორჯიანსელებმა იძალეს და 22-ე წუთზე ნიკოლოზ გაბრიჩიძემ ძლიერი დარტყმით ანგარიში გახსნა, 0:1. ფარმაცევტებმა ნახევარ წუთში უპასუხეს. მელტონ ახალაიმ წონასწორობა აღადგინა, 1:1. მატჩის ბოლო 5 წუთში ისევ ნიუ ვიჟენმა იმარჯვა, ლევან სვანიძემ ყოფილ გუნდს ორჯერ გაუტანა. ამ დუბლის შედეგად, სვანიძე ბომბარდირთა ცხრილს 7 გოლით ლიდერობს. ჯორჯიანსელებმა 1:3 მოიგეს და  12 ქულით კვლავ პირველ ადგილზე არიან. პსპ კი 8 ქულით მე-4 საფეხურზეა.

ხუთი ტურის შემდეგ, ფუტსალის უმთავრეს ლიგაში ნიუ ვიჟენ ჯორჯიანსი და კსუ დაწინაურდა. გუნდები, რომლებმაც ყველაზე მეტჯერ იზეიმეს ქვეყნის ჩემპიონობა, პირველ-მეორე ადგილებზე არიან. მომდევნო, მე-6 ტურის მატჩები 12 ნოემბერს გაიმართება. თსუ UG-ს უმასპინძლებს, კსუ სეუ-ს, ნიუ ვიჟენი დინამოს დაუხვდება, ლომისა კი პსპ-ს მიიღებს.