23 მარტს საქართველოს ფუტსალის ლიგის მერვე ტურის შეხვედრები გაიმართა, მატჩებს ტრადიციულად თბილისის ოლიმპიურმა სასახლემ უმასპინძლა.

ტურის პირველი შეხვედრა დაძაბული და თვალსასეირო გამოდგა, კავკასიის საერთაშორისო უნივერსიტეტისა და თბილისის დაპირისპირებაში ანგარიში ოთარ ბერეჩიკიძემ მეორე წუთზევე გახსნა. მეჩვიდმეტე წუთამდე გუნდები მეტ-ნაკლებად თანაბრად თამაშობდნენ თუმცა შემდეგ ერთმანეთის მიყოლებით მეტოქის კარი ნიკა მანგოშვილმა, გიორგი ღავთაძემ, ნიკოლოზ გაბრიჩიძემ და მელიტონ ახალაიამ დალაშქრეს, მათ გოლებს ტაიმის დასასრულს გიორგი ღავთაძის წარმატებული ათმეტრიანი დარტყმაც შეემატა, რომლის შედეგადაც თამაშის პირველი ნახევარი ფრედ - 3:3 დასრულდა. მეორე ტაიმი კიდევ უფრო უხვგოლიანი გამოდგა, ნომინალური მასპინძლები ბექა ბექაურმა ოცდამეოთხე წუთზე დააწინაურა, ზუსტად ერთ წუთში გიორგი ივანიშვილმა ისევ გაათანაბრა ანგარიში. თამაშის ტემპი არ ეცემოდა, ოცდამეშვიდე წუთზე გოლი გიორგი დიაკვნიშვილმა შეაგდო, ოცდამეათეზე დუბლი გაიფორმა ოთარ ბერეჩიკიძემ და საკუთარ გუნდს 2-გოლიანი უპირატესობა მოუპოვა თუმცა ლევან კობაიძემ დაახლოებით 20 წამში ეს უპირატესობა ისევ ერთ ბურთამდე შეამცირა. გადამწყვეტი გამოდგა მატჩის ბოლო 3 წუთი, გიორგი ღავთაძის გოლით ოცდამეთვრამეტე წუთზე ანგარიში გათანაბრდა - 6:6. დაძაბულმა შეხვედრამ კულმინაციას მეორმოცე წუთამდე სულ რაღაც თხუთმეტი წამით ადრე მიაღწია, თბილისის კაპიტანმა, გიორგი დიაკვნიშვილმა, საკუთარ საჯარიმოში, მეკარის მოგერიებულ ბურთს დაარტყა და ცარიელ კარში გაიტანა, რითაც კავკასიის საერთაშორისო უნივერსიტეტი ფაქტობრივად უშანსოდ დატოვა. მალევე გავიდა ტაიმის რამდენიმე დარჩენილი წამიც, ცამეტგოლიან შეხვედრაში თბილისმა ანგარიშით 7:6 იმარჯვა.

სათამაშო დღის მეორე შეხვედრა თანაბრად დაიწყო და მეჩვიდმეტე წუთამდე, როცა თსუ-ს კარში ათმეტრიანი დარტყმა დაინიშნა, ასეც მიმდინარეობა. ნიკა გვაზავამ შანსი ვერ გამოიყენა, ალი ასლანმა ბურთი მოიგერია. თითქმის ოცწუთიანი დაძაბული ბრძოლის შემდეგ, კი, ტაიმის მიწურულს - მეთვრამეტე წუთზე მასპინძლები გიორგი ქურდაძემ დააწინაურა -  1:0. შესვენების შემდეგ თსუ-ელები აშკარად ჯობდნენ მოწინააღმდეგეს, გიორგი ჩიმაკაძისა (23’) და გიორგი ჭოხონელიძის (25’) გოლების შემდეგ ანგარიში - 3:0 გახდა. ილიაუნის ფეხბურთელებს ჰქონდათ საკმარისი დრო თამაშში დასაბრუნებლად თუმცა მათ მოწინაღმდეგეებს ვერცერთ სათამაშო კომპონენტში აჯობეს. უფრო მეტიც, ოცდამეთვრამეტე წუთზე გიორგი ჩიკამაძემ დუბლი გაიფორმა ტაბლოზე საბოლოო ანგარიში, 4:0 დაფიქსირდა.

ტურის დასკვნით შეხვედრაში ერთმანეთს პსპ და თელასი-ჯორჯიანსი დაუპირისპირდნენ, შეხვედრა დაწყებისთანავე დაძაბული გამოდგა, ფეხბურთელები საკმაოდ ხისტად თამაშობდნენ, მატჩის მეოთხე წუთზე თელასი ვახტანგ ჯვარაშვილმა დააწინაურა, თუმცა რამდენიმე წამის შემდეგ ლევან სვანიძემ ანგარიში გაათანაბრა, ტაიმის მიწურულს ვახტანგ ჯვარაშვილმა დუბლიც გაიფორმა და საკუთარი გუნდი გასახდელში ერთბურთიანი უპირატესობით გაიყვანა. მას შემდეგ, რაც შოთა თოფურიამ და გიორგი ზუნტუროვმა გოლები გაცვალეს, ოცდამეხუთე წუთისთვის ანგარიში უკვე 2:3 იყო. თუმცა, ერთი შეხედვით თანაბარი დაპირისპირების მიუხედავად თელასი-ჯორჯიანსმა სრული დომინაცია გვაჩვენა და ოცდამეცხრე წუთზე ჯანიკო გიორგაიამ უპირატესობა 2 ბურთამდე გაზარდა. მალევე, ზურაბ გარსევანიშვილის ავტოგოლითა (34’) და ვახტანგ ჯვარაშვილის გოლით (35’) სტუმრების უპირატესობა კიდევ უფრო გაიზარდა და ორი გაფრთხილების შემდეგ გურამ გოგიჩაიშვილის გაძევებამ პსპ-ს ისედაც მცირე შანსი ნულამდე დაიყვანა. ოცდამეჩვიდმეტე წუთზე ვახტანგ ჯვარაშვილმა თამაშის მეცხრე გოლი გაიტანა და თამაში ასეთივე ანგარიშით - 2:7 დასრულდა.