თასზე ნახევარფინალისტები გაირკვნენ

30 მარტს, ფუტსალში საქართველოს თასის 1/4-ფინალის მატჩები გაიმართა.

სათამაშო დღე თბილისისა და პსპ-ს საინტერესო დაპირისპირებით გაიხსნა, რომელშიც გამარჯვებულის ვინაობა პენალტების სერიაში გაირკვა. პსპ-მ თამაში აქტიურად დაიწყო და ანგარიში ლევან სვანიძემ გახსნა. ცოტა ხანში, თბილისის კარი გიორგი აფციაურმა აიღო, ხოლო გურამ გოგიჩაიშვილის დარტყმის შემდეგ „ფარმაცევტების“ უპირატესობა სამ ბურთამდე გაიზარდა. თბილისიდან ერთი საპასუხო ბურთი დაჩი ჩადუნელმა გაიტანა და პსპ-მ პირველი ტაიმი 3:1 მოიგო. 

მატჩის მეორე ნახევარში ბექა ტუღუშმა ანგარიშში სხვაობა ერთ ბურთამდე შეამცირა, ხოლო მალე ჩადუნელმა დუბლი მიითვალა და თანაფარდობა აღადგინა. შეხვედრის ძირითადი დრო 3:3 დამთავრდა, ხოლო დამატებით დროში პსპ სპარტაკ ლომიძემ დააწინაურა, თუმცა ჩადუნელმა ჰეთ-თრიქი მიითვალა და მოგებულის გამოსავლენად პენალტების სერია გახდა საჭირო.

პსპ-მ პენალტების სერიაში 2:0 გაიმარჯვა - თავისი შანსი აფციაურმა და ნიკა კოპლატაძემ გამოიყენეს, თორნიკე მაჭავარიანსა და ჩადუნელს კი პსპ-ს მეკარემ აჯობა. 

მეორე შეხვედრაში ილიაუნი არმიას შეხვდა. მატჩში ანგარიში არმიელმა ირაკლი ლატარიამ გახსნა. გიორგი მამულაშვილმა საპასუხო გოლი გაიტანა, მაგრამ მალე  ნიკა უგრეხელიძემ არმია ისევ წინ გაიყვანა. თუმცა, შესვენებამდე თავი ბექა ონიანმა გამოიჩინა და პირველი ტაიმი ფრედ დასრულდა - 2:2. შეხვედრის მიწურულს  მამულაშვილმა მოწინააღმდეგის კარი კიდევ ერთხელ აიღო და ილიაუნი 1/2-ფინალში გავიდა, სადაც პსპ-ს დაუპირისპირდება. კავკასიის საერთაშორისო უნივერსიტეტმა თელასი-ჯორჯიანსი ანგარიშით 6:3 დაამარცხა. კსუ-მ პირველი ტაიმი 3:0 მოიგო გიორგი ღავთაძის დუბლისა და ბექა ბექაურის გოლის წყალობით.

შესვენების შემდეგ, ღავთაძემ თავის ანგარიშზე ჰეთ-თრიქი ჩაიწერა, რასაც თელასი-ჯორჯიანსმა შოთა ჯანუყვაძის მიერ გატანილი პენალტით უპასუხა. ამას ჯანიკო გიორგაიას გოლი მოჰყვა და თელასმა ანგარიშში სხვაობა ორ ბურთამდე შეამცირა. თუმცა, კსუ ისევ გააქტიურდა და გოლი ჯერ კახა მაისაიამ გაიტანა, შემდეგ კი გიორგი ღავთაძემ. დარჩენილ დროში თელასის შემადგენლობიდან თავი კვლავ გიორგაიამ გამოიჩინა, რომლის გუნდი თასის გათამაშებას დაემშვიდობა. 

სათამაშო დღის ბოლოს ფუტსალის ლიგის გათამაშების ლიდერი თსუ ევროპის უნივერსიტეტს შეხვდა და 6:0 დაამარცხა. პირველი ტაიმი გატანილი გოლების გარეშე დასრულდა, არადა, თსუ-ს ანგარიშის გახსნა შეეძლო, მაგრამ თბილისელთა მეკარემ, ალი ასლანმა პენალტი ვერ გამოიყენა - მისი ძლიერი დარტყმის შემდეგ ბურთი კარის ძელს ზემოდან გადაცდა. 

მეორე ტაიმის დაწყებიდან დიდი დრო არ გასულა, რომ თსუ დაწინაურდა - გოლი გიორგი ქურდაძემ გაიტანა. ანგარიში ორამდე მიხეილ თევზაძემ გაზრდა, რასაც ვანო ბექაურისა და გიორგი ჭოხონელიძის გოლები მოჰყვა. თანაგუნდელებს მხარი კარგად აუბა გიორგი ჩიმაკაძემ, რომელმაც დუბლი მიითვალა. თსუ 1/2-ფინალში კსუ-ს დაუპირისპირდება.