11 გატანილი ბურთი 3 მატჩში, არცერთი ფრე და ნომინალური სტუმრების 3 გამარჯვება - ასეთი გახლდათ ფუტსალის ლიგის მეცხრე ტური, რომელიც 16 აპრილს თბილისის ოლიმპიურ სასახლეში ჩატარდა. ამ ტურის დღემ ცხრილში ორი ცვლილება განაპირობა... თუმცა, სჯობს თანმიმდევრობას მივყვეთ.

მეცხრე ტური ლიდერთა ჯახით გაიხსნა, თბილისი თსუ-ს დაუხვდა. ამ ტურამდე თსუ-ელები 6 ქულიანი ფორით ლიდერობდნენ და მორიგი გამარჯვებით ფორა გაზარდეს. დაძაბული მატჩი თბილისის უპირატესობით დაიწყო, მაგრამ უნივერსიტეტელები პირველივე შანსის გამოყენებით დაწინაურდნენ, მე-9 წუთზე გიორგი ჩიმაკაძემ ანგარიში გახსნა. გაშვებული გოლის შემდეგ თბილისელებმა მეტოქეზე ზეწოლა გააძლიერეს, მაგრამ ამას შედეგი არ მოჰყოლია. პირიქით, მეორე ტაიმის სტარტზე, იმავე ჩიმაკაძემ თსუ-ს უპირატესობა ორამდე გაზარდა. თბილისი კვლავ შეეცადა მეტოქის კარის დალაშქვრას, მაგრამ გოლი დაუგვიანდა. მატჩის დასრულებამდე ორწუთნახევრით ადრე ჩიმაკაძემ ჰეთ-ტრიკი გაიფორმა. 16 წამში კი პრესტიჟის გოლით, ნიკოლოზ გაბრიჩიძემ საბოლოო ანგარიში - 1:3 დააფიქსირა.

ცხრილში პირველი ცვლილება ტურის რიგით მეორე მატჩმა დააფიქსირა, რომელშიც ილიაუნი თელასი-ჯორჯიანსს დაუპირისპირდა. პირველი ტაიმის ანგარიში, თამაშის საბოლოო შედეგი გამოდგა. სტუმართაგან შოთა თოფურიამ მე-5 წუთზე პირველი გაიტანა, მეორე გოლი კი, მე-13 წუთზე ვახტანგ ჯვარაშვილის ანგარიშზეა. ილიაუნელებს გოლის გატანის საუკეთესო შანსი მეორე ნახევარში ჰქონდათ, მაგრამ საბა მაჩიტიძემ 7-მეტრიანი ვერ გაიტანა. 2:0 მოგებით თელასი-ჯორჯიანსმა ერთი ქულით გაუსწრო თბილისს, ცხრილში ადგილი გაუცვალა და მეორე საფეხურზე აღზევდა.

კავკასიის საერთაშორისო უნივერსიტეტის დამარცხებით, მეხუთედან მეოთხე ადგილზე გადაინაცვლა პსპ-მ. მეტოქეებმა პირველ ტაიმში თითო გოლი გაცვალეს. პსპ-ელებმა მატჩის სტარტზე 7-მეტრიანი ვერ გამოიყენეს, მაგრამ მე-9 წუთზე გიორგი აფციაურის გოლით დაწინაურდნენ. 7 წუთში გიორგი ღავთაძემ წონასწორობა აღადგინა. მატჩის ბოლომდე 6 წუთით ადრე, სტუმრებმა გიორგი ზენტუროვისა და ნიკა ხარატიშვილის თითო გოლით, პსპ-ს ორბურთიანი უპირატესობა შეუქმნეს. კავკასიელებმა ამას მხოლოდ ერთით უპასუხეს - თამაშის დასრულებამდე 6 წამით ადრე ლაშა სიგუნავამ გატანილი ბურთით, ტაბლოზე საბოლოო შედეგი - 2:3 დაფიქსირდა.