ფუტსალის თასის ფინალში ილიაუნი და კსუ იასპარეზებენ

უკვე გადაწყვეტილი ამბავია, ფუტსალის თასს ახალი მფლობელი ეყოლება. წელს თასს სტუდენტთა ორი გუნდიდან (ილიაუნი და კავკასიის საერთაშორისო უნივერსიტეტიტი), ერთ-ერთი აღმართავს. თასის მოქმედი მფლობელი თსუ, რომელიც ასევე მოქმედი ჩემპიონი და ცხრილის ამჟამინდელი ლიდერია, ფინალში ვერ გავიდა. ნახევარფინალი მეორე ფავორიტისთვისაც უიღბლო გამოდგა. ფუტსალის ლიგის ამჟამინდელი ცხრილის მიხედვით, მხოლოდ ერთქულიან ილიაუნთან, 10-ქულიანი პსპ ფავორიტად მიიჩნეოდა, მაგრამ ფავორიტები დამარცხდნენ.

პსპ-ელები მატჩის სტარტზევე შეეცადნენ მეტოქის კარის აღებას, მაგრამ ილიაუნმა მეტოქის შეცდომით ისარგებლა და ბექა ონიანმა მეორე წუთზე გახსნა ანგარიში. პსპ ამას არ შეეგუა და ორიოდე წუთში ლევან სვანიძემ ანგარიში გაათანაბრა, 1:1. შესვენებამდე ორივე გუნდს შეეძლო ანგარიშის შეცვლა, მოწინააღმდეგეებმა ორ-ორი რეალური საგოლე მომენტი ვერ გამოიყენეს. მეორე ტაიმში პსპ-მ მეტოქის პრესინგი გააგრძელა, მაგრამ ისევ ილიაუნმა იმარჯვა და 24-ე წუთზე ბექა ონიანმა სტუდენტები დააწინაურა, 1:2. დარჩენილ დროში პსპ-ელები მატჩის გადარჩენას შეეცადნენ, მაგრამ ანგარიში აღარ შეცვლილა.

უფრო დრამატული აღმოჩნდა თსუ-სა და კსუ-ს დაპირისპირება. კავკასიელი სტუდენტები მე-5 წუთზე, გიორგი ღავთაძის გოლით დაწინაურდნენ. თსუ-მ მეტოქეზე ზეწოლა გააძლიერა, მაგრამ გოლი დაუგვიანდა და გიორგი ჩიმაკაძემ მხოლოდ მე-14 წუთზე აღადგინა წონასწორობა, 1:1. ტაიმის ბოლოსწინა წუთზე იმავე გიორგი ღავთაძემ კსუ წინ გაიყვანა, 2:1. მეორე ტაიმი კვლავ დაძაბულად წარიმართა. კსუ-ელები საიმედოდ იცავდნენ თავს და თსუ-მ მხოლოდ 37-ე წუთზე შეძლო ანგარიშის გათანაბრება - გიორგი ქურდაძემ სტატუს-კვო აღადგინა, 2:2. ზოგი იფიქრებდა კიდეც, რომ თამაში დამატებით დროში გადაიზრდებოდა, მაგრამ მატჩის დასრულებამდე 46 წამით ადრე ლევან კობაიძის გოლმა, ფუტსალის ლიგის დებიუტანტი კსუ ფინალში გაიყვანა, სადაც ტიტულისთვის ილიაუნს დაუპირისპირდება.