ფუტსალის ლიგის მეათე ტურს, სატურნირო ცხრილში ცვლილებები არ მოჰყოლია. ტიტულოვანმა თსუ-მ თასის ნახევარფინალის შემდეგ, კვლავ ვერ მოიგო და ცხრილს, 8-ის ნაცვლად 6-ქულიანი უპირატესობით ლიდერობს. თელასი ჯორჯიანსმა მეორე ადგილი გაიმყარა. მესამეზე დაქვეითებულ თბილისს კი პსპ მიუახლოვდა და 6-ის ნაცვლად, 3 ქულით ჩამორჩება... აღსანიშნავია ისიც, რომ უხვგოლიან მეათე ტურში დუბლიც იყო, ჰეთ-ტრიქიც და პოკერიც.

ფუტსალის თასის ნახევარფინალში მოქმედი ჩემპიონი და თასის ბოლო გამარჯვებული თსუ გათამაშებას სწორედ კსუ-მ გამოთიშა. შესაბამისად თსუ-ელებისგან მეათე ტურში ყველა რევანშს ელოდა და მატჩიც ამ სცენარით დაიწყო. მე-7 და მე-8 წუთზე, შესაბამისად დავით გეგეშიძემ და მიხეილ თევზაძემ ცხრილის ლიდერი დააწინაურეს და პირველი ტაიმის შემდეგ, შესვენებაზე თსუ ორბურთიანი ფორით გავიდა. მეორე ტაიმის სტარტზე კახაბერ მაისაიამ ანგარიშში სხვაობა შეამცირა. თუმცა, წუთნახევარში მურთაზ კაკაბაძემ თსუ-ს ორბურთიანი ჰანდიკაპი აღადგინა, 3:1. კავკასიელი სტუდენტები თამაშის გადარჩენას შეეცადნენ და ეს გამოუვიდათ კიდეც, კახაბერ მაისაიამ 36-ე და 37-ე წუთებზე მიჯრით გაიტანა. მაისაიამ ჰეთ-ტრიქი გაიფორმა და საკუთარ გუნდს ერთი ქულა მოუპოვა.

თელასი-ჯორჯიანსისა და თბილისის დაპირისპირებაში გამარჯვებული, ცხრილში მეორე ადგილზე გაიმყარებდა პოზიციებს. თბილისელები წინა ტურში მარცხის მერე რეაბილიტაციას შეეცადნენ, მაგრამ ამ ბრძოლაში თელასელებმა გაიმარჯვეს. ავთანდილ ასათიანის ბიჭები სტარტზევე დაეუფლნენ თამაშის სადავეებს. ის-ის იყო თბილისმა თამაში გაათანაბრა, რომ თელასელებმა მეტოქის შეცდომით ისარგებლეს და მე-11 წუთზე ვახტანგ ჯვარაშვილმა ანგარიში გახსნა. 4 წუთში ჯანიკო გიორგაიამ სხვაობა გააორმაგა, 2:0. თბილისელებიც ცდილობდნენ მოწინააღმდეგის კარის აღებას, მაგრამ უშედეგოდ და მეორე ტაიმამდე ანგარიში აღარ შეცვლილა. შესვენების შემდეგ, საწყისი 15 წუთი  მშრალად წარიმართა, ბოლო 5 წუთში კი იმავე ჯვარაშვილმა კიდევ სამი გოლის გატანით, პოკერი შეასრულა, ლიგის ბომბარდირთა ცხრილს 13 გოლით სათავეში ჩაუდგა და თელასს 5:0 მოაგებინა.

ცხრილის მიხედვით, პსპ-ილიაუნის დაპირისპირებაში ფავორიტად ფარმაცევტებს მიიჩნევდნენ და თამაშიც ამ სცენარით წარიმართა. ლევან სვანიძემ მე-8 წუთზე გახსნა ანგარიში, 6 წუთში გიორგი ზენტუროვმა გაიტანა და ტაიმიც 2:0 დასრულდა. მეორე ტაიმის სტარტზე, ილიაუნიდან გიორგი თოლორდავამ ერთი ბურთი გაქვითა. ბოლოს კი პსპ-ელმა გიორგი აფციაურმა დუბლი გაიფორმა და ფარმაცევტებმა 4:1 იმარჯვეს.