მეთერთმეტე ტური | თბილისი მეორე ადგილს მიუახლოვდა

ფუტსალის ლიგის მეთერთმეტე ტურს გუნდების განლაგება არ შეუცვლია, თუმცა, ცხრილში ვითარება დაიძაბა. გარდა ამისა, საგულისხმოა მეკარეთა გამორჩეული თამაში და დღის ბოლოს გოლებით დახუნძლული მესამე მატჩი. თამამად შეიძლება ითქვას, რომ ასეთი თამაშები ფუტსალის ლიგის დონის პროგრესის მაჩვენებელია.


ეს ტური ილიაუნისა და თბილისს შორის დაპირისპირებით გაიხსნა. თბილისელებმა მეტოქეს მიმდინარე სეზონის ორივე შეხვედრა მოუგეს. თუმცა, ილიაუნელებმა აქტიურად დაიწყეს თამაში და მეტოქეს აგრძნობინეს, რომ იოლად არაფერს დათმობდნენ. სტუდენტებს ანგარიშის გახსნაც შეეძლოთ, მაგრამ ვერ შეძლეს. მეტოქეებმა არაერთი საგოლე მომენტი გაცვალეს. თუმცა, ტაიმი უგოლოდ დასრულდა და ეს ორივე გუნდის მეკარის, თბილისელთა ბექა გოქსაძისა და ილიაუნელთა ნიკოლოზ ფხაკაძის დამსახურებაა. მეტიც, გიორგი დიაკვნიშვილის გასროლილ პენალტს სწორედ ფხაკაძე გადაეფარა. მატჩის ორივე გოლი თბილისმა მატჩის მიწურულს გაიტანა და ზედიზედ ორი წაგების შემდეგ მოგების გემო გაიხსენა. 30-ე წუთზე თამაზ გოგსაძემ მახვილი კუთხიდან გახსნა ანგარიში. ზუსტად წუთში კი ნიკოლოზ გაბრიჩიძემ თბილისს 2:0 მოაგებინა.


მეორე შეხვედრაში თელასი-ჯორჯიანსმა, ზედიზედ ორი გამარჯვების შემდეგ, კავკასიის საერთაშორისო უნივერსიტეტის გუნდი მიიღო. კავკასიელები 35-ე წამზე შოთა თოფურიას სწრაფი გოლით დაწინაურდნენ. ამის შემდეგ ხიფათი ორივე კართან არაერთი შეიქმნა, მაგრამ ანგარიში მხოლოდ მეორე ტაიმში შეიცვალა. შესვენების შემდეგ, კავკასიელებმა შოთა ჭანუყვაძის გოლით, სხვაობა გაზარდეს, 0:2. თუმცა, თელასმა მალევე უპასუხა, 24-ე წუთზე ამირან ცხომარიამ მინიმუმამდე შეამცირა სხვაობა. 4 წუთში ჭანუყვაძემ დუბლი შეასრულა და ორბურთიანი ჰანდიკაპი აღადგინა. თელასელები მატჩის გადარჩენას შეეცადნენ, მაგრამ კავკასიელებმა საიმედოდ შეინახეს კარი და თამაშის მიწურულს ერთიც გაიტანეს.  კსუ-მ გიორგი ღავთაძის გოლით 4:1 იმარჯვა.


ტურის ბოლო მატჩი დრამატულობითა და სანახაობრიობით, უდავოდ გამორჩეული იყო. ამაზე ისიც მეტყველებს, რომ სტუმარ-მასპინძელმა ჯამში 10 გოლი გაიტანა. წინა ტურში ნათამაშები ფრის შემდეგ, ცხრილის ლიდერმა თსუ-მ ზედიზედ ორგზის მოგებულ პსპ-ს უმასპინძლა. მეტოქეებმა პირველ ტაიმში თითო გოლი გაცვალეს - მე-7 წუთზე თსუ-ელთა გიორგი ჭოხონელიძემ გახსნა ანგარიში, 5 წუთში კი გიორგი აფციაურმა წონასწორობა აღადგინა. მეორე ტაიმის საწყის წუთში თსუ მეორედ დაწინაურდა, გოლით გიორგი ჩიმაკაძე გამოირჩა, 2:1. ორიოდე წუთში ნიკა ხარატიშვილმა გაათანაბრა, 2:2. დავით გეგეშიძემ პსპ-ს მალევე უპასუხა, 3:2, 33-ე წუთზე გიორგი ჭოხონელიძემ სხვაობა გააორმაგა, 4:2. რამდენიმე წამში დავით გეგეშიძემ გარდამტეხი გოლი გაიტანა, 5:2. ექვს წუთში 3 ბურთიანი სხვაობის გაქვითვა ცხრილის ლიდერთან ძალზე ძნელი იყო და ამან ფარმაცევტები ფსიქოლოგიურად გატეხა, თსუ-მ კი, გოლაობა გაგრძელა. გეგეშიძემ მეტოქის 5 ჯარიმის გამო, პენალტით ჰეთ ტრიქი შეასრულა, რასაც ლევან სვანიძის საპასუხო გოლი მოჰყვა. ბოლოს კი ვანო ბექაურმა საბოლო შედეგით, 7:3 თსუ-ს მოგება დააფიქსირა.