ფუტსალის თასის ფინალმა კიდევ ერთხელ დაამტკიცა, რომ თასის გათამაშება რეგულარული სეზონისგან განსხვავდება. თასის ფინალში ერთმანეთს ილიაუნი და კსუ დაუპირისპირდნენ. რეგულარული სეზონის გათვალისწინებით, კავკასიელები ფავორიტად მიიჩნეოდნენ. ბოლოადგილოსანი და ერთადერთი ქულის მქონე ილიაუნის გამარჯვებას, მესამე ადგილზე აღზევებულ კსუ-სთან ბევრი ვერ იფიქრებდა. მით უმეტეს, მიმდინარე სეზონში ამ გუნდების სამივე დაპირისპირება კავკასიელებმა მოიგეს, თანაც დიდი ანგარიშებით (4:1, 6:2, 6:2).

მოკლედ, ფუტსალის თასის სტუდენტური დერბი, საშუალო ტემპში დაიწყო და ნელ-ნელა გახურდა. ილიაუნმა მატჩის სტარტზევე დააპრესინგა მეტოქე და მოწინააღმდეგის კარს არაერთი დარტყმით დაემუქრა. ლევან კობაიძის ბიჭებიც არ ყოფილან უქმად. მათ ჯერ ბურთზე კონტროლი მოიპოვეს, შემდეგ კი იერიშებით ზეწოლა მოახდინეს მეტოქეზე. ილიაუნელები საკუთარი კარის უსაფრთხოებაზე გადაერთვნენ, კონტრშეტევებზე გააკეთეს აქცენტი და მოთმინებით ელოდნენ ბურთის გატანის საკუთარ შანსს. ნიკოლოზ მანგოშვილს, გიორგი ღავთაძესა და მეკარე დავით ჯინჭარაძეს კსუ-ს დაწინაურება შეეძლოთ, მაგრამ, მათ ძლიერ დარტყმებს ილიაუნელთა მეკარე ნიკოლოზ ფხაკაძე გადაეფარა. ილიაუნის საბა მაჩიტიძისა და ნიკა გვაზავას დარტყმები კი მცირედით ასცდა მიზანს. შედეგად, პირველი ნახევარი უგოლოდ დასრულდა.

მეორე ტაიმიც იგივე სცენარით წარიმართა და ილიაუნის მიერ არჩეულმა ტაქტიკამ შედეგი გამოიღო. 23-ე წუთზე საკუთარ შანსზე ჩასაფრებული ილიაუნის დროც დადგა. კავკასიელთა მეკარემ ლაშა კურტანიძის პირველი დარტყმა კი მოიგერია, მაგრამ მისი მეორე გასროლისას უძლური აღმოჩნდა და ილიაუნი დაწინაურდა. გოლის შედეგად თამაშის ტემპმა და დაძაბულობამ იმატა. კსუ გააქტიურდა და მონდომებით შეეცადა ანგარიშის გათანაბრებას, მაგრამ მეკარე ნიკოლოზ ფხაკაძემ ილიაუნი არაერთხელ გადაარჩინა. თავის მხრივ, ილიაუნელებსაც ჩინებული შანსი ჰქონდათ, 34-ე წუთზე, საკუთარი ნახევრიდან გიორგი თოლორდავას დარტმისას, ბურთი სანტიმეტრებით ასცდა კავკასიელთა ცარიელ კარს. მალევე, კახაბერ მაისაიას დარტმისას, ილიაიუნელები ძელმა იხსნა. ბოლო წუთზე ღავთაძის დარტყმისას, ილიაუნის მეკარე ფხაკაძემ მეტად რთული ბურთი მოიგერია. საბოლოოდ, ილიაუნელებმა, როგორც იტყვიან, დანის პირზე გაიარეს, ლაშა კურტანიძის მიერ გატანილი ბურთი ერთადერთი აღმოჩნდა და ფუტსალის თასი ილიაუნმა მოიპოვა.