ფუტსალის ლიგის რეგულარული სეზონის ბოლო ტური დრამატული გამოდგა. ამ ტურს უნდა გაერკვია პლეი-ოფის წყვილები, უფრო კონკრეტულად კი თსუ-სა და თელასის მეტოქეები. საგულისხმოა ის, რომ დასკვნით ტურში პირველად დამარცხდა ლიდერი და აუტსაიდერმა კი სეზონის პირველი გამარჯვება მოიპოვა.

პირველ მატჩში კსუ-მ თსუ-ს უმასპინძლა და ორი განსხვავებული ტაიმი ვიხილეთ. აქამდე კავკასიელებს ზედიზედ 4 მატჩი ჰქონდათ მოგებული და თუ ამჯერადაც მოიგებდნენ, პლეი-ოფის საგზურს მოიპოვებდნენ. დაძაბულობის ფონზე გოლი დაგვიანდა, მე-8 წუთზე მურთაზ კაკაბაძემ თსუ დააწინაურა, მაგრამ სამ წუთში ნიკა მანგოშვილმა წონასწორობა აღადგინა - 1:1. კიდევ სამ წუთში დავით გეგეშიძის ზუსტი დარტყმით, თსუ ისევ წინ გავიდა. მეორე ტაიმში კავკასიელებმა აქტიურად შეუტიეს და გიორგი ღავთაძემ ანგარიში გაათანაბრა - 2:2. თამაში კიდევ უფრო  საინტერესო გახდა, მატჩის მიწურულს კი სამი გოლი გავიდა. 31-ე წუთზე, გეგეშიძემ დუბლი შეასრულა და კიდევ ერთხელ დააწინაურა თავისი გუნდი, მაგრამ ერთ წუთში ღავთაძემ დუბლი მიითვალა და ტაბლოზე ისევ ფრე დაფიქსირდა - 3:3. რამდენიმე წამში მანგოშვილის ჯერი დადგა, მანაც დუბლი შეასრულა, კავკასიელებმა 4:3 სძლიეს აქამდე დაუმარცხებელ თსუ-ს და პლეი-ოფში თელასი-ჯორჯიანსს დაუპირისპირდებიან.

უფრო დრამატული მეორე მატჩი გამოდგა, რომელშიც თბილისი თელასი-ჯორჯიანსს დაუპირისპირდა. მეექვსე და მეშვიდე წუთზე ამირან ცხომარიამ და შოთა თოფურიამ თითო ბურთი გაიტანეს და თელასი ორბურთიანი ფორით დაწინაურდა. მე-16 წუთზე გიორგი ივანიშვილმა ერთი ბურთი გაქვითა. მეორე ტაიმშიც დაძაბული ბრძოლა ვიხილეთ, მაგრამ გოლები მოგვიანებით გავიდა. 29-ე წუთზე ბაკურ გულუამ აღადგინა წონასწორობა, ერთ წუთში კი ივანიშვილმა თბილისი წინ გაიყვანა, 3:2. თერთმეტ წამში თოფურიამ დუბლით დაათანაბრა - 3:3. ექვს წუთში კი თამაზ გოგსაძემ კიდევ ერთხელ დააწინაურა თბილისი, 4:3. თელასმა ბოლომდე იბრძოლა და გუნდის თავკაცმა ავთანდილ ასათიანმა 38-ე წუთზე გაიტანა, 4:4 დააფიქსირა და ილიაუნი-პსპ-ს მატჩს ინტრიგა შეუნარჩუნა.

ფუტსალის თასის მოპოვებამ, ილიაუნელები აშკარად მადაზე მოიყვანა. ამას გარდა, აქამდე მოუგებლად მოასპარეზე ილიაუნს, რეგულარული სეზონის ბოლოს მაინც უნდა ეზეიმა ერთადერთი გამარჯვება. მითუმეტეს, რომ ის ერთადერთი ქულა, სწორედ პსპ-სთან მოიპოვა. თავის მხრივ, ფარმაცევტებს პლეი-ოფში მოსახვედრად, მხოლოდ მოგება სჭირდებოდათ. მოკლედ, დრამატული მატჩის მოლოდინი იყო და გამართლდა კიდეც. სტუდენტებს მე-5 წუთზე ანგარიშის გახსნა შეეძლოთ, მაგრამ ასაშვილის დარტყმული მეკარემ მოიგერია, დამატებაზე მაჩიტიძემ კარს მცირედით ააცილა. თამაში სწრაფ ტემპში და ილიაუნის კონტროლით გაგრძელდა. თუმცა, მეორე მეოთხედიდან უკვე პსპ დომინირებდა, ილიაუნი კი კონტრშეტევებზე ელოდა თავის შანსს. პსპ-ს არაერთი შანსი ჰქონდა, მაგრამ ტაიმი უგოლოდ დასრულდა, რაც ილიაუნის მეკარე ალექსანდრე აბულაძის დამსახურებაა. იგი ორ-ორჯერ გოგიჩაიშვილის და ზუნტუროვის დარტყმებს გადაეფარა. მეორე ნახევარი პირველზე უკეთესი გამოდგა. ტაიმის სტარტზე პსპ-მ გოლის გატანის ორი შანსი ვერ გამოიყენა და დაისაჯა კიდეც. 23-ე წუთზე საბა მაჩიტიძემ, ანგარიში გახსნა. სტუდენტებს კიდევ ორი მომენტი ჰქონდათ, მაგრამ საღირაშვილი პირისპირ მეკარე ვეშაპიძეს ვერ გაუმკლავდა. მალევე პსპ-ს მეკარე ვეშაპიძემ იბრაგიმოვის დარტმული მოიგერია. შემდეგ ფარმაცევტების ჯერი დადგა, მაგრამ მათ შეტევების დასრულება უჭირდათ. თავად განსაჯეთ, კვირკველიას, აფციაურსა და ლომიძეს თითოჯერ, ხოლო კოპლატაძეს სამჯერ შეეძლოთ ანგარიშის გათანაბრება. სტუდენტების მეკარე აბულაძემ გოგიჩაიშვილის დარტყმული სასწაულებრივად მოიგერია. პსპ შეტევაში გაერთო, ილიაუნელებმა მათი იერიში ჩაჭრეს და 36-ე წუთზე ომარ ასაშვილმა საკუთარი საჯარიმოდან, პსპ-ს ცარიელ კარში გაიტანა, 2:0. ფარმაცევტებმა მეტად მოინდომეს და მატჩის დასრულებამდე წუთნახევრით ადრე, გოგიჩაიშვილმა ერთი ბურთი გაქვითა. ბოლო წუთზე მეკარე აბულაძემ,  საკუთარი საჯარიმოდან, უმეთვალყურეოდ დარჩენილ კარში გაუტანა პსპ-ს - 3:1. ილიაუნმა სეზონში პირველად მოიგო. ამ მოგებამ კი თბილისი პლეი-ოფში თსუ-ს მეტოქე გახადა.