ფუტსალის ლიგაში პლეი-ოფის პირველი მატჩები გაიმართა

ფუტსალის ლიგის პლეი-ოფის სტარტზე, სტუდენტების ორივე გუნდმა იმარჯვა და ფინალური საგზურისთვის ბრძოლაში დაწინაურდა. პირველი ტურის მატჩებმა მოლოდინი გაამართლა და ოლიმპიურ სასახლეში შეკრებილმა ქომაგებმა, მართლაც პლეი-ოფის დონის სანახაობა იხილეს - ბრძოლა, თავდადება და სანახაობრივი თამაში. ყოველივე ამის გვირგვინი კი გოლების ფოიერვერკი გახლდათ - 13 გოლი ერთ თამაშში, ასეთი რამ ნამდვილად იშვიათობაა.

დღის პირველ მატჩში, ფუტსალის რეგულარული სეზონის პირველადგილოსანი თსუ მეოთხეზე გასულ თბილისს დაუპირისპირდა. უნივერსიტეტელებმა პირველივე მომენტი გოლად აქციეს და 27-ე წამზე გიორგი ქურდაძემ ანგარიში გახსნა - 1:0. ამის შემდეგ, თამაში სტუდენტების უპირატესობით წარიმართა. მათ არაერთი საგოლე მომენტი შექმნეს და უფრო დიდი უპირატესობის მოპოვებაც შეეძლო, მაგრამ თბილისის მეკარე ბექა გოქსაძემ თითქმის ყველა შემთხვევაში საიმედოდ ითამაშა. სწორედ გოქსაძის დამსახურებაა ის, რომ 38-ე წუთამდე, თბილისს თამაშის გადარჩენის პრაქტიკული შანსი ჰქონდა. ქურდაძის, ჩიმაკაძის, კაკაბაძისა და ქურცაძის დარტყმებს, სწორედ მეკარე გოქსაძე გადაეფარა. თუმცა, მატჩის დასრულებამდე ორი წუთით ადრე, მურთაზ კაკაბაძის დარტყმისას, გოქსაძე უძლური აღმოჩნდა - 2:0. რა თქმა უნდა, გოლის გატანას თბილისიც ცდილობდა, მაგრამ გუნდს შეტევების დასრულება უჭირდა. თბილისელებმა მეტოქის წითელი ბარათით გამოწვეული, ორწუთიანი რიცხობრივი უპირატესობაც ვერ გამოიყენეს. 

თსუ-ს გამარჯვების შემდეგ, მესამე ადგილოსანმა კსუ-მ შეძლო ის, რაც აქამდე ვერავინ მოახერხა - მეორე ადგილოსან თელასი ჯორჯიანსს 9 ბურთი გაუტანა. თელასის კარში პირველი გოლი გიორგი ღავთაძემ გაიტანა და ამ მატჩში გატანილი 5 გოლით ბენეფისი მოიწყო. მე-7 წუთზე ღავთაძემ ჯორჯიანსელთა კარის ბადე მეორედ შეარხია. ამის შემდეგ, ავთანდილ ასათიანის გუნდმა აქტიურად შეუტია, კავკასიელებმა კი კარის უსაფრთხოებაზე გააკეთეს აქცენტი და კონტრშეტევაზე გადაერთვნენ. სტუდენტების ამ ტაქტიკამ გაამართლა კიდეც. თავისი შანსი ბექაურმა (12 წთ.) და მანგოშვილმა (14 წთ.) გამოიყენეს და კსუ-მ დიდი უპირატესობა მოიპოვა - 0:4. რამდენიმე წამში, ცხომარიამ ერთი ბურთი გაქვითა - 1:4 და ეს შედეგი მეორე ტაიმამდე აღარ შეცვლილა. თელასს შესვენების შემდეგაც არ შეუცვლია ტაქტიკა, ასათიანის ბიჭებმა კვლავ გოლებზე გააკეთეს აქცენტი და იერიშებისას, მათი კარი ხშირად ცარიელი რჩებოდა. ამით ჩინებულად ისარგებლა კსუ-მ და 24-ე წუთზე ჯინჭარაძემ ოთხბურთიანი ფორა აღადგინა - 1:5. ამის შემდეგ ჯორჯიანსელთა ჯერი დადგა, ჯვარაშვილი (27 წთ.) და ხეჩიკაშვილი (30 წთ.) თითო გოლით გამოირჩნენ და თელასმა სხვაობა ორ ბურთამდე შეამცირა (3:5). ამ დროს კსუ-ს 5 ჯარიმა დაუგროვდა და იყო შანსი ჯორჯიანსელებს მეორე ნიშნულის პენალტი მოეპოვებინათ, მაგრამ კავკასიელებმა კორექტულად გააგრძელეს თამაში და მეტოქეს სტანდარტი არ დაარტყმევინეს. მაშინ როცა ანგარიში 3:5 იყო, დაწყებული საქმის სათავისოდ დასაგვირგვინელად, ორივე გუნდს ლიდერი, ინიციატივის საკუთარ თავზე ამღები სჭირდებოდა. ამ ვითარებაში კავკასიელებს ლიდერად ღავთაძე მოევლინათ. კსუ-დს მეგოლე გიორგი ღავთაძემ, 36-ე წუთზე გატანილი ორი, ხოლო 38-ე წუთზე ერთი გოლით თელასელთა იმედებს წერტილი დაუსვა. შუალედში შოთა თოფურიამ ერთი გაიტანა. საბოლოო შედეგი ფარცვანიამ მატჩის დასრულებამდე ხუთიოდე წამით ადრე დააფიქსირა - 4:9.