ფუტსალის ლიგის ფლეი ოფის მეორე ტურში ორივე ფინალისტის ვინაობა გაირკვა. ფლეი ოფისთვის მოსალოდნელი დრამატულობა, ახლა უკვე პენალტების სერიამაც გაამდიდრა. თსუ-მ ამჯერადაც დაჯაბნა თბილისი და ფინალში დამსახურებულად გავიდა. თელასი ჯორჯიანსი კსუ-ს ამჯერად უკეთ ეთამაშა, მაგრამ ფრეზე მეტი ვერ შეძლო. პენალტების სერია კი კავკასიელებმა უკეთ შეასრულეს და ფინალში თამაშის უფლება მოიპოვეს. თბილისი და თელასი-ჯორჯიანსი კი, მესამე ადგილისთვის გააგრძელებენ ბრძოლას.

თბილისისა და თსუ-ს მატჩი ორი განსხვავებული ტაიმისგან შედგებოდა. შესვენებამდე სტუდენტებს ისეთი საგრძნობი უპირატესობა არ ჰქონიათ, როგორც მეორეში. თამაშის სტარტზე უნივერსიტეტელებიდან  გიორგი ქურდაძემ თბილისელთა კარის ძელი შეაზანზარა. შემდეგ კი თსუ საკუთარი კარის უსაფრთხოებაზე გადაერთო და უფრო კონტრშეტევაზე ელოდა თავიანთ შანსს. სტუმარ-მასპინძელს გოლის გატანის შესაძლებლობა  არაერთი ჰქონდათ. თსუ-ს კიპერი ბუკია, ახალაიას გასროლას ერთხელ, დიაკვნიშვილის დარტყმულს კი ორჯერ გადაეფარა. თბილისის კიპერმა გოქსაძემ კი კაკაბაძესა და ბექაურს არ გაატანინა. თუმცა, მე-15 წუთზე თსუ-ს მეგოლე ჩიმაკაძის წინაშე უძლური აღმოჩნდა და სტუდენტები დაწინაურდნენ - 0:1. თბილისს შესვენებამდე შეეძლო ანგარიშის გათანაბრება, მაგრამ დიაკვნიშვილმა მეკარე ბუკიას ვერ აჯობა. მეორე ტაიმის სტარტზე მეტოქეებმა ორ-ორი საგოლე მომენტი გააცუდეს, მერე კი სტუდენტების ჯერი დადგა. გიორგი ქურდაძემ საკმაოდ მახვილი კუთხიდან გაიტანა - 0:2. რამდენიმე წამში, ჩიმაკაძემ ქურდაძის დაწყებული კონტრიერიშით დუბლი მიითვალა - 0:3. მატჩის ბოლო წუთზე ჩიმაკაძემ მეტოქის იერიში მათივე საჯარიმოსთან შეწყვიტა და ბურთი ცარიელ კარში შეაგორა. ჩიმაკაძის ჰეთ თრიკს ქურდაძემ დუბლით აუბა მხარი, როცა მეკარისგან მიღებული გრძელი პასი, თავურით კარში გადაგზავნა - 0:5. თსუ ფინალში მშრალად გავიდა, თბილისმა სტუდენტებს ორ მატჩში გოლი ვერ გაუტანა.

კსუ-სა და თელასის დაპირისპირება უფრო დრამატული გამოდგა. ფლეი ოფის პირველი მატჩისგან განსხვავებით, ავთანდილ ასათიანის გუნდმა ამჯერად უფრო სოლიდურად ითამაშა. თუმცა, კავკასიელებიც არ იყვნენ უქმად. თავიდანვე უნდა ითქვას, რომ მატჩი გარდამავალი უპირატესობით წარიმართა და ლოგიკური ფრით დასრულდა. მე-4 წუთზე ანგარიში ჯორჯიანსელებმა გახსნეს. თავისივე წამოწყებული იერიშისას, ექიმაზაშვილმა გიორგაიას კარგი პასი დაუფასა და ასათიანის ბიჭები დაწინაურდნენ - 0:1. მალევე გიორგაიამ ანგარიშში სხვაობის გაორმაგების შანსი ვერ გამოიყენა. შემდეგ კი, ფუტსალის ლიგის ბომბარდირ გიორგი ღავთაძეს ორჯერ შეეძლო ანგარიშის გათანაბრება, მაგრამ მეკარეს ვერ აჯობა. კავკასიელთა კიპერმა კი ექიზაშვილს დუბლი არ შეასრულებინა და მე-11 წუთზე ნიკა მაგოშვილმა წონასწორობა აღადგინა. მიღებულმა გოლმა თელასი გააქტიურა, მათ მეტოქეზე ზეწოლა გააძლიერეს და ტაიმის ბოლო იხეირეს კიდეც. ჯერ იყო და კავკასიელთა მეკარე ჯინჭარაძემ, ექიზაშვილს არ გაატანინა, სამჯერ ჯვარაშვილის დარტყმულს გადაეფარა, მაგრამ ბოლო წუთზე ჩაწოდებული კუთხურისას, გიორგაიას თავურისას უძლური აღმოჩნდა და თელასი შესვენების წინ დაწინაურდა - 1:2. მეორე ტაიმი გარდამავალი უპირატესობით წარიმართა. ანგარიშის შეცვლა ორივე გუნდს შეეძლო, მაგრამ ერთადერთი გოლი გავიდა. 34-ე წუთზე ბექაურმა სამსვლიანი კომბინაცია დაგვირგვინა, 2:2. სცენარი და ანგარიში დარჩენილ დროშიც არ შეცვლილა და გამარჯვებულის გამოსავლენად პენალტების სერია გახდა საჭირო, რომელიც უკეთ კსუ-მ შეასრულა და მეტოქე ანგარიშით - 5:4 დაამარცხა