კსუ და თელასი დაწინაურდნენ

თბილისის ოლიმპიურმა სასახლემ პლეი-ოფის დასკვნითი რაუნდის პირველ მატჩებს უმასპინძლა. ჯერ ფინალისტები, თსუ და კსუ დაუპირისპირდნენ ერთმანეთს, შემდეგ კი თელასი ჯორჯიანსი, მესამე ადგილისთვის მატჩში თბილისს შეხვდა. თავიდანვე უნდა ითქვას, რომ კავკასიელებმა და თელასმა დამაჯერებლად იმარჯვეს და დამსახურებულად დაწინაურდნენ.

კავკასიელებმა რეგულარული სეზონის გამარჯვებული ორივე ტაიმში დაჯაბნეს. განსხვავება მხოლოდ ის იყო, რომ უპირატესობის მიუხედავად, პირველი ტაიმი უგოლოდ დასრულდა. საწყის 20 წუთში კსუ რომ ვერ გაიტანა ბურთი, თსუ-ს მეკარე თორნიკე ბუკიას დამსახურებაა. ფარცვანიასა და ჭანუყვაძის თითო დარტმულს სწორედ ბუკია გადაეფარა. მერე თავის ვიზავი ჯინჭარაძის დარტყმულიც მოიგერია და დამატებაზე ჭანუყვაძეს არ გაატანინა. ბუკიამ კიდევ ერთხელ გაწბილა ჭანუყვაძე, ღავთაძეს კი ძლიერად დარტყმული აუღო. თავის მხრივ თსუ-ც უტევდა, მაგრამ კავკასიელებს უკეთესი და მეტი საგოლე მომენტი ჰქონდათ... სურათი მეორე ტაიმშიც არ შეცვლილა, კსუ-მ მეტოქეზე ზეწოლა გააძლიერა. კავკასიელთა კიპერი ჯინჭარაძეც ხშირად ერთვებოდა შეტევებში და გოლის გატანასთანაც ახლოს იყო. 27-ე წუთზე მანგოშვილმა თავისსავე წამოწყებული კონტრშეტევა გოლით დააგვირგვინა - 0:1. თსუ მატჩის გადარჩენას შეცადა, მაგრამ მათ გარჯას შედეგი არ მოჰყოლია. 39-ე წუთზე ღავთაძემ მოწინააღმდეგის გადაცემა ჩაჭრა, ორი მეურვე ჩამოიშორა და მისი ჩინებული პასი სიგუნავამ გოლად აქცია - 0:2. რამდენიმე წამში კავკასიელთა მეკარე ჯინჭარაძემ, თსუ-ელთა თავური მოიგერია, ღავთაძემ კი საკუთარი საჯარიმოდან გაიტანა და მატჩიც ამ შედეგით - 0:3 დასრულდა.

ფინალური სერიის პირველ მატჩზე უფრო სანახაობრივი და გოლებით დახუნძლული მე-3 ადგილისთვის მატჩი გამოდგა. თელასი-ჯორჯიანსმა უპირატესობა პირველივე წუთებიდან მოიპოვა და უკვე 6 წუთში სოლიდური უპირატესობით იგებდა. მე-4 წუთზე თელასმა ორი ბურთი გაიტანა და ორივე კუთხურიდან. ანგარიში ჯვარაშვილმა გახსნა, ხეჩიკაშვილმა კი სხვაობა გააორმაგა. ორ წუთში თოფურიას პასით გიორგაიამ თავურით გაიტანა - 3:0. თბილისი შეტევებზე გადაერთო და იერიშებში მეკარეც ჩართო და მე-8 წუთზე დიაკვნიშვილმა სხვაობა შეამცირა - 3:1. თუმცა, ორ წუთში ცხომარიამ სამბურთიანი უპირატესობა აღადგინა - 4:1. პირველი ტაიმის დარჩენილ დროში თბილისს ანგარიშის გათანაბრების შანსიც ჰქონდა, მაგრამ გოგოხიას დარტყმული ჯორჯიანსელთა კიპერმა მოიგერია, ივანიშვილის გასროლა კი მცირედის ასცდა მიზანს. თუმცა, ტაიმის ბოლოს გოგოხიამ ერთი ბურთი გაქვითა - 4:2. პირველის მსგავსად, თელასი მეორე ტაიმშიც 5 მოთამაშით უტევდა. თბილისის კიპერმა გოქსაძემ ასათიანის დარტყმული მოიგერია, მაგრამ თოფურიას გასროლისას ბურთი ხელში ვერ შეიმაგრა და დამატებაზე ცხომარიამ შეაგდო - 5:2. ოთხ წუთში ჯვარაშვილმა თელასის ფორა გაზარდა - 6:2. თბილისიდან ერთი ბურთი ახალაიამ გაქვითა და ჯორჯიანსელებმა 6:3 მოიგეს.