ფუტსალის ლიგის პლეი-ოფში მესამე ადგილისთვის ბრძოლა დასრულდა. თელასი ჯორჯიანსმა თბილისი ზედიზედ მეორედ დაამარცხა და მესამე ადგილი დამსახურებულად მოიპოვა. ჩემპიონობისთვის ბრძოლა კიდევ უფრო დაიძაბა. ფინალურ რაუნდში, რომელიც სამი მოგებისგან შედგება, ამჯერად თსუ-მ  იმარჯვა და კსუ-სთან ანგარიში გაათანაბრა - 1:1.

მატჩის სტარტზე კავკასია უკეთესად თამაშობდა, მაგრამ სიგუნავასა და ღავთაძის დარტყმებს შედეგი არ მოჰყოლია, თსუ-დან კი თევზაძემ გაისროლა. ტაიმის შუაწელს თსუ მატჩის სადავეებს დაეუფლა და კავკასიელებიც ნელ-ნელა თავდაცვაზე გადაეწყვნენ. მე-12 წუთზე კსუ-ს კიპერი ჯინჭარაძე ქურცაძის დარტყმულს გადაეფარა, დამატებაზე კი, ქურდაძემ კარს ააცილა. მე-17 წუთზე ქურცაძემ კავკასიელთა იერიში ჩაჭრა კაპანაძესთან კედელი გაითამაშა და ანგარიში გახსნა. დარჩენილ დროში, თსუ-ს უპირატესობის გაზრდის არაერთი შანსი ჰქონდა. ჯერ იყო და ჩიმაკაძეს, მეკარე ჯინჭარაძემ არ გაატანინა, ქურცაძის დარტყმისას კი ღავთაძემ ბურთი კარის ხაზიდან გამოიტანა. ტაიმის ბოლო წუთზე შეტევისას, კავკასიელებმა ერთმანეთს ვერ გაუგეს და თსუ-ს კონტრიერიშზე ვანო ბექაურმა გაიტანა - 0:2. მეორე ტაიმის სტარტზე, კავკასიელებმა მურცხვალაძის ავტოგოლით ანგარიშში სხვაობა შეამცირეს - 1:2. ამის შემდეგ კსუ გააქტიურმა, გუნდმა რამდენიმე საგოლე მომენტიც შექმნა, მაგრამ ვერ გამოიყენა. საბოლოოდ, თსუ-ს მეკარე ბუკიამ თავისი კარიდან ზუსტი დარტმით, 34-ე წუთზე, ორბურთიანი უპირატესობა აღადგინა - 1:3. კსუ მატჩის გადარჩენას შეეცადა და 39-ე წუთზე ღავთაძის პასით მაისაიამ, ერთი ბურთი გაქვითა. თუმცა, რამდენიმე წამში ქურდაძემ მატჩს წერტილი დაუსვა, თსუ-მ 2:4 მოიგო.

თითქმის ორჯერ მეტი, 11 გოლი გავიდა, მესამე ადგილისთვის მეორე მატჩში, რომელიც გადამწყვეტი აღმოჩნდა. ამ შეხვედრაში სტუმარ-მასპინძელმა თითო ჰეთ თრიკი შეასრულა, რასაც თელასმა ერთი დუბლი დაუმატა. თამაშის სტარტზე ანგარიში თბილისმა გახსნა - დიაკვნიშვილმა შავ-თეთრები დააწინურა. ამის შემდეგ თელასი გააქტიურდა და მათ მეტოქეს აქტიურად შეუტიეს. მე-9 წუთზე ასათიანის გამჭოლი პასით გიორგაიამ წონასწორობა აღადგინა - 1:1. რამდენიმე წამში ცხომარიამ წინ გაიყვანა ჯორჯიანსი, კიდევ ორ წუთში კი ჯვარაშვილმა თელასს ორბურთიანი უპირატესობა მოუპოვა - 1:3. მალევე, გულუამ ერთი ბურთი გაქვითა და ტაიმიც 2:3 დასრულდა. მეორე ნახევარში, ჯერ ჯვარაშვილმა გაიფორმა დუბლი, შემდეგ კი ცხომარიამ - 2:5. თელასის უპირატესობა გულუამ დუბლით მინიმუმამდე შეამცირა - 4:5. თუმცა, რამდენიმე წამში ჯვარაშვილმა ჰეტ-თრიკი შეასრულა - 4:6, ერთი წუთში კი ხეჩიკაშვილმა საბოლოო შედეგი - 4:7 დააფიქსირა და სრულიად დამსახურებულად, თელასი-ჯორჯიანსმა 2021 წლის სეზონში მესამე ადგილი დაიკავა.