ფუტსალის ლიგის ფინალური სერია დასასრულს უახლოვდება. ახლა უკვე შეგვიძლია ვთქვათ, რომ 2021 წლის სეზონის ფუტსალის ლიგის ჩემპიონის გასარკვევად, ერთი ან ორი მატჩია საჭირო. თბილისის ოლიმპიურ სასახლეში დღეს გამართული მატჩისა და პენალტების სერიის შედეგად, კავკასიის საერთაშორისო უნივერსიტეტის გუნდი საჩემპიონო ოქროს მიუახლოვდა. კავკასიელებს ერთი მატჩის მოგება სჭირდებათ, თსუ-ს კი ორი გამარჯვება უნდათ.

თსუ-სა და კსუ-ს შორის დღეს გამართული შეხვედრა, ნებისმიერი ქვეყნის ტოპ ლიგას დაამშვენებდა. დაძაბული და საინტერესო სანახაობა, მქუხარე გულშემატკივრობა, ლამაზი დრიბლინგები, მეკარეთა თავგანწირული თამაში... ეს ყველაფერი დღეს გამართულ სტუდენტურ დერბიში ვიხილეთ, რომელშიც თსუ-სთან დაპირისპირებაში, კსუ 2:1 დაწინაურდა.

თამაშის ორი 20 წუთიანი და ორიც 5 წუთიანი ტაიმი, დრამატულ ბრძოლაში, გარდამავალი უპირატესობით წარიმართა, მაგრამ უგოლოდ დასრულდა. გოლის გატანა კი, ორივე გუნდს არაერთხელ შეძლო. მატჩის სტარტზე კავკასიელთაგან ღავთაძემ გაისროლა, რასაც თსუ-ს შტურმი მოჰყვა, მაგრამ  კავკასიელებმა იმარჯვეს. მე-12 წუთზე ჯარიმიდან კაკაბაძის ძლიერად დარტყმული კსუ-ს კიპერმა ჯინჭარაძემ მოიგერია. 5 წუთში თსუ-ს მეკარემ ჯერ ღავთაძის დარტყმული მოიგერია, მერე მანგოშვილის და ორივეჯერ ბურთი ძელს მოხვდა. ტაიმის ბოლოს კი სტუმარ-მასპინძელმა, შესაბამისად, მანგოშვილმა და ჩიმაკაძემ თითო მომენტი ვერ გამოიყენეს.

მეორე ტაიმი დავით ბობოხიძის ბიჭებმა უკეთ დაიწყეს და ჯინჭარაძემ სამჯერ გადაარჩინა კარი. კსუ-ს მეკარემ ორჯერ ჩიმაკაძეს არ გაატანინა, ერთხელ კი ქურდაძეს. 30-ე წუთზე კი თსუ-ს კიპერმა ბუკიამ, ღავთაძის დარტყმული მოიგერია. ქურდაძის შორიდან დარტმული ჯერ მიზანს აცდა, შემდეგ იმავე ქურდაძემ, მეკარეს თავზე გადაავლო ბურთი, მაგრამ კარსაც გადაცილა. ლევან კობაიძის ბიჭებიც არ იყვნენ უქმად, ჯერ ღავთაძემ, მერე კი ჭანუყვაძემ, თსუ-ს კარის ბადე გარედან შეარხიეს. ოვერტაიმში ორივე გუნდს ორ-ორი შანსი ჰქონდა, მაგრამ უშედეგოს და ჯერი პენალტებზე მიდგა. ჭანუყვაძემ კსუ დააწინაურა, 0:1. ჭოხონელიძემ წონასწორობა აღადგინა, 1:1. მანგოშვილმა, კობიაძის გუნდი ისევ წინ გაიყვანა, 1:2, კაპანაძის დარტყმული კი, კსუ-ს მეკარე ჯინჭარაძემ მოიგერია. გადამწყვეტი პენალტი ღავთაძემ გაიტანა  (1:3) და კავკასიელებს გამარჯვება მოუტანა.