მეორე ტურის დასკვნით მატჩში, ერთმანეთს ფუტსალის მთავარი ლიგის ორი დებიუტანტი შეხვდა. ბათუმურმა ბსსა-მ პირველი შეხვედრა გამართა, არმიამ კი მეორე თამაში ჩაატარა და ტური პირველი, თანაც სოლიდური მოგებით დაასრულა.

არმიამ მატჩი პირველივე წუთებიდან აქტიურად დაიწყო და მეტოქეს აგრძნობინა, რომ პირველი მოგებისთვის ყველაფერს გაიღებდა, თუმცა არც ბათუმელები ყოფილან უქმად. ლადო ბურდულის გუნდმა მეტოქის მოედანზე პრესინგს მიმართა, ბათუმელებმა, კი თამაში კონტრშეტევებზე გადააწყვეს. მოისწრაფიშვილის დარტყმისას არმიელთა კიპერ ტერუნაშვილს რომ არ ემარჯვა, ალბათ ანგარიშიც გაიხსნებოდა. მალევე ჯერ მაისაიას, შემგეგ კი სილაგავასა და ნანეიშვილის დარტყმებისას ბათუმელთა მეკარე მინასიანმა იმარჯვა. ყველა ამ შეტევისას აჭარლებმა კარის მშრალად შენახვა შეძლეს, მაგრამ არმიელებმა მეტოქე მაინც გატეხეს - მე-8 წუთზე ბერაიამ ანგარიში გახსნა - 0:1. გატანილი გოლის შემდეგ არმიამ იერიშები გააგრძელა და მე-13 წუთზე ფორა გააორმაგა. მორიგი შეტევისას სილაგავამ კარგად მოძებნა მაისაია და 0:2. რამდენიმე წამში უბილავას შეეძლო ერთი ბურთის გაქვითა, მაგრამ არმიელთა მეკარემ აჯობა. მე-16 წუთზე ბათუმელებმა მეტოქის შეტევა შეაჩერეს და მოისწრაფიშვილმა თავისი საჯარიმოდან, არმიელთა თითქმის ცარიელ კარში დაარტყა, მაგრამ მცირედით ააცილა. ორ წუთში ბსსა-ს კონტრიერიშისას შამილაძემ ძლიერად გაისროლა და ეფექტური გოლით ანგარიშში სხვაობა მინიმუმამდე შეამცირა. ბურდულის ბიჭები ორბურთიანი ფორის აღდგენას შეეცადნენ და შანსიც არაერთი ჰქონდათ, მაგრამ მინასიანმა იმარჯვა. უნდა აღინიშნოს, რომ პირველ ტაიმში, ბათუმელთა კიპერი საუკეთესო გახლდათ. არმიელებმა მას, კარში 12-ჯერ დაურტყეს და მხოლოდ 2 ბურთი გაუტანეს.

სცენარი მეორე ტაიმშიც არ შეცვლილა - არმია უტევდა, ბსსა-მ კი კონტრშეტევები გააგრძელა. თბილისელებმა ორი შანსი ვერ გამოიყენეს, მაგრამ მესამეჯერ ანგარიშის გაზრდა შეძლეს. 24-ე წუთზე მაისაიამ სხვაობა ორამდე გაზარდა - 1:3. 29-ე წუთზე, ნანეიშვილმა ბერაიასთან „გათამაშებული კედელი“ გოლად აქცია და 1:4.  დედაქალაქელებმა შეტევები გააგრძელეს, ბათუმელებსაც შეეძლოთ გატანა, მაგრამ ამას ეპიზოდური ხასიათი ჰქონდა. არმიელებმა ბოლო 5 წუთში, ანგარიშში სხვაობა კიდევ სამჯერ გაზარდეს. აქტიური თამაშით სილაგავა იმსახურებდა კიდეც და 35-ე წუთზე თავისი გოლი მიითვალა. რამდენიმე წამში, მაისაიამ შორეული დარტყმით ცარიელ კარში გაიტანა და დუბლი შეასრულა. ბოლო წუთზე კი, ბერაიას დარტყმისას ბურთი რიკოშეტით ბსსა-ს კარში აღმოჩნდა და ტაბლოზე საბოლოო ანგარიში, აისახა 1:7. ამ გამარჯვებით და 3 ქულით, თელასსა და თსუ-ს გაუთანაბრდა. ბათუმელებს თელასთან გამოტოვებული მატჩი მარაგში აქვთ და ვნახოთ გახსნიან თუ არა ქულათა აქტივს.