პსპ-მ ზედიზედ მესამე მატჩი მოიგო

ფუტსალის მთავარი ლიგის მესამე ტური დღეს ორი მატჩით გაიხსნა. ჯერ პსპ ბათუმურ ბსსა-ს შეხვდა, შემდეგ კი თსუ ქუთაისურ მართვეს დაუპირისპირდა. ფარმაცევტებმა მესამე თამაში მოიგეს, თსუ-მ კი თითო მოგება-წაგებას, მეორე გამარჯვება შესძინა.

მეორე ტურის მსგავსად, პსპ-ს მიერ ჩატარებული ამ შეხვედრაშიც 10 გოლი ვიხილეთ, მაგრამ ამჯერად ყველა გოლი ფარმაცევტებს არ გაუტანიათ. პსპ სწრაფი გოლით დაწინაურდა. ბათუმელთა კიპერმა მინასიანმა იერიშის წამოწყება სცადა, მაგრამ ბურთი წინ გაიგდო, რის გამოც კოპლატაძემ ბურთი აართვა და ცარიელ კარში გადაგზავნა - 1:0. ფარმაცევტებს მალევე ჰქონდათ ანგარიშის გაზრდის არაერთი შანსი, აჭარლებმა ორი საგოლე მომენტის ავტორობაც ითავეს, მაგრამ ტაბლოზე შედეგი მხოლოდ ტაიმის შუაგულში შეიცვალა. პსპ-მ სათამაშო უპირატესობა ანგარიშშიც ასახა. მე-10 წუთზე მამულაშვილმა ორამდე გაზარდა სხვაობა. სამ წუთში კი  კოპლატაძემ დუბლი მიითვალა - 3:0. შესვენების შემდეგაც თამაში ფარმაცევტების კარნახით წარიმართა. მეორე ტაიმის სტარტზე სტარტზე პსპ-მ ანგარიში შეცვალა, თანაც ორჯერ - სწრაფი გოლი თევზაძემ გაიტანა და ანგარიშს სოლიდური სახე შესძინა. 24-ე წუთზე კი ახალაიამ სხვაობა გაზარდა - 5:0. ბათუმელთა მეკარემ ფარმაცევტების სამი კარგი დარტყმა მოიგერია. ეპიზოდებში ზღვისპირელები ანგარიშის შემცირებას ცდილობდნენ და 32-ე წუთზე მიზანსაც მიაღწიეს - მარჯვნიდან აბულაძის ჩაწოდებისას, აფციაური პარკეტზე გაცურდა და მოგერიების ნაცვლად ბურთი საკუთარ კარში ჩაჭრა, 5:1. წუთიც არ იყო გასული, რომ ბათუმელებს მეორე ბურთის გატანის ჩინებული შანსი მიეცათ, მაგრამ შამილაძის დარტყმული 7 მეტრიანი, პსპ-ს მეკარე ემუხვარმა მოიგერია. შანსის განიავებისთვის ბსსა მალევე დაისაჯა, კურტანიძემ თევზაძის პასით ისარგებლა და ხუთბურთიანი უპირატესობა აღადგინა - 6:1. ნახევარ წუთში, ზღვისპირელთა საპასუხო შეტევისას აბულაძემ იხეირა და 6:2. კიდევ რამდენიმე წამიც და სვანიძემ გაიტანა - 7:2. ბოლოსწინა წუთზე კი კოპლატაძემ ჰეთ-ტრიკი შეასრულა და საბოლოო ანგარიში დააფიქსირა - 8:2.

თსუ-სა და ქუთაისური მართვეს თამაში საინტერესოდ წარიმართა. მეტოქეებმა თითო საგოლე მომენტი გაცვალეს, შემდეგ უპირატესობა სტუდეტებმა მოიპოვეს და ანგარიშიც გახსნეს. თბილისელთა იერიშისას ქუთათურთა საჯარიმოს წინ, დიაკვნიშვილის წაქცევისთვის დანიშნული ჯარიმა, ჩადუნელმა უძლიერესი დარტყმით, გოლად აქცია - 1:0. გოლის შემდეგ თსუ-ელები მატჩის სადავეებს დაეუფლნენ და ანგარიშის გაზრდის შანსიც არაერთი ჰქონდათ, მაგრამ ვერც თბილისელებმა და ვერც ქუთათურებმა, შესვენებამდე ანგარიში ვერ შეცვალეს. მეორე ნახევრის მეორე წუთზე სტუდენტებმა უპირატესობა გააორმაგეს - ასაშვილის გამჭოლი პასი ჩიმაკაძემ გამოიყენა და ქუსლით, ეფექტური გოლი გაიტანა - 2:0. თამაში ამის შემდეგაც თსუ-ს უპირატესობით წარიმართა. მართვეს მეკარე ბერძენაძე, თბილისელთა არაერთ დარტყმას გადაეფარა. ეპიზოდებში ქუთათურებსაც მიეცათ შანსი, თსუ-ს კიპერმა ჯოხაძემ, გიორგაძის ორი დარტყმა მოიგერია.  ბოლო წუთზე კი ქუთაისელთა გოლი ვიხილეთ - გურეშიძემ კუბლაშვილის პასით ისარგებლა და ერთი ბურთი გაქვითა, 2:1.

ხვალ მესამე ტურის დარჩენილი ორი დრამატული შეხვედრა გაიმართება. ილიაუნი არმიას გაეჯიბრება, მერე კი თელასი-ჯორჯიანსი კსუ-ს დაუპირისპირდება.