ფუტსალის ლიგის მეოთხე ტური დღეს გამართული სამი დაძაბული მატჩით დასრულდა. თბილისის ოლიმპიურ სასახლეში უხგოლიანი დღე იყო - 3 მატჩში 20 გოლი გავიდა. უკვე ტრადიციად ქცეული ცოცხალი, დაძაბული თამაშები ვიხილეთ, დრამატიზმითა და ოსტატობის დემონსტრირებით... თუმცა, სჯობს თანმიმდევრობას მივყვეთ...

კსუ-მ არმიას დამაჯერებელი ანგარიშით სძლია, მაგრამ ნამდვილად ვერ ვიტყოდით, რომ კავკასიელებმა ლადო ბურდულის ბიჭები თამაშით დაჯაბნეს. პირიქით,  არმიელებმა კსუ-ზე მეტჯერ დაარტყეს მეტოქის კარში (16/10). თუმცა, აღსანიშნავია ის, რომ კსუ-ს ეს მოგება, მეკარე ჯინჭარაძის დამსახურებაა, რომელმაც არაერთხელ იხსნა გუნდი და შეტევებშიც აქტიურად მონაწილეობდა. ჯინჭარაძეს მისმა შემცვლელმა ლობჟანიძემაც აუბა მხარი და ბურთის გაიტანა... მე-13 წუთზე ანგარიში ჭანუყვაძემ გახსნა, რასაც 5 წუთში ხარატიშვილმა სოლო-რეიდი და მახვილი კუთხიდან ეფექტური ცხრიანი მოაყოლა. კსუ-ს კიპერს, არმიის მეკარემაც მიბაძა და ისიც შეტევებში გაერთო. რის გამოც კავკასიელებმა მეტოქე, მეორე ტაიმის სტარტზე სიგუნავასა და ფარცვანიას თითო გოლით დასაჯეს და ანგარიშიც სოლიდური გახდა, 4:0. ხუთი გოლი, ბოლო 6 წუთში გავიდა: სილაგავას მიერ გაქვითულ ერთი ბურთს, კსუ-მ ლობჟანიძისა და სიგუნავას თითო გოლით უპასუხა, 6:1. თამაშის ბოლოს არმიელთაგან ფოფხაძემ და უგრეხელიძემ თითო გაიტანეს, მაგრამ კსუ-ს დიდ ფორას ამით ვერა დაკლეს რა.

წინა ტურში მოქმედ ჩემპიონ კსუ-ს მძლეველმა თელასი-ჯორჯიანსმა, ამჯერად უკვე ვიცე-ჩემპიონ თსუ-ს მოუგო. თუმცა, ანგარიშში შესაჩნევი ჩამორჩენის მიუხედავად, სტუდენტები მეტოქეს თამაშითა და კარში დარტყმების რაოდენობით ნამდვილად არ ჩამორჩნენ. მატჩი სტუდენტებმა უკეთ დაიწყეს და ტაიმის პირველ მეოთხედში აჯობეს კიდეც. თსუ-ს ოთხ დარტყმას, ჯორჯიანსმა გიორგაიას საგოლე დარტყმით უპასუხა, მაგრამ ასაშვილმა ბურთი კარის ხაზიდან, ნახტომში თავით გამოიტანა. ავთანდილ ასათიანის ბიჭებმა უმატეს და ეს ანგარიშშიც ასახეს. მე-13 წუთზე თოლორდავას გრძელი პასი, ხეჩიკაშვილმა ზუსტი დარტყმით გააგრძელა და ანგარიშიც გაიხსნა. 4 წუთში კი ჯვარაშვილმა სხვაობა გააორმაგა, 2:0. სტუდენტებმა მეორე ტაიმიც აქტიურად დაიწყეს, მაგრამ ჯორჯიანსმა პრესინგს მიმართა და 22-ე წუთზე,  თოფურიამ თსუ-ს იერიში ჩაჭრა, გიორგაიამ კი ბურთი ცხრიანში გაუშვა, 3:0. სტუდენტებს გოლის გატანის არაერთი შესაძლებლობა ჰქონდათ, მაგრამ შანსები ქარს გაატანეს და ტაბლოზე შედეგი აღარ შეცვლილა.

პსპ-მ მეოთხე ტურიც უდანაკარგოდ ჩაატარა. თუმცა, სტარტზე ილიაუნმა ბრჭყალები  გამოაჩინა და ტაიმის მეოთხედში დაჯაბნა კიდეც მეტოქე. ანგარიში მეორე წუთზე გვაზავას დარტყმით გაიხსნა. სამ წუთში გეგეშიძემ მოწინააღმდეგის იერიში ჩაჭრა და ძლიერი დარტყმით ფორა გააორმაგა, 2:0. მე-7 წუთზე ექიზაშვილის გრძელი, დიაგონალური პასი, კაპანაძემ გოლით დააფასა, 2:1. პსპ-მ ანგარიშის გათანაბრების შანსი ვერ გამოიყენა და სტუდენტებმა მაჩიტიძის ძლიერი დარტყმით უპასუხეს, 3:1. შესვენებამდე პსპ-მ ორბურთიანი ჩამორჩენა ვერ შეცვალა. მეორე ტაიმი კი ფარმაცევტების უპირატესობით წარიმართა და მათ საბოლოოდ ორბურთიანი სხვაობით იმარჯვეს. 25-ე წუთზე ნიკოლოზ კურტანიძემ ანგარიში მინიმუმამდე შეამცირა. ორ წუთში ექიზაშვილმა მეორე სსაგოლე პასი მითვალა, ამჯერად კაპანაძეს გაატანინა, 3:3. სამ წუთში თევზაძის პასით, აფციაურმა პსპ წინ გაიყვანა, 3:4. ამას კი, ხუთი გაფრთხილების გამო დანიშნული პენალტი მოჰყვა, რომელიც კოპლატაძემ გოლად აქცია და საბოლოო ანგარიში დააფიქსირა, 3:5.

ოთხი ტურის შემდეგ, პსპ 12 ქულით კვლავ ერთპიროვნული ლიდერია, მისი მდევრები, 9-9 ქულით თელასი და კსუ არიან. 6 ქულა აქვს თსუ-ს, 4 კი არმიას. ბსსა პირველი 3 ქულით მეექვსეა, რომელსაც ქულიანი ილიაუნი მოსდევს. ბოლო ადგილზე კი ჯერჯერობით უქულოთ მყოფი მართვეა. თელასა და ბსსა-ს ერთი გამოტოვებული მატჩი მარაგში აქვთ.