ფუტსალის 2021-22 წლების სეზონი დასასრულს მიუახლოვდა. ნახევარფინალის მესამე რაუნდმა ფინალისტების ვინაობა გაარკვია. მთავარი ტიტულისთვის, ჩემპიონობისთვის ბრძოლა დასკვნით ფაზაში შევიდა. რეგულარული სეზონის გამარჯვებული თელასი ჯორჯიანსი და მოქმედი ჩემპიონი კსუ, ოქროს მედლებისთვის იბრძოლებენ, რისთვისაც 3 მოგებაა საჭირო. შესაბამისად, წინ ფინალის დაძაბული არაერთი რაუნდი გველის. მანამდე კი ნახევარფინალის მესამე რაუნდი მიმოვიხილოთ.

წინა ორი რაუნდისგან განსხვავებით, თელასისა და თსუ-ს გადამყვეტი დაპირისპირება უხვგოლიანი გამოდგა. თავიდანვე უნდა ითქვას, რომ ბურთის ფლობის, დარტყმებისა და კარში დარტყმების მაჩვენებლებით, სტუდენტებმა მინიმალურად დაჯაბნეს მეტოქე, მაგრამ ავთანდილ ასათიანის ბიჭები უფრო შედეგიანი აღმოჩნდნენ. უკოპრომისო ბრძოლაში, ორმხრივი შეტევებით, წარმართული მატჩის პირველი ტაიმის ნახევარმა უგოლოდ ჩაიარა. მე-13 წუთზე სტუდენტებს ანგარიშის გახსნა შეეძლოთ, მაგრამ რელური მომენტი ქარს გატანეს და წუთში დაისაჯნენ კიდეც. ჭუმბურიძე-თოფურიას შეტევა დავით ხეჩიკაშვილმა გოლით დააგვირგვინა, 1:0. თელასი ამას არ დასჯერდა და ფორის გაზრდაზე იწყო ზრუნვა. ალი ასლანმა არაერთხელ იხსნა კარი, მაგრამ მე-17 წუთზე უძლური აღმოჩნდა. კაპიტანმა თოფურიამ ამჯერად ვახტაგ ჯვარაშვილს გაატანინა, 2:0.  სტუდენტებმა მეორე ტაიმი უფრო აქტიურად დაიწყეს.  თსუ-ს შეტევებში მეკარე ალი ასლანიც ჩაერთო, რის გამოც უნივერსიტეტელთა კარი ხშირად დაუცველი რჩებოდა. 34-ე წუთის ეპიზოდი, ამ მატჩში საკვანძო მომენტი გახლდათ. კაკაბაძის ძლიერად დარტყმული ჯორჯიანსელთა მეკარე ჭამბურიამ მოიგერია, ქურცაძემ დაამატა, მაგრამ არაზუსტად... ბურთი შოთა თოფურიას მიუვიდა, რომელმაც თავისი საჯარიმოდან, შორეული ზუსტი დარტყმით, ცარიელ კარში გაიტანა და თელასის უპირატესობა სოლიდური გახადა, 3:0. თსუ-ს არასრული 7 წუთი ჰქონდა მატჩის გადასარჩენად და ქამბექმა ძალზე ცოტა დააკლდა. მე-15 წუთზე კაკაბაძის გამჭოლი გადაცემა დიაკვნიშვილმა გოლად აქცია, 3:1. კიდევ ორ წუთში პერეირამ უძლიერესი დარტყმით სხვაობა მინიმუმამდე შეამცირა, 3:2. ბოლოსწინა წუთზე, თსუ-ს 5 ჯარიმის გამო, თელასმა პენალტის დარტყმის უფლება მოიპოვა, მაგრამ ჯვარაშვილმა ააცილა. მალევე გიორგაიამ ცარიელ კარში ვერ გაიტანა. ორივე გუნდის მცდელობის მიუხედავად, ანგარიში აღარ შეცვლილა. თსუ ახლოს იყო შარშანდელის მსგავსად, ფინალში გასულიყო, მაგრამ ფინალისტობა თელასი ჯორჯიანსმა გაიფორმა.

კსუ-სა და პსპ-ს ნახევარფინალის მესამე რაუნდის მატჩი მეტოქეებმა ფრთხილად დაიწყეს. მე-5 წუთზე კავკასიელთა მოთამაშე-მწვრთნელმა ლევან კობაიძემ პსპ-ს იერიში ჩაჭრა, ბექა ბექაურს უპასა, რომელმაც ანგარიში გახსნა, 1:0. ფარმაცევტებმა ნელ-ნელა უმატეს მეტოქეზე ზეწოლას, რამაც შედეგი გამოიღო. მე-10 წუთზე ახალაიას შეტევისას, კსუ-ს ბრაზილიელმა კიპერმა კარირიმ, ექიზაშვილის დარტყმული მოიგერია, მაგრამ ნიკოლოზ კურტანიძის შორეული ძლიერ გასროლისას უძლური აღმოჩნდა და ანგარიში გათანაბრდა, 1:1. ამას ორმხრივი შეტევები მოჰყვა და თამაშმა უფრო დინამიური ხასიათი მიიღო. მეკარეებმა ფხაკაძემ და კარირიმ არაერთი დარტყმა მოიგერიეს. ბოლოსწინა წუთზე ბექაურმა საჯარიმოში მანგოშვილს უპასა, მაგრამ ბურთი თევაძეს მოხვდა, კარში შევარდა და კსუ დაწინაურდა,  2:1. მეორე ტაიმში ფარმაცევტები ანგარიშის გათანაბრებას შეეცადნენ, მაგრამ მეკარე კარირიმ არაერთი მკვდარი ბურთი აიღო. ბოლოს თევზაძემ ცარიელ კარში ვერ შეძლო გატანა, მერე ახალაიამ კი გაიტანა, მაგრამ ეს  საფინალო სასტვენის შემდეგ მოხდა და ბუნებრივია, არ ჩაითვალა. კავკასიელებმა 2:1 მოიგეს და ზედიზედ მეორედ ფინალში გავიდნენ.

ასე რომ, შარშანდელი სტუდენტური ფინალისგან (კსუ-თსუ) განსხვავებით ახალი ფინალი გველის, რომელშიც რეგულარული სეზონის პირველ და მეორე ადგილზე გასული გუნდები, თელასი და კსუ დაუპირისპირდებიან ერთმანეთს.