ფუტსალის 2021-22 წლების სეზონი დასრულებამდე, თასის გათამაშება გაგრძელდა. რეგლამენტის მიხედვით, მეოთხედფინალიდან ნახევარფინალში გამსვლელი გუნდები ერთმატჩიან დაპირისპირებაში უნდა გარკვეულიყო და გაირკვა კიდეც. საგულისხმოა ის, რომ მეოთხედფინალებში, ორმა ქვედალიგელმა, ილიაუნი-2-მა და საქართველოს უნივერსიტეტის გუნდებმა იასპარეზეს, მაგრამ მრისხანე გუნდები ერგოთ მეტოქეებად და გათამაშებას გამოეთიშნენ. თუმცა, ძლიერ გუნდებთან ჭიდილი, სამომავლოდ მათ უდავოდ წაადგებათ.  მეოთხედფინალის ოთხი მატჩიდან ყველაზე დაძაბული თსუ-სა და თასის მფლობელ ილიაუნს შორის გამართული შეხვედრა გამოდგა, რომლის ორი ძირითადი და ორიც დამატებითი ტაიმი ფრედ დასრულდა... თუმცა, სჯობს თანმიმდევრობას მივყვეთ...   

მეოთხედფინალური მატჩები ილიაუნი-2-სა და კსუ-ს თამაშით გაიხსნა. ამ წყვილში ფავორიტებად კავკასიელები იყვნენ მიჩნეული და თამაში მათი უპირატესობით წარიმართა. თუმცა, ილიაუნელებმა იმდენი შეძლეს, რომ ნახევარი ტაიმის განმავლობაში, კარი მშრალად შეინახეს. მე-11 წუთზე ფარცვანია ორ მეტოქეს გასცდა და გამჭოლი გადაცემით, მანგოშვილი საჯარიმოში მოძებნა, რომელმაც ანგარიში გახსნა, 0:1. მეორე ტაიმის მერვე წუთზე ფარცვანიამ კვლავ ორი მეტოქე ჩამოიშორა და ამჯერად მათეუს ფაჩიანოს გაატანინა, 0:2. ექვსი წუთის შემდეგ, ილიაუნი-2-ის რიგებში ყველაზე გამორჩეულმა გიორგი წიქვაძემ, საკუთარი საჯარიმოდან ფლანგური გარღვევა განახორციელა, ორი მოწინააღმდეგის გარდა მეკარეც მოატყუა და სხვაობა მინიმუმამდე შეამცირა, 1:2. ნახევარი წუთიც არ იყო გასული, კავკასიელთაგან ხოან ჩავარროს მიერ საჯარიმოში ჩაწოდებული ბურთი რიკოშეტით კარში აღმოჩნდა, 1:3. მატჩის ბოლო წუთზე ბოლქვაძის პასით, წიქვაძემ დუბლი მიითვალა, 2:3. კსუ ნახევარფინალში გავიდა, ილიაუნი-2-მა ბოლომდე იბრძოლა და კარგი შთაბეჭდილება დატოვა.

მეორე სტუდეტური დერბი გაცილებით დრამატული გამოდგა. მართალია, თსუ-სა და ილიაუნის დაპირისპირების პირველი ტაიმი, არაერთი მომენტის მიუხედავად, უგოლოდ დასრულდა, მაგრამ შესვენების შემდეგ 6 გოლი გავიდა. შესვენების შემდეგ, ნახევარწუთიან მონაკვეთში, თსუ დამაჯერებლად დაწინაურდა. ჯერ იყო და, ილიაუნელთა კიპერმა ბექა გოგსაძემ, ნოდარ ქურცაძის შორეული გასროლა მოიგერია, მაგრამ 23-ე წუთზე ქურცაძემ შორეული დარტყმითა და ეფექტური გოლით გახსნა ანგარიში, 1:0. ათიოდე წამში გიორგი ჩიმაკაძემ მეტოქის საჯარიმოში გადაცემა ჩაჭრა და ეპიზოდი გოლით დააგვირვინა, 2:0. ხუთ წუთში ლაშა კურტანიძის ჩინებული პასით, საბა მაჩიტიძემ სხვაობა მინიმუმამდე შეამცირა, 1:2. ილიაუნი გათანაბრებას შეეცადა, მაგრამ 34-ე წუთზე თსუ-ს კაპიტანმა გიორგი ჩიმაკაძემ თსუ-ს 2-ბურთიანი ფორა აღადინა, 3:1. მატჩის გადასარჩენად ილიაუნელებს 6 წუთზე ოდნავ მეტი ჰქონდათ. მათ მეტად მოინდომეს და ქამბექი შეძლეს კიდეც. 28-ე წუთზე ბექა ონიანმა, სხვაობა შეამცირა, 2:3. ილიაუნი ვა-ბანკზე წავიდა და იერიშებში მეკარე ბექა გოგსაძეც ჩართო. მატჩის დასრულებამდე 15 წამით ადრე, მეკარე ალი ასლანი სწორედ სწორედ მისმა ვიზავი ბექა გოგსაძემ დაამწუხრა, (3:3) და თამაში დამატებით დროში გადაზარდა. ორ დამატებით ტაიმში ანგარიში აღარ შეცვლილა და პენალტების სერიაზე მიდგა ჯერი. პენალტებში ილიაუნმა 3:4 მოიგო, რაშიც ლომის წვლილი მეკარე ბექა გოგსაძემ დაიდო. გადამწყვეტი პენალტი სწორედ მან მოიგერია, მანამდე კი ოთხიდან ერთი პენალტი გაიტანა. ილიაუმა პენალტებში 4:3 იმარჯვა და თასისთვის ბრძოლას გააგრძელებს.

ქუთაისურ მართვესთან არმია სწრაფი გოლებით დაწინაურდა და მე-4 წუთზე უკვე 4 უპასუხო გოლით იგებდა. ლადო ბურდულის ბიჭებმა პირველი ტაიმში 6:1 იმარჯვეს, საბოლოოდ კი 8:1 მოიგეს. გიორგი სილაგავამ პოკერი მიითვალა, ლაშა ფოფხაძემ დუბლი შეასრულა. თითო ბურთი ბაკურ ნანეიშვილმა და დავით კოხრეიძემ გაიტანეს. ქუთათურთაგან პრესტიჟის გოლი ირაკლი ზარნაძის ანგარიშზეა.

რეგულარული სეზონის გამარჯვებულ თელასი ჯორჯიანსთან მატჩში, საქართველოს უნივერსიტეტი დაწინაურდა. მე-4 წუთზე სპარტაკ ლომიძემ გახსნა ანგარიში. თელასმა ამას 4 გოლით უპასუხა. ნიკოლოზ გაბრიჩიძემ, ვახტანგ კეკელიამ, ნუკრი ჭუმბურიძემ და ჯანიკო გიორგაიამ თითო ბურთი მიითვალეს და ჯორჯიანსელებმა ტაიმი 4:1 მოიგეს. მეორე ნახევარში სპარტაკ ლომიძემ დუბლი შეასრულა და საბოლოდ თელასმა 2:4 მოიგო.

ასე რომ, თასის ნახევარფინალში კსუ, ილიაუნი, არმია და თელასი იასპარეზებენ, ეს კვარტეტი ბრმა წილისყრით დაწყვილდება. თუმცა, უკვე ცხადია, რომ ორივე წყვილში, გაცილებით დაძაბული ბრძოლები გველის.