ფუტსალის ლიგის თასის მეოთხეფინალებს, უფრო დაძაბული ნახევარფინალები მოჰყვა და ფინალური წყვილიც გაცხადდა. უკვე გადაწყვეტილია, რომ თასს ახალი მფლობელი ეყოლება, რადგან თასის მოქმედი გამარჯვებული ილიაუნი, გათამაშებას გამოეთიშა. 2021-22 წლების სეზონის ორი უძლიერესი გუნდი, თასისთვის შეებმებიან ერთმანეთს.

ნახევარფინალები კსუ-სა და ილიაუნის სტუდენტური დერბით გაიხსნა. გასულ წელს გამართულ თასის ფინალში, სწორედ ეს გუნდები შეეჭიდნენ ერთმანეთს და ილიაუნმა 1:0 იმარჯვა. ბუნებრივია, ილიაუნელები ტიტულის შენარჩენებას შეეცდებოდნენ, კსუ კი რევანს. შესაბამისად, მატჩს ინტრიგა და დაძაბულობა არ აკლდა, თამაშმა ეს მოლოდინი სრულად გაამართლა. ანგარიში სწრაფი გოლით გაიხსნა. მე-3 წუთზე გურამ ხაჭაპურიძემ გრძელი პასით საბა მაჩიტიძე მოძებნა, კსუ-ს მეკარე ადრიანო კარირი გამოსვლაზე შეცდა, კიპერი ვერც შოთა ჭანუყვაძემ იხსნა და მაჩიტიძემ ილიაუნი წინ გაიყვანა, 0:1. კავკასიელები არ დაბნეულან, მათ უფრო მწვავედ შეუტიეს, რამაც შედეგი გამოიღო. მე-6 წუთზე შოთა ჭანუყვაძემ ფლანგზე საბა ტყეშელაშვილი მოძებნა, რომელმაც ერთი შეხებით ლუკა ფარცვანია მეკარეს პირისპირ შეატოვა და მანაც წონასწორობა აღადგინა, 1:1. ამას ორმხრივი შეტევები მოჰყვა, მაგრამ შედეგი მხოლოდ ტაიმის ბოლოს შეიცვალა. მე-17 წუთზე ლუკა ფარცვანიას ფლანგური გარღვევა და მისი გამჭოლი პასი, ნიკა მანგოშვილმა დააგვირგვინა და კსუ დაწინაურდა. მეორე ტაიმის ნახევარი მშრალად გაილია, 30-ე წუთზე ლაშა კურტანიძის ძლიერად დარტყმული ბურთი მეკარე კარირიმ მოიგერია, დასწრებაზე მცველებს დავით გეგეშიძემ აჯობა და წონასწორობა აღადინა, 2:2. ექვს წუთში კავკასიელებმა გამარჯვების გოლი მიითვალეს: ჭანუყვაძემ მეტოქეს ბურთი აართვა, ფარცვანიამ კი დუბლი შეასრულა, 3:2.

მეორე ნახევარფინალში არმია და თელასი ჯორჯიანსი წარსდგენ ერთმანეთს წინაშე და უწინდელივით, ეს თამაშიც უხვგოლიანი გამოდგა. ავთანდილ ასათიანის ბიჭები მე-4 წუთზე ვახტანგ კეკელიას ზუსტი დარტყმით დაწინაურდნენ, 0:1. ამას ორმხრივი შეტევები, მაგრამ 13 წუთიანი მშრალი მონაკვეთი მოჰყვა. მე-17 წუთზე შოთა თოფურიამ შეტევისას, გამორეული პასით კეკელია მოძებნა და მანაც თელასის ფორა გაორმაგა, 0:2. არმიელებიც არ იყვნენ უქმად და მათ ოციოდე წამში უპასუხეს - კახაბერ მაისაიამ სხვაობა მინიმუმამდე შეამცირა, 1:2. თუმცა, წუთიც არ იყო გასული, შოთა თოფურიამ მეტოქის გადაცემა ჩაჭრა, ერთი მეტოქე ჩამოიშორა, ნიკოლოზ გაბრიჩიძესთან კედელი გაითამაშა და ორბურთიანი ფორა აღადგინა, 1:3. მეორე ტაიმი კეკელიას გოლით დაიწყო. 22-ე წუთზე კეკელიამ ცენტრიდან დრიბლინგი გააკეთა, ორ მეტოქეს გასცდა, მეკარე მოძრაობაზე დაიჭირა და თელასის უპირატესობა სოლიდური გახადა, 1:4. არმიელებმა ნახევარ წუთში უპასუხეს - ნიკოლოზ უგრეხელიძის დასრტყმული ბურთი რიკოშეტისა და ძელის მეშვეობით კარის ბადეში აღმოჩნდა, 2:4. არმია ვა-ბანკზე წავიდა და მათი მეკარე ვახტანგ ტერუნაშვილი შეტევებში აქტიურად ჩაერთო. ბოლოსწინა წუთზე, არმიელთა ერთ-ერთი ასეთი შეტევა შოთა თოფურიამ ჩაჭრა, ერთი მოწინააღმდეგე ჩამოიშორა და მახვილი კუთხიდან დარტყმით თელასის გამარჯვებას წერტილი დაუსვა, 2:5.

ასე რომ, თასის ფინალში ლომების ჯახი გველის, კსუ-თელასის დაპირისპირება, ჩემპიონატის ფინალის ერთგვარი რეპეტიცია იქნება. ვნახოთ ვის დარჩება ფუტსალის ლიგის თასი... ამას 13 ივნისს, 14 საათზე გასამართი მატჩი გვიჩვენებს.