პირველი ტიტული - თასი თელასისაა


ნახევარფინალში ილიაუნის დამარცხებით, ცხადი გახდა და გაუწყეთ კიდეც, რომ ფუტსალის თასს ახალი მფლობელი ეყოლებოდა, რომლის ვინაობაც ფინალურ მატჩში გაცხადდებოდა და გაირკვა კიდეც. ფუტსალის თასი რეგულარული სეზონის გამარჯვებულმა თელასი ჯორჯიანსმა დამსახურებულად მოიპოვა.

ფუტსალის ქომაგებმა კიდევ ერთი ლამაზი სანახაობა იხილეს, თასის გადაცემის ოფიციალური ცერემონიალით, რომელიც საქართველოს ფეხბურთის ფედერაციისა და ფუტსალის ასოციაციის მიერ, ჩინებულად გახლდათ ორგანიზებული. ფუტსალის ლიგის თასი ფინალში, ამ სეზონის ორი უძლიერესი გუნდი შეეჭიდა - მოქმედი ჩემპიონი კსუ, რეგულარული სეზონის გამარჯვებულ თელასი ჯორჯიანს დაუპირისპირდა.

თავიდანვე ცხადი იყო, რომ დაძაბული ბრძოლა გველოდა. მეტოქეებმა შეხვედრა ფრთხილად დაიწყეს და ეს თამაშის საწყის 5 წუთსაც დაეტყო. თელასმა მეტოქეზე ზეწოლა ნელ-ნელა გააძლიერა და სათამაშო უპირატესობას დაეუფლა. შესაბამისად, კავკასიელთა ბრაზილიელ მეკარე ადრიანო კარირის, არაერთხელ მოუწია ოსტატობის დემონსტრირება. ირაკლი თოდუას გასროლა, კარირიმ ორჯერ მოიგერია. სტუდენტებმაც უპასუხეს და ჯორჯიანსელთა კიპერი ალექსანდრე ჯამბურია, ბექა ბექაურის დარტყმულს გადაეფარა. კავკასიელებმა დაცვიდან გადააწყვეს თამაში, მაგრამ ეპიზოდურად მაინც მწვავედ უტევდნენ. მე-11 წუთზე, ვახტანგ კეკელიამ კსუ-ს იერიში ჩაჭრა და კონტრშეტევაზე სტუდენტთა მეკარე კარირისთან პირისპირ გავიდა, მაგრამ ბრაზილიელმა იმარჯვა. თოლორდავას დარტყმისას ისევ კარირიმ იყოჩაღა. შოთა ჭანუყვაძის დარტმულს, ენერგეტიკოსთა კიპერი ჯამბურია გადაეფარა. გარი წერეთლის დარტყმისას კი თელასის კარი ძელმა იხსნა. თელასმა უფრო მწვავედ შეუტია, რამაც შედეგი გამოიღო. მე-18 წუთზე ნიკოლოზ გაბრიჩიძე მარცხნენა ფლანგიდან საჯარიმოს შუისკენ დაიძრა, გზად ორი მეტოქე ჩამოიცილა და თოდუა მოძებნა, რომლის დარტყმულს მანგოშვილი გადაეფარა, მაგრამ დამატებაზე გაბრიჩიძემ იმარჯვა და ანგარიში გახსნა, 0:1.

კავკასიელებმა მეორე ტაიმი უფრო აქტიურად დაიწყეს. 23-ე წუთზე ფარცვანიას დარტყმული მცირედით ასცდა კარს, ნიკა ხარატიშვილის დარტყმისას კი თელასის მეკარე ჯამბურიამ რთული ბურთი აიღო. ცხომარიას საჯარიმო დარტყმა მცირედით ასცდა მიზანს და 28 წუთიც დადგა. შოთა თოფურიამ კუთხურიდან ვახტანგ კეკელიას გამჭოლი პასი გაუკეთა, რომელმაც თელასის ფორა გააორმაგა. კავკასიელები მატჩის გადარჩენას შეცადნენ და შეუტიეს. ბოლო 5 წუთის განმავლობაში, სტუდენტები ვა-ბანკზე წავიდნენ და მეკარესთან ერთად უტევდნენ. თუმცა, თელასმა ბოლომდე მშრალად შეინახა კარი.

ავთანდილ ასათიანის ბიჭები, 2021-22 წლების სეზონის პირველ ტიტულს დაეუფლნენ. საქართველოს ფეხბურთის ფედერაციის ვიცე-პრეზიდენტმა აკაკი ალადაშვილმა და ფუტსალის ასოციაციის პრეზიდენტმა ლევან ცქიტიშვილმა, თელასი ჯორჯიანსს ფუტსალის თასი გადასცეს. 

წინ, ფუტსალის 2021-22 წლების სეზონის ფინალური რაუნდის მატჩებია, რომელშიც კვლავ კსუ და თელასი დაუპირისპირდებიან ერთმანეთს. ასე რომ, ცხარე ბატალიები გველის.