ფუტსალის თასის გათამაშება დასრულდა და 2021-22 წლების სეზონის დასკვნითი აკორდიც გახურდა. ნახევარფინალებში გამარჯვებული თელასი და კსუ ფინალურ რაუნდში ჩემპიონობისთვის იბრძოლებენ. ამ მთავარი ტიტულისთვის კი სამი მოგებაა საჭირო.

მოქმედ ჩემპიონ კსუ-ს წინააღმდეგ, თელასი ჯორჯიანსი უკვე თასის მფლობელის რანგში წარსდგა. ავთანდილ ასათიანის ბიჭებმა თავიდანვე გამოაჩინეს ბრჭყალები და დაწინაურებაც შეძლოთ. პირველივე წუთზე ვახტანგ კეკელიამ მეტოქის იერიში ჩაჭრა და გამჭოლი პასით ირაკლი თოდუა მოძებნა, მაგრამ კავკასიელთა მეკარე კარირიმ იმარჯვა. ათიოდე წამში ნიკოლოზ გაბრიჩიძის საჯარიმო დარტყმა  მცირედით ასცდა მიზანს. მეტოქეს კავკასიელებიც არ დარჩნენ ვალში და მათი ჯერიც მალევე დადგა. თელასის მეკარე ალექსანდრე ჯამბურია, ჯერ შოთა ჭანუყვაძის, მერე კი ლაშა სიგუნავას დარტყმულს გადაეფარა. კსუ-მ მეტოქის მოედანზე პრესინგს მიმართა, რამაც მალე გამოიღო შედეგი. ფარცვანია-ტყეშელაშვილის საფირმო კომინაციისას, თელასის კარი ძელმა იხსნა. მე-4 წუთზე ტყეშელაშვილმა კუთხურიდან, გამჭოლი პასით ნიკა მანგოშვილი მოძებნა, რომელმაც ანგარიში გახსნა, 0:1. თელასი გააქტიურდა, კავკასიელები ფორის გაორმაგებას შეცადნენ და თამაშმა მწვავე ხასიათი მიიღო. კეკელიას ანგარიშის გათანაბრება შეეძლო, მაგრამ ხელსაყრელი მომენტი ვერ გამოიყენა. ჯორჯიანსელებმა იერიშებს ორგანიზებულობა და სიმწვავე შემატეს. კავკასიელებმა კი დაცვაზე გააკეთეს აქცენტი და კონტრიერიშებზე  თავიანთ შანსს დაელოდნენ. ამან გაამართლა კიდეც და კსუ-ს ანგარიშის გაზრდის არაერთი შანსი ჰქონდა. ჯერ იყო და ხარატიშვილის ძლიერი დარტყმული ჯამბურიამ მოიგერია. მე-15 წუთზე, თითქმის პირითი ხაზიდან, ლუკა ფარცვანიამ ძალზედ მახვილი კუთხიდა ულამაზესი გოლი გაიტანა, 0:2. ორიოდე წუთში ჯორჯიანსელთა უხეში შეცდომისას, გარი წერეთელმა ჩინებული საგოლე შესაძლებლობა მიეცა, მაგრამ შანსი ქარს გაატანა, რის გამოც სტუდენტები დაისაჯნენ კიდეც. თელასი ქამბექს შეეცადა და მეორე ტაიმში შეძლო კიდეც. ქამბე         ქს დავით ხეჩიკაშვილმა დაუდო სათავე და ამაში ლომის წილი შეიტანა. მე-19 წუთზე თოლორდავამ ცენტრიდან საჯარიმოში სწორედ ხეჩიკაშვილს გადააწოდა, რომელმაც ზუსტი დარტყმით ანგარიშში სხვაობა მინიმუმამდე შეამცირა.

თელასმა მეორე ტაიმი გაცილებით აქტიურად დაიწყო. 23-ე წუთზე სტუდენტები ისევ კარირიმ იხსნა. თუმცა, ორიოდე წუთში უძლური აღმოჩნდა - თოფურიამ საჯარიმოში ხეჩიკაშვილი მოძებნა, რომელიც ეფექტური დარტყმით, დუბლი მიითვალა და ანგარიში გაათანაბრა, 2:2. ჯორჯიანსელები ამას არ დაჯერდნენ. 30-ე წუთზე კეკელია მარცხენა ფრთიდან მეტოქის შეიჭრა საჯარიმოში, ფინტებით ორ მეტოქეს გასცდა და თოდუას უპასა, რომელმაც თელასი წინ გაიყვანა, 3:2. ამის შემდეგ სტუდენტების ჯერი დადგა. 33-ე წუთზე სიგუნავას დარტყმისას, ხარატიშვილმა კუთხის ჩაკეტვა ვერ მოასწრო. მალევე ჯამბურიამ ჯერ მანგოშვილის ახლოდან დარტყმული, მერე კი წერეთლის გასროლა მოიგერია.  ბოლო 5 წუთში სტუდენტებმა მეკარესთან ერთად შეუტიეს, მაგრამ ამას შედეგი არ მოჰყოლია. პირიქით, მატჩის დასრულებამდე 10 წამით ადრე, კეკელიამ საბოლოო ანგარიში დააფიქსირა. თელასმა 4:2 იმარჯვა და ფინალურ სერიაში დაწინაურდა.

ამ გუნდების მორიგი მატჩი თბილისის ოლიმპიურ სასახლეში 18 მარტს, 11:30 საათზე გაიმართება. ამ შეხვედრის შემდეგ კი ფლეი აუტი შედგება, ფუტსალის მთავარ ლიგაში ადგილის შესანარჩუნებლად ქუთაისური მართვე, ევროპის უნივერსიტეტს შეეჭიდება.