კავკასიელებმა გაათანაბრეს, ევროპელები დაწინაურდნენ


თამამად შეიძლება ითქვას, რომ ფუტსალში 19 ივნისს სტუდენტების დღე იყო. თბილისის ოლიმპიურ სასახლეში, ფლეი ოფების ორი მატჩი შედგა და ორივეში სტუდენტებმა მოიგეს. 2021-22 წლების სეზონის ჩემპიონობისთვის ბრძოლის პირველ რაუნდში, თელასის მოგების (4:2) შემდეგ, ამჯერად უკვე კავკასიის საერთაშორისო უნივერსიტეტის გუნდმა იზეიმა გამარჯვება. ფლეი აუტის მატჩის პირველი რაუნდში კი, ევროპის უნივერსიტეტმა ქუთაისურ მართვეს პენალტების სერიაში სძლია. თუმცა, სჯობს თანმიმდევრობას მივყვეთ...

აშკარად გამოჩნდა, რომ ფინალის პირველი რაუნდის მატჩიდან, კავკასიელთა მოთამაშე-მწვრთნელმა ლევან კობაიძემ სწორი დასკვნები გააკეთა. თამაში, რომელიც საშუალო ტეპმში წარიმართა, საგოლე მომენტების სიუხვით არ გამოირჩეოდა. ორივე გუნდი დამაგვირვინებელ ფაზაში მოიკოჭლებდა და ხანაც მეკარეები მარჯვობდნენ. კეკელიას და ბექაურის დარტყმებს სწორედ კიპერები, კარირი და ჯამბურია გადაეფარნენ. კობაიძემ მეორე მცდელობისას, კუთხურიდან მოწოდებული ბურთი, კარის ხაზის გასწვრივ დაარტყა და რიკოშეტით კარში აღმოჩნდა, 1:0. თელასს შესვენებამდე შეეძლო მიღებული ბურთის გაქვითვა, მაგრამ თოლორდავამ ორი ჩინებული მომენტი გააცუდა. მეორე ტაიმი უფრო დაძაბული გამოდგა. კსუ-მ პრესინგს მიმართა და მოწინააღმდეგეს სივრცეები შეუზღუდა. კავკასიელთა ბრაზილიელი კიპერი კარირი,  თოდუასა და ჭუბურიძის დარტყმებს გადაეფარა. ჯორჯიანსელთა კიპერმა კი, ჭანუყვაძეს და ბექაურს არ გაატანინეს. 34-ე წუთზე ნიკა ხარატიშვილმა შეუჩერებელი დარტყმით გადამწყვეტი გოლი გაიტანა, 2:0. დარჩენილ 6 წუთში თელასი ვა-ბანკზე წავიდა და მეკარიანად შეუტია, მაგრამ უშედეგოდ. კეკელიამ, ჭუმბურიძემ და გაბრიჩიძემ თითო შანსი ვერ გამოიყენეს და დაისაჯნენ კიდეც. მატჩის დასრულებამდე 20 წამით ადრე, ჭანუყვაძემ მეტოქის იერიში ჩაჭრა და საბოლოო ანგარიში დააფიქსირა, 3:0. კავკასიელებმა თელასთან ფინალის მეორე რაუდში ანგარიში გათანაბრეს. ამ გუნდების მორიგი დაპირისპირება სამშაბათს, 21 ივნისს 18 საათზე დაიწყება.

უფრო უხვგოლიანი გამოდგა ფუტსალის ქვედალიგოსანი ევროპის უნივერსიტეტისა და ქუთაისურ მართვეს დაპირისპირება. თავიდანვე გამცნობთ, რომ ამ გუნდებს შორის ორჯერ გამარჯვებული, მომდევნო სეზონში ფუტსალის მთავარ ლიგაში იასპარეზებს. ქუთათურებს მთავარი ლიგა არ ეთმობათ და გამოცდილების ხარჯზე მატჩის სადავეებსაც დაეუფლნენ. თუმცა, სტუდენტებმა იმერლებს თავიდანვე აგრძნობინეს, რომ ზედა ლიგაში აღზევებისთვის ბოლომდე იბრძოლებდნენ და ასეც მოხდა. მე-7 წუთზე ხარაიშვილმა ბუბულაშვილთან კედელი გაითამაშა და ანგარიში გახსნა, 0:1. კახაბერ გოგოხიასა და საბა გოგოლაძის დარტყმები მიზანს მცირედით ასცდა. კუპრეიშვილის გასროლას ქუთათურთა კიპერი ბერძენაძე გადაეფარა. მე-16 წუთზე ბუბულაშვილ-ხარაიშვილის შეტევისას, ამ უკანაკსნელმა დუბლი მიითვალა, 0:2. ბოლო 2 წუთში სტუდენტებმა 2 ბურთის გაქვითვა შეძლეს. „ცხინვალის“ ყოფილმა ფეხბურთელმა აკაკი ჯანელიძემ, მოჭრილი, ტექნიკური დარტყმით შეამცირა სხვაობა. შესვენებამდე ნახევარი წუთით ადრე კი, ჯანელიძემ გოგოლაძის პასი შეირგო და დუბლი მითვალა, 2:2.

ევროპელმა სტუდენტებმა, რომელმაც საკმაოპდ საინტერესო გუნდის შთაბეჭილება დატოვეს მეორე ტაიმი უფრო აქტიურად დაიწყეს და ეს შედეგშიც აისახა. ჯანელიძის პასი გოგოხიამ გოლად აქცია, 3:2. არაერთი საგოლე მომენტის მიუხედავად, მართვე მდევრის როლში აღმოჩნდა, თანაც ორგზის, მაგრამ წონასწორობის აღდგენა მაინც შეძლეს. 36-ე წუთზე ხარაიშვილმა მეკარისგან გრძელი პასი მიიღო და ორი მეურვის მიუხედავად, ანგარიში გაათანაბრა, 3:3. მატჩის ბოლო წუთი დრამატული აღმოჩნდა. ზურაბ ვარდუაშვილმა შორეული ძლიერი დარტყმით, სტუდენტები წინ გაიყვანა, 4:3. თუმცა, შეხვედრის დამთავრებამდე 40 წამით ადრე, ხარაიშვილმა პოკერი შეასრულა და თამაში დამატებით დროში გადაზარდა. დამატებით ორ უგოლო ტაიმს პენალტების სერია მოჰყვა. ქუთათურთაგან ბუბულაშვილმა, ხარაიშვილმა და კუბლაშვილმა გაიტანეს. სტუდენტების მეკარე ბაკურ სანიკიძემ ორი პენალტი მოიგერია. უნივერსიტეტელებიდან ჯანელიძემ, ვარდუაშვილმა და კუპრეიშვილმა გაიტანეს. გადამწყვეტი პენალტი თამაზ ვახანიამ ცხრიანში შეაგდო და ფლეი აუტის რაუნდში ევროპელები დააწინაურა. ეს გუნდები მეორე რაუნდში, 22 ივნისს 18 საათზე, უკვე ქუთაისში დაუპირისპირდებიან ერთმანეთს.