ფუსტალის 2021-22 წლის სეზონის ჩემპიონობის მარათონი დასასრულს უახლოვდება. ქვეყნის ჩემპიონობის მოსაპოვებლად, ფინალურ სერიაში თელასი ჯორჯიანსი დაწინაურდა და ოქროს მედლებამდე ერთი მოგება აშორებს. ჯერაც მოქმედ ჩემპიონ კსუ-ს კი, ტიტულის შესანარჩუნებლად ორი გამარჯვება სჭირდება.

საჩემპიონო რაუნდის წინა ორივე მატჩში ანგარიში კავკასიელებმა გახსნეს. თუმცა, მესამე შეხვედრაში, ეს პატივი თელასს ერგო. მე-3 წუთზე ირაკლი თოდუამ საჯარიმოში ნუკრი ჭუბურიძეს უპასა, რომელმაც ჯორჯიანსელები წინ გაიყვანა. ამის მერე თამაშმა მწვავე ხასიათი მიიღო და ორივე მეკარეს არაერთხელ მოუწია ოსტატობის გამოვლენა. ჯამბურიამ ორი რთული ბურთი მოიგერია, მერე კი  მანგოშვილი გააწბილა. კარირი თოდუას დარტყმულს გადაეფარა. კეკელიასა და თოდუას დარტყმებისას, ხარიხამ ორჯერ იხსნა კსუ-ს კარი. კავკასიელებმა შეტევებს სიმწვავე შემატეს, რასაც შედეგი მოჰყვა.  მე-15 წუთზე სიგუნავას პასი ბექაურმა გოლად აქცია, 1:1. ახლა თელასი გაცხარდა, მაგრამ კარირიმ თოდუას არ გაატანინა. ჯორჯიანსელთა მეკარე ჯამბურია, ფარცვანიასა და კობაიძის დარტყმებს გადაეფარა. ავთანდილ ასათიანის ბიჭებმა მეორე ტაიმი აქტიურად დაიწყეს და მალევე დაწინაურდნენ კიდეც. 24-ე წუთზე თოდუამ მეტოქის გადაცემა ჩაჭრა და კეკელიას გადააწოდა, რომელმაც ორ მეტოქეს დაასწრო და ეფექტური პასით თელასი დააწინაურა, 2:1. სამ წუთში თოფურიამ კარგი შანსი ვერ გამოიყენა. ჯორჯიანსელები მეხუთედ დაჯარიმდნენ, რაც იმას ნიშნავდა, რომ ძირითადი დროის თითქმის 13 წუთი უჯარიმოდ უნდა ეთამაშათ, მათ კარში 10-მეტრიანი დარტყმა რომ არ დანიშნულიყო. თელასის საქებრად უნდა ითქვას, რომ მათ არა მხოლოდ 13 წუთი, არამედ კიდევ ორი დამატებითი ტაიმის 6 (3-3) წუთიც უჯარიმოდ ჩაატარეს. თამაშმა გარდამავალი ხასიათი მიიღო და ორივე კართან არაერთი ხიფათი შეიქმნა, მაგრამ მეკარეებმა იყოჩაღეს. 35-ე წუთიდან კავკასიელებმა მეკარიანად შეუტიეს და სამ წუთში, სწორედ მეკარის ფორმით მოთამაშა საბა ტყელაშვილმა ანგარიში გაათანაბრა, 2:2. ამას მერე უკვე თელასმა შეუტია 5 კაცით, მაგრამ კინაღამ გოლი მიიღო. მატჩის ბოლო წუთზე მეკარე ჯამბურიამ სასწაული რეაქციის ხარჯზე, რთული ბურთი მოიგერია. პირველი და მეორე დამატებითი ტაიმების მიწურულს თელასს მოგების თითო შანსი ჰქონდა - კარირიმ თოფურიას მკვდარი ბურთი აუღო, 5 ჯარიმის გამო კსუ-ს კარში დანიშნული 10-მეტრიანი დარტყმა კი ცხომარიამ კარს ააცილა. გამარჯვებულის გამოსავლენად პენალტების სერია გახდა საჭირო. თელასის კიპერმა ჯამბურიამ ხუთიდან სამი პენალტი მოიგერია და თავის გუნდის მოგებაში (3:2) ლომის წვლილი დაიდო.

მართვესთან თბილისში, პენალტების სერიაში მოგების შემდეგ, ევროპის უნივერსიტეტის გუნდი მოწინააღმედეგეს უკვე ქუთაისში გაეჯიბრა. ევროპელები მეტოქეს ერთ-ერთი ლიდერის, აკაკი ჯანელიძის (რომელმაც დუბლი და საგოლე პასი მიითვალა) გარეშე დაუპირისპირდნენ, მაგრამ გამარჯვება მაინც შეძლეს. მე-15 წუთზე ქურხულის ჩინებული პასი გოგოხიამ შეირგო და ანგარიში გახსნა, 0:1. მალევე მართვეს წონასწორობის აღდგენის ორი შანსი ჰქონდა, მაგრამ... ზარნაძის გასროლა ევროპელთა მეკარე სვანიძემ მოიგერია, 5 ჯარიმის გამო დანიშნული 10-მეტრიანი დარტყმა შველიძემ კარს ააცილა. ქუთათურები გოგოხიამ დასაჯა და ტაიმის ბოლო წუთზე დუბლი გაიფორმა, 0:2. მართვემ მეორე ტაიმი აქტიურად დაიწყო, მაგრამ 26-ე წუთზე დედაქალაქელებმა მეკარის შეცდომით ისარგებლეს და გაბეხაძემ სხვაობა სოლიდური გახადა, 0:3. ქუთათურებმა ბუბულაშვილი-ხარაიშვილის ტანდემი ამოქმედეს, მაგრამ გოლის გატანა დაუგვიანდათ. 32-ე წუთზე ბუბულაშვილმა ერთი ბურთი გაქვითა. იმერლებს 8 წუთი ჰქონდათ მატჩის გადასარჩენად, მაგრამ მეტის გატანა ვეღარ შეძლეს. მართვე შინ 1:3 დამარცხდა და  ქვედა ლიგაში დაეშვა. ამ გუნდის ნაცვლად, ახალ სეზონში, ფუტსალის უმთავრეს ლიგაში ევროპის უნივერსიტეტი იასპარეზებს.