საქართველოს ფუტსალს ახალი ჩემპიონი ჰყავს, ეს თელასი ჯორჯიანსია, რომელმაც ახლახანს თასი მოიპოვა და 2021-22 წლების სეზონის ორივე ტიტულის მოგებით, დუბლი შეასრულა. შარშანდელისგან განსხვავებით, ფინალურ რაუნდში, ჩემპიონის გამოსავლენად, ამჯერად 4 მატჩი საკმარისი აღმოჩნდა. მესამე თამაშის მოგებით თელასი ოქროს მედლებს მიუახლოვდა, მაგრამ ზოგი ფიქრობდა, რომ მეოთხე შეხვედრას კავკასიელები მოიგებდნენ და ყველაფერს მეხუთე მატჩი გადაწყვეტდა, მაგრამ...

ფინალის ფინალში დიდებული სანახაობა შედგა. ორმხრივი შეტევები და ლამაზი ფინტები და ეფექტური გოლები ვიხილეთ, რომლის გვირგვინი ჩემპიონებისთვის საკადრისი დაჯილდოების ცერემონიალი გახლდათ. თუმცა, ამაზე ქვემოთ, მანამდე კი თანმიმდევრობას მივყვეთ.

თავიდანვე უნდა ითქვას, რომ კსუ-სა და თელასს შორის გამართულ ფინალური რაუნდის მეოთხე მატჩში, არაერთი საგოლე მომენტის მიუხედავად, სამივე გოლი სტანდარტულიდან გავიდა. თამაში სწრაფ ტემპში დაიწყო, 5-6 წუთის შემდეგ, თელასის უპირატესობა შესამჩნევი გახდა. გიორგაიას დარტყმული ხარიხამ აისხლიტა. კობაიძის გასროლა ჯამბურიამ მოიგერია. თოფურიას პასით ჭუმბურიძე მეურვეს გასცდა, მაგრამ ხელით დაიჭირა და ჯარიმა დაინიშნა. საჯარიმო დარტყმა თოდუამ უნაკლოდ შეასრულა, ცხრიანში გაიტანა და ანგარიში გახსნა, 0:1. თელასი ერთ გოლს არ დასჯერდა, კავკასიელებმაც შეუტიეს და თამაშმა მწვავე ხასიათი მიიღო.  თოდუას დუბლის შესრულება შეეძლო, კარირის კი დაასწრო, მაგრამ მისი თავური კარს ასცდა. მე-15 წუთზე ორივე გუნდს შეეძლო ანგარიშის შეცვლა, მაგრამ ჯორჯიანსელთაგან კეკელიამ და კსუ-დან ფარცვანიამ, დამაგვირგვინებელ ფაზაში მოიკოჭლეს. კავკასიელებმა შეტევებს სიმწვავე შემატეს და ამან შედეგი გამოიღო. ტაიმის ბოლო წუთზე მანგოშვილმა საჯარიმო ცხრიანში გაიტანა და წონასწორობა აღადგინა. საგოლე მომენტების სიუხვით, მეორე ტაიმი პირველს სჯობდა, მაგრამ უგოლოდ დასრულდა. 23-ე წუთზე კობაიძის გრძელი პასისას მანგოშვილმა მეკარე ჯამბურიასა და თოფურიას დაასწრო, მაგრამ მისი დარტყმული ბურთი მიზანს ასცდა. ორ წუთში წერეთლის გასროლას ჯამბურია გადაეფარა. თოდუას თელასის დაწინაურება შეეძლო, მაგრამ ახლო მანძილიდან მისი დარტყმული ბურთი კარირიმ მოიგერია. 27-ე წუთზე ჯამბურიამ სასწაული რეაქციით, ფარცვანიას თავური დარტყმა, ნახტომში თავით მოიგერია. 33-ე წუთზე კავკასიელებს ორგზის შეეძლოთ დაწინაურება, ხარატიშვილის გასროლა ჯამბურიამ მოიგერია, კობაიძის დარტყმული ძელმა აისხლიტა. მალევე ჭუმბურიძე ორ მეტოქეს გასცდა და კარშიც დარტყა, მაგრამ კარირიმ აიღო. ორ წუთში ჭანუყვაძის დარტყმულს ჯამბურია გადაეფარა. ძირითადი დრო ფრედ დასრულდა. პირველ დამატებით ტაიმშიც არაფერი შეცვლილა, მეორე 3-წუთიანი ტაიმში კი საოცარი გოლი, უფრო სწორად ავტოგოლი ვიხილეთ. თელასის კაპიტნის, შოთა თოფურიას დარტყმული ბურთი კარირის ფეხზე მოხვდა და კარში აღმოჩნდა, 1:2. დარჩენილ წუთნახევარში კავკასიელებს ერთი ჩინებული შანსი ჰქონდათ, მაგრამ ფარცვანიას დარტყმისას ჯამბურიამ მკვდარი ბურთი აიღო. თელასი ჯორჯიანსმა დამსახურებულად მოიგო და ქვეყნის ჩემპიონი გახდა.

დაჯილდოების ცერემონიალზე, საქართველოს ფეხბურთის ფედერაციის გენერალურმა მდივანმა დავით მუჯირმა და ფუტსალის ასოციაციის პრეზიდენტმა ლევან ცქიტიშვილმა, ფინალისტი და ახალი ჩემპიონი შესაბამისი მედლებით დააჯილდოვეს. ცერემონიალის ტრიუმფი, თელასი ჯორჯიანსისთვის საქართველოს ჩემპიონის თასის გადაცემა და ფოიერვერკი გახლდათ.

ორგანიზატორებმა სხვადასხვა ნომინაციაში სეზონის რჩეულებიც გამოავლინეს. საუკეთესოთა ჩამონათვალი ასეთია:

მეკარე: ალი ასლანი (თსუ)

მცველი: შოთა თოფურია (თელასი)

თავდამსხმელი: დავით ხეჩიკაშვილი (თელასი)

უნივერსალი: ნიკოლოზ კურტანიძე (პსპ)

მოთამაშე: ვახტანგ კეკელია (თელასი)

მწვრთნელი: ლევან კობაიძე

ბომბარდირი: ნიკა ხარაიშვილი (ქუთაისის მართვე; 26 გოლით)

მსაჯები: არსენ ნონიკაშვილი, ბაკურ ნინუა, გოჩა ტარუაშვილი, სოფიკო რიჟამაძე.