საკმაოდ საინტერესო გახლდათ ფუტსალის მთავარი ლიგის მეოთხე ტური, რომელმაც სატურნირო ცხრილში ცვლილებები განაპირობა და ახალი ლიდერიც მოგვევლინა. ამჯერად ცხრილს უკვე ერთპიროვნულად პსპ ლიდერობს, რომელიც ერთადერთი დაუმარცხებელი გუნდია. აღსანიშნავია ის, რომ ამ ტურის ორი შეხვედრა, ცენტრალურ მატჩად იყო მიჩნეული და ორივემ მოლოდინი გაამართლა.

ეს ტური ევროპის უნივერსიტეტსა და არმიას შორის შეხვედრით გაიხსნა. ლადო ბურდულის ბიჭებმა მატჩის სტარტზევე გამოაჩინეს ბრჭყალები, თუმცა გოლი დაუგვიანდათ. ევროპელებმა ნელ-ნელა თამაშს უმატეს და მე-8 წუთზე ანგარიშიც გახსნაც შეეძლოთ, მაგრამ გიორგი ქურხულის დარტყმისას, არმიელთა კიპერმა ვახტანგ ტერუნაშვილმა მკვდარი ბურთი მოიგერია. ნახევარ წუთში ტერუნაშვილმა საგოლე შეტევა წამოიწყო, რომელიც ლაშა ფოფხაძემ გოლით დააგვირგვინა, 0:1. შესვენებამდე დარჩენილ დროში და მეორე ტაიმის სტარტზე ორივე გუნდმა არაერთი სახიფათო დარტყმა შეასრულა, მაგრამ მეკარეებმა საიმედოდ ითამაშეს. 25-ე წუთზე არმიელებს ფორის გაორმაგება შეეძლოთ, მაგრამ ამირან ცხომარიას მიერ დარტყმული პენალტი ხარიხამ აისხლიტა. ორიოდე წუთში, ოთარ ბერეჩიკიძის გოლით არმიამ სხვაობა მაინც გაზარდა, 0:2. თუმცა, ბურდულის ბიჭებმა ეს არ იკმარეს და მომდევნი 7 წუთიან შუალედში, ბაკურ ნანეიშვილისა და ვანო ბექაურის გოლებით ანგარიშს სოლიდური სახე მისცეს, 0:4. ამას ევროპელებმა მხოლოდ პრესტიჟის ერთი გოლით უპასუხეს, რომელიც კახაბერ გოგოხიამ გაიტანა, 1:4. არმიელებმა ზედიზედ მეორე თამაში მოიგეს, 6 ქულით მეხუთე ადგილზე არიან და ქულით ჩამორჩებიან ნიუ ვიჟენ ჯორჯიანსს.

მეოთხეზე მყოფი ნიუ ვიჟენ ჯორჯიანსი თსუ-ს დაუხვდა, რომელიც ამ ტურამდე, კსუ-სთან ერთად თაალიდერი იყო. თამაში სწრაფ ტემპში დაიწყო, მეტოქეები კარში არაერთი დარტყმა გაცვალეს, მაგრამ გოლი მხოლოდ მე-8 წუთზე გავიდა - კახაბერ მაისაიამ ჯორჯიანსელები დააწინაურა, 1:0. შესვენებამდე 12 წუთი იყო დარჩენილი, მაგრამ ანგარიში აღარ შეცვლილა. მეორე ტაიმის საწყისი 12 წუთიც მშრალად მიილია, მერე კი ხუთი გოლი გავიდა. შესვენების შემდეგ სტუდენტებმა თამაშსა და კარში დარტყმებს უმატეს. ჯორჯიანსელთა კიპერმა სამჯერ აშკარა გოლისგან იხსნა გუნდი. თსუ-ს ამ მონდომებას უშედეგოდ არ ჩაუვლია, 32-ე წუთზე გიორგი ჩიმაკაძე თავისივე წამოწყებული შეტევა გოლით დაასრულა, 1:1. ნახევარ წუთში ირაკლი თოდუას პასით გიორგი ქურდაძემ ნიუ ვიჟენ ჯორჯიანსი წინ გაიწყვანა, 2:1. სტუდენტები კვლავაც ანგარიშის გათანაბრებას შეეცადნენ და მეკარიანადაც შეუტიეს, მაგრამ 37-ე წუთზე ქურდაძის პასით ნუკრი ჭუმბურიძე მეკარესთან პირისპირ გავიდა და გადამწყვეტი გოლი გაიტანა, 3:1. კიდევ 2 წუთში გიორგი სილაგავამ სხვაობა გაზარდა, 4:1. ბოლოს ჩიმაკაძემ დუბლით ერთი ბურთი გაქვითა, 4:2. ჯორჯიანსელებმა იმარჯვეს და მეოთხე ადგილზე დარჩნენ, თსუ კი მესამეზე დაქვეითდა.

ამ ტურში ყველაზე მეტი, 8 გოლი კსუ-სა და პსპ-ს შეხვედრაში გავიდა.  ეს მეტოქეები გასულ სეზონში სამჯერ გაეჯიბრნენ და თითოჯერ წაგება, მოგება და ფრე იგემეს. ამ გუნდებმა ამჯერადაც მაღალი დონის თამაში გვიჩვენეს. მით უმეტეს,  თსუ-ს მარცხის გამო, უკვე ცხადი იყო, რომ წყვილში გამარჯვებული ცხრილში პირველ ადგილს გაინაღდებდა. კსუ სწრაფი გოლით დაწინაურდა - მე-40 წამზე, ლაშა სიგუნავამ კსუ დააწინაურა, 1:0. ამას ბესიკ არველაძის ბიჭები გაახელა, მათ მეტოქეე ზეწოლა გააძლიერეს და შედეგმაც არ დაახანა. მე-4 წუთზე ნიკოლოზ კურტანიძემ, მარცხენა ფეხით ნახევარბრუნში ტურის საუკეთესო გოლით წონასწორობა აღადგინა, 1:1. ფარმაცევტები ამას არ დასჯერდნენ და მე-13 წუთზე ნიკოლოზ კოპლატაძემ პსპ წინ გაიყვანა, 1:2. კავკასიელებმაც უმატეს თამაშს, მაგრამ პსპ-მ ფორის გაზრდა შეძლო. მე-18 წუთზე ლევან სვანიძემ ანგარიში შეცვალა, 1:3. მეორე ტაიმიც  საინტერესოდ წარიმართა. ჯერ იყო და კურტანიძისა და სვანიძის დარტყმებს კსუ-ს მეკარე თორნიკე ბუკია გადაეფარა, მერე კი კავკასიელთა ჯერიც დადგა. 23-ე წუთზე ლაშა სიგუნავამ ზუსტი დარტყმით დუბლი მიითვალა, 2:3. ლევან კობაიძის ბიჭები ფრეს მიუახლოვდნენ, მეტად მოინდომეს და ეს შეძლეს კიდეც. მატჩის ბოლო 5 წუთი დრამატულად წარიმართა. კსუ ვა-ბანკზე წავიდა და მეკარინად შეუტია და ამან გაამარლა კიდეც. 36-ე წუთზე სიგუნავას პასით ლაშა ჭანუყვაძემ წონასწორობა აღადგინა, 3:3. დაძაბულობამ კულმინაციას მიაღწია და ბოლოსწინა წუთზე ორი გოლი გავიდა. ორივე პსპ-მ მიითვალა. გადამწყვეტი გოლი კურტანიძემ მიითვალა და დუბლი შეასრულა, 3:4. კსუ შეტევაში კვლავ მეკარიანად წავიდა, პსპ-მ იერიში ჩაჭრა და მალხაზ მურცხვალაძემ შორეული დარტყმით ცარიელ კარში შეაგორა ბურთი, 3:5. ამ მოგებით ფარმაცევტები ერთპიროვნულად გალიდერდნენ. კსუ და თსუ კი 9-9 ქულით მეორე-მესამე ადგილებს იყოფენ. მომდევნო ტურში ცენტრალურ მატჩად, სწორედ ამ გუნდების დაპირისპირებაა მიჩნეული.

ლიგის დებიუტანტმა ქუთაისმა სასტარტო ტურში კსუ შინ ცხარე ბრძოლა გაუმართა და უქულოდ მყოფი ქუთათურები ილიაუნთან მეორე საშინაო მატჩში გეგმავდნენ პირველი ქულების მოპოვებას, მაგრამ სტუდენტებმა არ დაანებეს და 20-წამიანი შუალედით ორი უპასუხო გოლი გაიტანეს. მე-6 წუთზე ომარ ასაშვილმა გახსნა ანგარიში,. მალევე ლაშა კურტანიძემ მასპინძელთა გადაცემა ჩაჭრა და ბურთი კარში გაგზავნა, 0:2. ილიაუნმა ზედიზედ მეორე მატჩი მოიგო და არმიასთან ერთად მეხუთე-მეექვსე ადგილებს იყოფს. ქუთაისი და ევროპის უნივერსიტეტი კი უქულოდ ბოლო ადგილებზე არიან.