ფუტსალში მთავარი ლიგის პირველობა ძალას იკრებს და ახალ ფაზაში შედის. ამის დასტურად, მეხუთე ტურის მატჩებშიც დრამატული ხასიათი და განვითარებული მოვლენებიც გამოდგება. ერთი შეხედვით, ეს ტური ლოგიკური იყო და მოულოდნელი შედეგიც არ დაფიქსირებულა, მაგრამ ეს მხოლოდ ერთი შეხედვით...  ორ შეხვედრაში სამჯერ ქამბექი დაფიქსირდა და ამ ტურს ქამბექების ტურიც შგვიძლია ვუწოდოთ

ტურის ცენტრალურ მატჩად, მეორეადგილოსნების, კსუ-სა და თსუ-ს დაპირისპირება იყო მიჩნეული, მაგრამ პსპ-სა და ევროპის უნივერსიტეტის მატჩმა უფრო დრამატული გამოდგა. სხვა თუ არაფერი, ამ მატჩში ორივე გუნდმა ქამბექი შეძლო. წყვილში ფავორიტი ცხრილის ლიდერი პსპ იყო და ბევრი ფიქრობდა, რომ ფარმაცევტებს დიდი ჯაფა არ დაადგებოდათ, მაგრამ... ფუტსალის ჩემპიონატის დონის მატების დასტურია ის, რომ ლიდერს აუტსაიდერთან მოგება გარანტირებული არ აქვს და ამჯერად სწორედ ასე მოხდა. ფარმაცევტებმა ევროპელებს სტარტზე სწრაფი ტემპი შესთავაზეს. სტუდენტებმა ეს გამოწვევა მიიღეს, მეტოქეს ტემპში აჰყვნენ და თავიდანვე დააფიქსირეს, რომ უბრძოლველად არაფერს დათმობდნენ. უფრო მეტიც, ევროპელებმა კინაღამ ლიდერის შეცვლაც კი მოახერხეს, მაგრამ ეს მეორე ტაიმში იყო და სჯობს თანმიმდევრობას მივყვეთ. მე-2 წუთზე პსპ წინ გავიდა, მალხაზ მურცხვალაძემ მახვილი კუთხიდან ანგარიში გახსნა, 1:0. ევროპელებმა მოწინააღმდეგეს წუთნახევარში უპასუხეს - გოლი გიორგი ჩოხელმა გაიტანა, 1:1. დაძაბული თამაში და გარდამავალი უპირატესობა ტაიმის ბოლომდე გაგრძელდა. მე-18 წუთზე თევზაძემ სტუდენტების იერიში ჩაჭრა, ბურთი ნიკოლოზ კურტანიძეს მიუვიდა და პსპ შესვენებაზე დაწინაურებული გავიდა, 2:1. მეორე ტაიმი ფარმაცევტების გოლით დაიწყო.  მეორმოცე წამზე მელიტონ ახალაიამ მეტოქის შეცდომით ისარგებლა და პსპ-ს ფორა ორამდე გაიზარდა, 3:1. სტუდენტები ამას არ შეეგუენ, მეტოქეზე ზეწოლა გააძლიერეს და ქამბექი შემოგვთავაზეს. 23-ე წუთზე კუპრეიშვილმა ფარმაცევტებს იერიში ჩაჭრა და ჩოხელმა დუბლი მიითვალა, 3:2. სტუდენტებმა კონტრშეტევაზე თამაში გააგრძელეს და 24-ე წუთზე გიორგი დიაკვნიშვილმა წონასწორობა აღადგინა, 3:3. ორმოც წამში დიაკვნიშვილმა დუბლი მიითვალა და უნივერსიტეტელები წინ გაიყვანა, 3:4. ოთხ წუთში ჩოხელმა ჰეთ თრიკი შეასრულა, 7 გოლით ბომბარდირთა დავას სათავეში მოექცა და სტუდენტებს ორბურთიანი ფორა შესძინა, 3:5. მერე პსპ-ს ჯერი დადგა. ბესიკ არველაძის ბიჭებმა, მატჩის ბოლო 8 წუთში ქამბექი შეძლეს. 32-ე წუთზე ევროპელთა კარში დანიშნული პენალტი ნიკოლოზ კურტანიძემ გოლად აქცია, 4:5. ოთხ წუთში მელიტონ ახალაიამ სტუდენტების საჯარიმოში შექმნილი არეულობით ისარგებლა და წონასწორობა აღადგინა, 5:5. ზუსტად წუთში ფარეცევტების შეტევისას, ნიკოლოზ კურტანიძის გამჭოლი პასი ლევან სვანიძემ გოლად აქცია, 6:5. პსპ-მ რთული მატჩი მოიგო და ცხრილში პირველობა შეინარჩუნა.

თსუ და კსუ გასულ სეზონში 3-ჯერ დაუპირისპირდნენ ერთმანეთს. პირველი თამაში კავკასიელებმა დიდი ანგარიშით მოიგეს (5:0), მომდევნო ორი მატჩში კი საბრძოლო ფრეები (3:3 და 4:4) დაფიქსირდა. ამჯერად ეს გუნდები 9-9 ქულით მეორე-მესამე ადგილებს იყოფდნენ და თამაში ორივესთვის რთული გამოდგა. დაძაბულობის გამო მეტოქეებმა ფრთხილი, ჩაკეტილი თამაში ამჯობინეს და საგოლე ეპიზოდების სიმწირეც ამით აიხსნება. მატჩის მიწურულს თსუ-ს დაწინაურების ორი რეალური შანსი ჰქონდა, მაგრამ ნოდარ ქურცაძისა და საბა მაჩიტიძის დარტყმებს შედეგი არ მოჰყოია. მეორე ტაიმის ნახევარიც მშრალად მიილია. 31-ე წუთზე ლუკა ფარცვანიამ მარცხენა ფლანგზე ორი მეტოქე ჩამოიცილა და ნიკა მანგოშვილს უპასა, რომელმაც ანგარიში გახსნა, 0:1. კავკასიელები დაწინაურდნენ, ამან თსუ გაახელა და მათ შეუტიეს. კავკასიელთა მეკარე თორნიკე ბუკიამ ზედიზედ ორჯერ იხსნა კარი, 37-ე წუთზე კი ლაშა სიგუნავას საგოლე გადაცემაც გაუკეთა, 0:2. ამ გოლით სიგუნავა ბომბარდირთა ცხრილში ლიდერ ჩოხელს გაუთანაბრდა. კსუ-მ მოიგო და მეორე ადგილი შეინარჩუნა, თსუ კი მესამედან მეხუთე საფეხურზე დაეშვა.

გასულ სეზონში ჯორჯიანსელებმა ილიაუნს  სამჯერ სძლიეს, მაგრამ არცერთხელ ჰქონიათ იოლი გასეირნება და ამჯერადაც ასე იყო. ავთანდილ ასათიანის ბიჭებს სტუდემტები მჭიდროდ ეთაშნენ და პირველი ტაიმი თანაბარ თამაშში, მშრალად მიილია. შესვენების შემდეგ ნიუ ვიჟენის უპირატესობა გამოიკვეთა, რაც შედეგშიც აისახა. 25-ე წუთზე გიორგი ქურდაძემ დავით ხეჩიკაშვილთან კედელი გათამაშა და ანგარიში გახსნა, 0:1. სტუდენტები ვა-ბანკზე წავიდნენ და მეკარიანად შეუტიეს, მაგრამ წონასწორობის აღდგენა ვერ შეძლეს. პირიქით, მატჩის დასრულებამდე ნახევარი წუთით ადრე, გიორგი სილაგავამ საჯარიმო დარტყმა გოლად აქცია, 0:2. ნიუ ვიჟენ ჯორჯიანსმა ზედიზედ მეორე მატჩი მოიგო და მე-3 ადგილზე აინაცვლა, ილიაუნი კი მეექვსეზე დარჩა.   

ლიგის დებიუტანტმა ქუთაისმა ორი განსხვავებული ტაიმი ჩაატარა. იმერლებმა არმიასთან მატჩი ძალზე აქტიურად დაიწყეს და ნახევარწუთიან შუალედში ორი გოლით დაწინაურდნენ. ბაკურ გულუამ ანგარიში გახსნა, მერე კი ირაკლი გვეტაძემ ფორა გააორმაგა, 0:2. არმიელები გაცხარდნენ და მწვავედაც შეუტიეს, მაგრამ მე-10 წუთზე გულუამ ქუსლით დუბლი შეასრულა, 0:3. ლადო ბურდულის ბიჭები არ გატყდნენ და შესვენებამდე წონასწორობის აღდგენა, საბოლოოდ კი ქამბექი მოახერხეს. ჯერ ოთარ ბერეჩიკიძემ, მერე ირაკლი ლატარიამ, ბოლოს კი გურამ ხაჭაპურიძემ, შორეული ძლიერი დარტყმებით გაიტანეს, 3:3. მეორე ტაიმში ბაკურ ნანეიშვილმა არმიელები წინ გაიყვანა, 4:3. მალევე ირაკლი ლატარიამ თავისი გუნდის ფორა გაზარდა, 5:3. ქუთათურები მატჩის გაარჩენას შეეცადნენ და მეკარის თანხლებით შეუტიეს, მაგრამ არმიელთა კიპერმა ვახტანგ ტერუნაშვილმა არაერთხელ იხსნა კარი. იმავე ტერუნაშვილმა, 38-ე წუთზე შორეული, ზუსტი დარტყმით თავისი საჯარიმოდან ცარიელ კარში გაიტანა, 6:3. არმიელებმა ზედიზედ მესამე მატჩი და ცხრილში მეოთხე ადგილზე აინაცვლეს.