ფუტსალის უმთავრეს ლიგის, მეშვიდე ტურიც თავისი შტრიხებით გამოირჩა. ტური უხვგოლიანი გამოდგა, 28 გოლი გავიდა, რაც ერთ თამაშში 7 გატანილი ბურთის ტოლფასია და მაღალი მაჩვენებელია. ამჯერად სულ სხვა არმია ვიხილეთ, არმიელებმა ლიდერთა ტრიო დაშალა და კსუ სამეულს დააშორა. მესამეზე თსუ აღზევდა, რომელმაც ზედიზედ მეორედ მოიგო. პირველი წრე ამ ტურით დასრულდა და ცხრილს ორი ლიდერი ჰყავს პსპ და ნიუ ვიჟენ ჯორჯიანსი. ვნახოთ რას გვიქადის მეორე წრე, მანამდე კი ამ ტურის მატჩები მიმოვიხილოთ.

ყველაზე დიდ ინტერესს არმიასა და კსუ-ს შორის დაპირისპირება იწვევდა, ტურიც ამ თამაშით დაიწყო. მატჩი, რომელმაც მოლოდინი აშკარად გაამართლა, გარდამავალი უპირატესობით წარიმართა და უხვგოლიანი გამოდგა. შეხვედრის სტარტზე კავკასიელებმა მოიპოვეს უპირატესობა, მაგრამ გოლი დაუგვიანდათ. მე-8 წუთზე, კავკასიელთაგან მეკარე თორნიკე ბუკიამ იერიში დაიწყო, სოლო-რეიდისას ორი მეტოქე ჩამოიცილა და ანგარიში გახსნა, 0:1. არმიელები გაცხარდნენ თამაშის სადავეებს დაეუფლნენ და დაწინაურებაც შეძლეს. 5 წუთში ირაკლი ლატარიამ მახვილი კუთხიდან წონასწორობა აღადგინა. კიდევ 5 წუთში ბაკურ ნანეიშვილმა არმია წინ გაიყვანა, 2:1. ტაიმის დასრულებამდე ნახევარი წუთით ადრე ამირან ცხომარიამ არმიელთა ფორა გააორმაგა, 3:1. კავკასიელებმა ქამბექი ჩაიფიქრეს და განახორციელეს კიდეც. 33-ე წუთზე ლევან კობაიძემ სიგუნავას გამჭოლი პასი გოლად აქცია, 3:2. ზუსტად წუთში სიგუნავამ მახვილი კუთხიდან ანგარიში გაათანაბრა, 3:3. მერე არმიელთა ჯერი დადგა, 29-ე წუთზე გიგა ბერაიამ არმია წინ გაიყვანა, 4:3. კავკასიელებმა კვლავ მეკარის თანხლებით შეუტიეს, რითაც არმიამ ისარგებლა და კონტრიერიშისას, 32-ე წუთზე ოთარ ბერეჩიკიძემ სხვაობა გაზარდა, 5:3. სტუდენტები მდევრის როლს არ შეეგუენ, მათ უფრო მწვავედ შეუტიეს და კიდე ერთი ქამბექის შეძლეს. კობაიძემ დუბლით სხვაობა მინიმუმამდე შეამცირა. 36-ე წუთზე გიორგი ტიკურიშვილმა ანგარიში გაათანაბრა, 5:5. ორ წუთში სიგუნავამ მეტოქის იერიში ჩაჭრა, ალექსანდრე ორაგველიძემ კი კსუ წინ გაიყვანა, 5:6. არმიელებმა ფარ-ხმალი არ დაყარეს და ბოლოსწინა წუთზე გიგა ბერაიამ დუბლით წონასწორობა აღადგინა და უაღრესად დაძაბული მატჩი საბრძოლო ფრით, 6:6 დასრულდა. ამ ფრით არმია მეხუთე ადგილზე დარჩა, კსუ ლიდერთა ტრიოს დაშორდა და მეოთხე საფეხურზე დაეშვა.

არანაკლებ უხვგოლიანი გამოდგა სტუდენტური დერბი. ლიგის დებიუტანტ ევროპის უნივერსიტეტთან მატჩში, თსუ-მ სტარტზევე მოიპოვა ეპირატესობა. ზურაბ ლუკავამ მე-5 წუთზე გახსნა ანგარიში. დავით ბობოხიძის ბიჭები ამას არ დაჯერდნენ, 11 წუთში ლუკავას გამჭოლი გადაცემა, საბა მაჩიტიძემ გოლად აქცია, 2:0. სამ წუთში თსუ-ს ფორა, ჯანიკო გიორგაიამ სამამდე გაზარდა, 3:0. თსუ-ელები შეტევაში გაერთნენ, თანაც მეკარის თანხლებით უტევდნენ, რითაც ევროპელებმა ისარგებლეს. ტაიმის ბოლო წუთზე გიორგი ჩოხელმა თსუ-ს შეტევა ჩაჭრა, გიორგი ქურხულმა კი სხვაობა შეამცირა, 3:1. მეორე ტაიმშიც თსუ დომინირებდა. 33-ე წუთზე ჯერ ბორის ესებუამ, მალევე გიორგი ჩიმაკაძემ, გაიტანა და სხვაობაც სოლიდური გახდა, 5:1. ბოლო 5 წუთში 5 გოლი გავიდა. ევროპელებმა მეკარიანად შეუტიეს, 35-ე წუთზე გიორგი ქურხულმა დუბლი მიითვალა და კიდევ ერთი ბურთი გაქვითა, 5:2. წუთში კახაბერ გოგოხიამ სხვაობა კიდევ შეამცირა, 5:3. მალევე ნოდარ ქურცაძემ გაიტანა და სხვაობა სამამდე გაზარდა, 6:3. ბოლო წუთზე ანგარიში კიდევ ორჯერ შეიცვალა. ჯერ გიორგი დიაკვნიშვილმა გაიტანა, 6:4. თსუ-ელთა კაპიტანმა გიორგი ჩიმაკაძემ კი ტაბლოზე საბოლოო შედეგი დააფიქსირა, 7:4. ამ გამარჯვებით თსუ-მ მეოთხედან მესამე საფეხურზე აინაცვლა.

ილიაუნისა და პსპ-ს შეხვედრა ღიად და სწრაფ ტემპში დაიწყო. მეტოქეებმა ორი-ორი საგოლე მომენტი ვერ გამოიყენეს. მე-4 წუთზე კი მერაბ თევზაძემ თავისსავე წამოწყებული იერიში გოლად აქცია და ანგარიში გახსნა, 0:1. შემდეგ თამაშმა უფრო მწვავე ხასიათი მიიღო და საგოლე მომენტიც არაერთი იყო, მაგრამ შესვენებამდე ანგარიში აღარ შეცვლილა. 27-ე წუთზე ლევან სვანიძისა და ნიკოლოზ კოპლატაძის კომბინაცია, ამ უკანასკნელმა გოლით დააგვირგვინა, 0:2. წინ კიდევ არასრული 13 წუთი იყო, სტუდენტები თამაშის გადარჩენას შეეცადნენ, მაგრამ ანგარიში აღარ შეცვლილა. მიუხედავად იმისა, რომ გასულ სეზონში ილიაუნმა ორჯერ მოუგო ფარმაცევტებს, ამჯერად პსპ-მ სტატისტიკა სათავისოდ შეცვალა და ამ მოგებით ცხრილს სათავეში მოექცა, მაგრამ არა ერთპიროვნულად...

ქუთაისმა მოქმედ ჩემპიონ ნიუ ვიჟენ ჯორჯიას უმასპინძლა. თამაში სტუმართა უპირატესობით წარიმართა, მაგრამ თბილისელებს გოლი დაუგვიანდათ. მე-11 წუთზე დავით ხეჩიკაშვილის პასით, ირაკლი თოდუამ გახსნა ანგარიში, 0:1. შესვენებამდე ანგარიში არ შეცვლილა. მეორე ტაიმის სტარტზე, გიორგი ქურდაძის გამჭოლი გადაცემა ნიკოლოზ გაბრიჩიძემ გოლად აქცია, 0:2. მატჩის ბოლოსწინა წუთზე, ქურდაძემ ისევ გამჭოლი პასით მოძებნა გაბრიჩიძე და მანაც დუბლი მიითვალა, 0:3. ამ მოგებით ავთანდილ ასათიანის ბიჭებმა ლიდერობა შეინარჩუნეს. ნიუ ვიჟენ ჯორჯია პსპ-სთან ერთად ცხრილს სათავეში უდგას.