თსუ შეაჩერეს, პსპ და კსუ კი ვერა... ორი მოგების შემდეგ, თსუ ქულების დაკარგვას ვერ ასცდა. არმიელებმა წინა ტურში, კსუ-ს კი დააკარგვინეს ქულები, მაგრამ პსპ-ს შეჩერება ვერ შეძლეს. კსუ ქუთაისში აგებდა, მაგრამ კავკასიელებმა ქამბექი მოახერხეს. სულ სხვა თემაა ნიუ ვიჟენ ჯორჯიანსი, ავთანდილ ასათიანის ბიჭებს 6-მატჩიანი წაუგებელი სერია აქვთ და აქედან ბოლო 5 თამაში ზედიზედ მოიგეს. ასეთია ფუტსალის მთავარი ლიგის მერვე ტურის შტრიხები, უფრო ვრცლად კი თანმიმდევრობას მივყვეთ.

გასულ სეზონში, თსუ-მ ილიაუნს ჩემპიონატის სამივე მატჩი მოუგო. ამ სეზონის სასტარტო ტურშიც თსუ-მ იმარჯვა, მაგრამ ეს მხოლოდ წარსულის სტატისტიკაა. ამ გუნდების სტუდენტური დერბი, ამჯერად უფრო დრამატული გამოდგა და ილიაუნელებს მოგების ჩინებული შესაძლებლობა ჰქონდათ, მაგრამ... თსუ-ელებმა პირველივე წუთებში პრესინგით შეავიწროეს მეტოქე და ამით შეეცადნენ უპირატესობის დაუფლებას. თუმცა, ილიაუნი მაინც დაწინაურდა. მე-3 წუთზე, უწყინარ სიტუაციაში, ომარ ასაშვილმა მეტოქეს ბურთი აართვა და ანგარიში გახსნა, 1:0. თსუ-ც არ იყო უქმად, ჩიმაკაძესა და ქურცაძეც შეეძლოთ წონასწორობის აღდგენა, მაგრამ უშედეგოდ. გოლმა ილიაუნელებს ძალა შემატა და უპირატესობა მათ დარჩათ. თსუ-მ თამაშში სიხისტეს უმატა, 5 გაფრთხილება არ იკმარა და მათ კარში ორი პენალტი დაინიშნა. 10-მეტრიანი საჯარიმო დარტყმა, მე-12 წუთზე მეკარე ბექა გოგსაძემ ააცილა, 3 წუთში კაპიტან ნიკა გვაზავას დარტყმული პენალტი მეკარე თორნიკე დვალიშვილმა ძელის დახმარებით მოიგერია. ილიაუნმა ფორის გაზრდის ორი შანსი ქარს გაატანა და მეორე ტაიმი ისევ მინიმალური უპირატესობით დაიწყო. შესვენების შემდეგ თამაში გარდამავალი უპირატესობით წარიმართა და ანგარიში მოგვიანებით შეიცვალა. 35-ე წუთზე ბორის ესებუამ მეტოქეს ბურთი აართვა და ანგარიში გაათანაბრა, 1:1. დარჩენილ დროში არაფერი შეცვლილა და სტუდენტურ დერბიში მეტოქეები თითო ქულას დასჯერდნენ. ზედიზედ ორი მოგების შემდეგ, ამ ფრით, თსუ მესამედან მეოთხე საფეხურზე დაქვეითდა, ილიაუნი კი მეექვსე ადგილზე დარჩა.

ნიუ ვიჟენ ჯორჯიანსმა ლიგის დებიუტანტი ევროპის უნივერსიტეტს, სასტარტო ტურში დიდი ანგარიშით 7:3 მოუგო და პირველ ტაიმში სამი გოლი გაუტანა. ამჯერად კი პირველ ნახევარში მხოლოდ ერთ გოლს დასჯერდა. დიდი უპირატესობის მიუხედავად, ჯორჯიანსელებს გოლი დაუგვიანდათ, რაც ევროპელთა მეკარე ბაკურ სანიკიძის დამსახურებაა. მე-15 წუთზე გიორგი ქურდაძის კარგი პასით, ვახტანგ კეკელიამ ანგარიში გახსნა, 0:1. მეორე ტაიმშიც ნიუ ვიჟენ ჯორჯიანსი დომინირებდა. 33-ე წუთზე ქურდაძის დარტყმული მეკარე სანიკიძემ მოიგერია, დამატებაზე ირაკლი თოდუამ იმარჯვა და 0:2. სტუდენტები ვა-ბანკზე წავიდნენ, მეკარის თანხლებით შეუტიეს და დაისაჯნენ კიდეც. 38-ე წუთზე გიორგი ქურდაძემ საკუთარი საჯარიმოდან, შორეული დარტყმით საბოლოო ანგარიში დააფიქსირა, 0:3. ჯორჯიანსელებმა ამ მოგებით ლიდერობა შეინარჩუნეს, ევროპელები კი ბოლოსწინა ადგილზე დარჩნენ.

ტურის ცენტრალურ მატჩად არმიისა და პსპ-ს დაპირისპირება იყო მიჩნეული. თამაში ცოცხლად და საინტერესოდ დაიწყო. არიელებმა თავიდანვე აგრძნობინეს მეტოქეს, რომ ქულათა მაქსიმუმისთვის იბრძოლებდნენ. თუმცა, ფარმაცევტებმაც გამოაჩინეს ბრჭყალები, ლევან სვანიძემ მე-4 წუთზე გახსნა ანგარიში გახსნა, 6 წუთში კი დუბლი შეასრულა და პსპ-ს ფორა გააორმაგა, 0:2. არმიელებმა ბრძოლა გააგრძელეს და მე-15 წუთზე ამირან ცხომარიას გამჭოლი პასისას, გიგა ბერაიამ ქუსლით გაიტანა, 1:2. არმია ფრეს შეცადა, მაგრამ ფარმაცევტებმა ბურთის კონტროლი მოახერხეს და ტაიმის ბოლო წუთზე ნიკოლოზ კურტანიძემ ორბურთიანი ფორა აღადგინა, 1:3. შესვენებამდე 8 წამით ადრე, გაფრთხილებების სიმრავლის გამო, პსპ-ს კარში 10-მეტრიანი საჯარიმო დარტყმა დაინიშნა, რომელიც ცხომარიამ გოლად აქცია, 2:3. მეორე ტაიმში ფარმაცევტების პირველვე იერიში შედეგიანი აღმოჩნდა, მელტონ ახალაიამ პსპ-ს ორბურთიანი ფორა აღადგინა, 2:4. ზუსტად წუთში ნიკოლოზ კურტანიძემ მეორეც გაიტანა, ბომბარდირთა ცხრილში გალიდერდა და მატჩის ბედიც გადაწყვიტა, 2:5. არმიელებმა მხოლოდ ერთი ბურთი გაქვითეს, 23-ე წუთზე ბერეჩიკიძემაც დუბლი შეასრულა, 3:5. პსპ-მ იმარჯვა და ჯორჯიანსელებთან ერთად, ცხრილის თანალიდერად დარჩა.

ლიგის დებიუტანტმა ქუთაისი ახლოს იყო სენსაციის ავტორი გამხდარიყო. იმერლებმა კსუ-ს უმასპინძლეს და ტაიმნახევრის განმავლობაში 2 მშრალი გოლით უგებდნენ. ქუთათურებმა თავიდანვე გამოაჩინეს ბრჭყალები და მე-4 წუთზე ბაკურ გულუამ ანგარიში გახსნა, 1:0. ამას კსუ არ შეეგუა და სტუმრებმაც შეუტიეს, მაგრამ უშედეგოდ. თამაში გარდამავალი უპირატესობით წარიმართა. მე-16 წუთზე სერგეი პიჩუგინმა იმერლების ფორა გააორმაგა, 2:0 და ტაიმიც ასე დასრულდა. კავკასიელებმა მეორე ნახევარში უკეთესად ითამაშეს და ეს დაუფასდათ კიდეც. 25-ე წუთზე, ლუკა ფარცვანიას გაძევების გამო, სტუმრები ორი წუთი კაცნაკლულნი დარჩნენ. ქუთათურები ფორის გაზრდას შეეცადნენ, მაგრამ კსუ-მ არა თუ გაუძლო, არამედ მეკარიანად შეუტია და ზედიზედ 4 გოლის გატანით, ქამბექიც გაახერხა. 31-ე წუთზე ლაშა სიგუნავამ სხვაობა მინიმუმამდე შეამცირა, ორ წუთში გიორგი ტიკურიშვილმა წონასწორობა აღადგინა, 2:2. კიდევ 5 წუთში გარი წერეთელმა სტუმრები წინ გაიყვანა, 2:3. მატჩის ბოლოსწინა წუთზე ნიკა ხარატიშვილმა თბილისელთა ფორა გააორმაგა, 2:4. ამას ქუთათურებმა ბოლო წუთზე ანდრეი ნენაშევის გოლით უპასუხეს, 3:4. კსუ-მ იმარჯვა და ცხრილში მესამე ადგილი შეინარჩუნა.