ფუტსალის თასი - არმიას შვიდეული დაემატა


ფუტსალის თასის გათამაშება 1/8 ფინალური მატჩებით გაიხსნა. მონაწილე 17 გუნდს შორის, წილისყრის შედეგად, 8 წყვილი გამოიკვეთა. თავიდანვე გაცხადდა, რომ დებულების მიხედვით, წილისყრის მსვლელობისას, დოლურაში დარჩენილი ერთადერთი გუნდი 1/4 ფინალში ავტომატურად გავიდოდა და ეს პატივი არმიას ერგო. შედეგად, 1/4 ფინალის 7 გუნდი, 24-25 ნოემბერს გამართული 7  მატჩში გამოიკვეთა. საგულისხმოა ის, რომ 1/4 ფინალში გასულ გუნდებს შორის, ლიგა-2-ის ერთადერთი წარმომადგენელი სპორტუნი გახდა. ფუტსალის თასზე, მომავალში კიდევ არაერთი მოულოდნელობა გველის. მანამდე კი სჯობს, თანმიმდევრობას მივყვეთ და 1/8 ფინალის საინტერესო მატჩები მოკლედ მიმოვიხილოთ.

თსუ-ელებმა 5 უპასუხო გოლის გატანით, საქართველოს უნივერსიტეტთან მატჩის ბედი პირველ ტაიმშივე გადაწყვიტეს. დავით ბობოხიძის ბიჭებმა დიდი ანგარიშით 9:2 მოიგეს. თსუ-დან გიორგი ჩიმაკაძემ, ბორის ესებუამ და საბა ეგრისელაშვილმა დუბლები შეასრულეს, ჯანიკო გიორგაიამ კი ჰეთ თრიკი გაახერხა. საქართველოს უნივერსიტეტიდან თითო გოლი, ბექა მურღულმა და მიქაელ იორამაშვილმა გაიტანეს.

ილიაუნს ქვედალიგოსანი, მაგრამ გამორჩეულიო გორი ერგო მეტოქედ. სტუდენტებს გოლი დაუგვიანდათ, მე-12 წუთზე ომარ ასაშვილმა გახსნა ანგარიში (1:0) და ტაიმი ასე დასრულდა. შესვენების შემდეგ, 34-ე წუთზე, გორელთაგან ნიკა კალხიტაშვილმა წონასწორობა აღადგინა, 1:1. მატჩის ბოლოსწინა წუთზე, ლაშა კურტანიძის გატანილი ბურთით, ილიაუნმა 2:1 იმარჯვა. 

კსუ-სა და ევროპის უნივერსიტეტი-2-ს შორის გამართულ მატჩში ფავორიტად კავკასიელები იყვნენ მიჩნეულნი და ეს მოლოდინი გამართლდა კიდეც. ლევან კობაიძის ბიჭებმა ევროპელებს სოლიდურად, 5:2 მოუგეს. მართალია, ანგარიში ევროპელთა მეორე გუნდმა გახსნა, მაგრამ, ამის მერე კავკასიელები მდევრის როლში აღარ ყოფილან. კსუ-დან ალექსანდრე ორაგველიძემ ჰეთ თრიკი შეასრულა, ნოდარ ქურცაძემ და გიორგი ტიკურიშვილმა თითო ბურთი გაიტანეს. ევროპელთაგან გიორგი ცირღილაძემ დუბლი შეასრულა.

ევროპის უნივერსიტეტის მთავარმა გუნდმა პსპ-ს დიდი წინააღმდეგობა გაუწია. სტუდენტებმა პირველი ტაიმი 4:2 წააგეს, მაგრამ შესვენების შემდეგ ანგარიშიც გათანაბრება შეძლეს. თუმცა, ფარმაცევტებმა მატჩის სადავეები არ დათმეს და 7:5 იმარჯვეს. პსპ-დან ნიკოლოზ კურტანიძემ დუბლი შეასრულა, თითო ბურთის ავტორებად კი ლევან სარდანაშვილი, მალხაზ შამილაძე, ნიკოლოზ კოპლატაძე, მიხეილ თევზაძე და ლევან სვანიძე მოგვევლინენ. ასევე ხუთმა მოთამაშემ თითო გოლი გაიტანა ევროპელთა რიგებშიც. ესენია: გიორგი კუპრეიშვილი, გიორგი ჩოხელი, გიორგი ქურხული, ზურაბ ვარდუაშვილი და გიორგი დიაკვნიშვილი.

თასის 1/8 ფინალური მატჩების მეორე დღე წალენჯიხისა და სპორტუნის დაპირისპირებით გაიხსნა. მიუხედავად იმისა, რომ ფუტსალის ლიგა-2-ში სპორტუნი ბოლო, მე-8 ადგილზე იმყოფება, სპორტსმენმა სტუდენტებმა მეხუთეზე მყოფ წალენჯიხელებს სძლიეს. ლუკა ბუზიაშვილის დუბლსა და გიორგი ექსეულიძის ერთ გოლს, წალენჯიხელებმა პირველ ტაიმში გენადი კვანტალიანის ერთი გატანილი ბურთით უპასუხეს. შესვენების შემდეგ, ბუზიაშვილის დარად, ექსეულიძემაც დუბლი შეასრულა. წალენჯიხადან გიორგი ფაცაციამ და გურამ ჩალიგავამ თითო გოლის ავტორბა ითავეს, მაგრამ ეს საკმარისი არ აღმოჩნდა. სპორტუნმა 4:3 მოიგო და ფუტსალის თასის 1/4 ფინალში გავიდა.

ქუთაისი-2-თან დაპირისპირებაში უპირობო ფავორიტი, ფუტსალის თასის მოქმედი მფლობელი, ნიუ ვიჟენ ჯორჯიანსი გახლდათ. ავთანდილ ასათიანის ბიჭებმა საკმაოდ დიდი ანგარიშით, 9:0 მოიგეს. დავით ხეჩიკაშვილმა ჰეთ თრიკი შეასრულა, გიორგი სილაგავამ, გიორგი თოლორდავამ, კახაბერ მაისაიამ, ვახტანგ კეკელიამ, ნიკოლოზ გაბრიჩიძემ და ირაკლი თოდუამ თითო გოლი გაიტანეს.

ქუთათურთა მთავარმა გუნდმა ილიანი-2-თან დამაჯერებლად მოიგო, მიუხედავად იმისა, რომ ანგარიში სტუდენტებიდან ილია ჭაქარაშვილმა გახსნა. ქუთაისიდან ანდრეი ნენაშევმა, ლაშა ბუბულაშვილმა და სერგეი პიჩუგინმა დუბლები შეასრულეს, თითო გოლი კი ირაკლი გვეტაძემ და ავთანდილ ჭიჭინაძემ გაიტანეს. ბოლოს ერთი გოლი იმერელთაგან გიორგი თაბაგარმა მიითვალა და ქუთაისმა 8:2 მოიგო.

ამ მატჩების შედეგად ფუტსალის თასის 1/4 ფინალში შემდეგი 8 გუნდი გავიდა: არმია, თსუ, ილიაუნი, კსუ, პსპ, სპორტუნი, ნიუ ვიჟენ ჯორჯიანსი, და ქუთაისი. ასე რომ, ფუტსალის თასის 1/4 ფინალშიც საინტერესო მატჩები გველის.