ნამდვილად ასეა, ფრე ბევრჯერ სხვა გუნდს (ან გუნდებს) უფრო აძლევს ხელს და ამჯერადაც ასე მოხდა. სწორედ ეს იყო ფუტსალის მთავარი ლიგის მე-9 ტურის ლაიტმოტივი. ოთხიდან ორი, მათ შორის ცენტრალური მატჩი ფრედ დასრულდა. ამ ორივე ფრით სხვა გუნდების, ჩვენს შემთხვევაში პსპ-საა და არმიას წისქვილზე დაასხა წყალი. არმიელებმა მდევართან ქულათა სხვაობა ორიდან ოთხამდე გაზარდეს. პსპ კი ერთპიროვნული ლიდერი გახდა და ორივე მდევარს 2-2 ქულით უსწრებს. 

მე-9 ტური ცენტრალური მატჩით გაიხსნა, რომელშიც ნიუ ვიჟენ ჯორჯიანსს კსუ დაუპირისპირდა. გასულ რეგულარულ სეზონში, ამ გუნდების 3 დაპირისპირებიდან, ორი ჯორჯიანსელებმა მოიგეს, ერთი კი კსუ-მ იმარჯვა. კავკასიელებმა იმარჯვეს მიმდინარე სეზონის მეორე ტურშიც. ყველასათვის ცხადი იყო, რომ  ამჯერადაც დრამატული მატჩი გველოდა და ეს მოლოდინი ორივემ გუნდმა გაამართლა. მართალია, დერბიში ამჯერად მხოლოდ ორი გოლი გავიდა, მაგრამ მეტოქეებმა გრანდიოზული სანახაობა შემოგვთავაზეს. მატჩი მოწინააღმდეგეთა ურთიერთდაზვერვით დაიწყო და გარდამავალი უპირატესობით წარიმართა.  ტაიმის ნახევარზე მეტი ხნის განმავლობაში, ანგარიში არ გახსნილა, რაც მეტოქეთა მეკარეების, თორნიკე ბუკიასა და ბექა ტყემალაძის დამსახურებაა. მე-14 წუთზე, მარჯვენა ფრთაზე გაჭრილმა ვახტანგ კეკელიამ, გამჭოლი პასით გიორგი ქურდაძე მოძებნა, რომელმაც ჯორჯიანსელები დააწინაურა, 0:1. კავკასიელები გაცხარდნენ და შეუტიეს, ნიკა მანგოშვილს ორჯერ შეეძლო გატანა, ნიკოლოზ გაბრიჩიძესა და დავით ხეჩიკაშვილს თითო კარგი შანსი  ჰქონდათ, მაგრამ შესვენებამდე ანგარიში აღარ შეცვლილა. მეორე ნახევარიც სწრაფ ტემპში დაიწყო. ჯორჯიანსელები 5 წუთში 3-ჯერ დაჯარიმდნენ და ანგარიშის გათანაბრებისთვის კავკასიელებს ერთგვარი უპირატესობა მიეცათ, მაგრამ პენალტამდე საქმე არ მისულა. საგოლე მომენტები კი ორივე კართან შეიქმნა, ირაკლი თოდუას, გარი წერეთელს, დავით ხეჩიკაშვილს, გიორგი ტიკურიშვილს, ნიკა მანგოშვილს, გიორგი ქურდაძეს, ირაკლი თოდუას, ლევან კობაიძეს ჩინებული შანსი ჰქონდათ ანგარიში შეცვალათ, მაგრამ ეს ვერ შეძლეს. კსუ ჩამორჩენას ვერ შეეგუა, ვა-ბანკზე წავიდა და მეკარიანად შეუტია, რამაც შედეგი გამოიღო. ბოლოსწინა წუთზე გიორგი ჭანუყვაძის დარტყმული  ბურთი რიკოშეტით კარში აღმოჩნდა, 1:1. საბოლოოდ, მეტოქეები ფრეს დაჯერდნენ. ფრე პსპ-ს აძლევდა ხელს, რომელსაც ლიგის დებიუტანტ ქუთაისთან 3 ქულას უნდა მოეპოვებინა.

ფარმაცევტებს ქუთათურებთან იოლი გასეირნება ნამდვილად არ ჰქონიათ. იმერლებმა თავიდანვე გამოაჩინეს ბრჭყალები, მე-4 წუთზე ირაკლი გვეტაძემ ანგარიში გახსნა, 0:1. პსპ არ დაბნეულა, მალევე დაეუფლა მატჩის სადავეებს და 5 წუთში ნიკოლოზ კურტანიძემ ძლიერი დარტყმით წონასწორობა აღადინა, 1:1. თამაში თბილისელთა კარნახით წარიმართა, მაგრამ ეს, ანგარიშში მოგვიანებით აისახა. მე-16 წუთზე მელტონ ახალაიას პასით, ლევან სვანიძემ პსპ წინ გაიყვანა. 2:1. ტაიმის ბოლო წამებზე, კონტრშეტევაზე ლევან სარდანაშვილის დარტმული ბურთი რიკოშეტით სტუმართა კარში აღმოჩნდა. 3:1. ქუთათურებმა მეორე ტაიმიც აქტიურად დაიწყეს და 25-ე წუთზე ირაკლი გვეტაძემ, სერგეი პიჩუგინის გრძელი პასი დააფასა და ანგარიშში სხვაობა მინიმუმამდე შეამცირა, 3:2. მერე თამაშის ტემპმა იკლო, მაგრამ მთავარი სანახაობა წინ გველოდა. ბოლო 4 წუთში 4 გოლი გავიდა. 36-ე წუთზე გიორგი აფციაურმა პსპ-ს ორბურთიანი ფორა აღადგინა, 4:2, მაგრამ ნახევარ წუთში გვეტაძემ მესამეც გაიტანა, 4:3. წუთიც არ იყო გასული, მელტონ ახალაიამ თბილისელთა ფორა გააორმაგა, 5:3. ბოლო წუთზე გიორგი ზუნტუროვმა პსპ-ს ფორა სოლიდური გახადა, 6:3. მატჩის ბოლო წამზე ქუთათურთაგან გვეტაძემ პოკერი შეასრულა და მატჩი პსპ-მ 6:4 მოიგო ამ გამარჯვებით ფარმაცევტები ცხრილს ერთპიროვნულად ჩაუდგნენ სათავეში.

ასევე დრამატული გახლდათ თსუ-სა და არმიას დაპირისპირება. გასულ სეზონში არმიელებმა ორჯერ მოუგეს სტუდენტებს, ერთხელ კი თსუ-მ იზეიმა გამარჯვება. მიმდინარე სეზონის მეორე ტურშიც სტუდენტებმა იმარჯვეს. თუმცა, მიმდინარე სეზონში არმიელები უკეთესად ასპარეზობენ და ამბიციებიც მეტი აქვთ. ლადო ბურდულის ბიჭებმა სამი მოგების გარდა, კსუ-ს ფრედ ეთამაშნენ. შესაბამისად, იყო მოლოდინი, რომ სტუდენტებს არმიასთან იოლი გასეირნება არ ელოდათ და ასეც მოხდა. თსუ-ს გოლი დაუგვიანდა, მე-11 წუთზე საბა მაჩიტიძემ  არმიელთა იერიში ჩაჭრა და კონტრშეტევისას გახსნა ანგარიში, 1:0. ორიოდე წუთში ამირან ცხომარიამ წონასწორობა აღადგინა (1:1) და შესვენებამდე ანგარიში აღარ შეცვლილა. მეორე ტაიმშიც სტუდენტები დაწინაურდნენ - 29-ე წუთზე ბორის ესებუამ თსუ წინ გაიყვანა, 2:1. ორ წუთში დავით კოხრეიძემ სტუდენტების შეტევა ჩაჭრა, გიგა ბერაია მოძებნა, რომლის პასი ბაკურ ნანეიშვილმა გოლად აქცია და ანგარიში კიდევ ერთხელ გათანაბრდა, 2:2. არმიელებმა ეს არ იკმარეს და 55 წამში ოთარ ბერეჩიკიძის დარტყმას არმიელთა დააწინაურება მოჰყვა, 2:3. დარჩენილ 9 წუთში აღარაფერი შეცვლილა, არმია მე-5 ადგილზე დარჩა და თსუ-სთან 6 ქულიანი სხვაობა გაანახევრა.

ევროპის უნივერსიტეტმა ილიაუნთან პირველ ტაიმში უკეთ ითამაშა და შესვენებაზე მოგებული გავიდა. მე-2 წუთზე ილიაუნიდან ბექა ონიანმა გახსნა ანგარიში. 3 წუთში გიორგი დიაკვნიშვილმა წონასწორობა აღადგინა. წუთში კი, ევროპელთა მთავარმა მეგოლე გიორგი ჩოხელმა თავისი გუნდი დააწინაურა, 1:2. მეორე ტაიმის სტარტზე  ილიაუნმა ქამბექი მოახერხა. 24 წუთზე ომარ ასაშვილმა ანგარიში გაათანაბრა, 3 წუთში კი ნიკა გვაზავამ ილიაუნელები წინ გაიყვანა, 3:2. ევროპელები მარცხს არ შეგუენ და ბოლოსწინა წუთზე გიორგი დიაკვნიშვილმა საბრძოლო ფრე, 3:3 დააფიქსირა. ილიაუნი ფრეს დასჯერდა და მეექვსე ადგილზე დარჩა. ეს ფრე მუხუთეზე მყოფ არმიელებს აძლევდათ ხელს, მათ ევროპელებთან ქულათა ფორა ხუთამდე გაზარდეს.