ფუტსალის მთავარი ლიგის რეგულარულ სეზონში, წლის ბოლოსწინა, მე-10 ტურმაც არაერთი მოულოდნელობა შემოგვთავაზა. ქუთაისი პირველ მოგებასთან ახლოს იყო, მაგრამ მხოლოდ ქულას დასჯერდა. არმიელებმა ისევ დამაჯერებლად მოიგეს. ტურის ცენტრალურ მატჩში, ასევე დამაჯერებლად გაიმარჯვა მოქმედმა ჩემპიონმა და მიმდინარე სეზონში პირველად ერთპიროვნულად გალიდერდა.

ქუთაისი თსუ-ს მედგრად დაუხვდა და ძალზე ახლოს იყო აქტივში პირველი მოგება ჩაეწერა. ქუთათურებმა სტუდენტებს პირველი ტაიმი მოუგეს კიდეც, მაგრამ თბილისელებმა მატჩის გადარჩენა შეძლეს. მე-4 წუთზე მასპინძელთა მეგოლე გიორგი გვეტაძემ გახსნა ანგარიში, 1:0. ორიოდე წუთში ჯანიკო გიორგაიამ თავური დარტყმით გაათანაბრა ანგარიში, 1:1. თუმცა, ზუსტად წუთში, სერგეი პიჩუგინმა ქუთაისი ისევ წინ გაიყვანა, 2:1 და ტაიმის ბოლო წუთამდე ანგარიში აღარ შეცვლილა. მე-20 წუთზე ორი გოლი გავიდა. სტუდენტებმა მეკარიანად შეუტიეს და იხეირეს კიდეც - გიორგაიამ გამჭოლი პასი გოლად აქცია და კიდევ ერთხელ ანგარიში გაათანაბრა, 2:2. ტაიმის დასრულებამდე 4 წამით ადრე, ბაკურ გულუამ თბილისელთა გრძელი გადაცემა ჩაჭრა, იერიში წამოიწყო და ეფექტური გოლით იმერლები წინ გაიყანა 3:2. მეორე ტაიმი თამაში გარდამავალი უპირატესობით წარიმართა. საგოლე მომენტები ორივე გუნდს ჰქონდა, მაგრამ მატჩის ბოლომდე ანგარიში აღარ შეცვლილა. 38-ე წუთზე ბორის ესებუას გოლით თსუ მარცხს გადაურჩა, შეხვედრა, ფრედ, 3:3 დასრულდა და ქუთაისმა ამ სეზონში პირველი ქულა მოიპოვა. ამ ფრით ქუთაისმა, ევროპის უნივერსიტეტთან ჩამორჩენა ორ ქულამდე შეამცირეს. თსუ კი მესამეადგილოსან კსუ-ს ბევრად ჩამორჩა და თანაც მდევარი არმია წამოეწია.

არმიასა და ილიაუნს შორის, გასული სეზონის 3 მატჩში ყველა შედეგი თითოჯერ დაფიქსირდა. მიმდინარე სეზონში არმიელებმა სტუდენტებს 6:2 მოუგეს. ბუნებრივია, ილიაუნი რევანშს  შეეცადა, მაგრამ ლადო ბურდულის ბიჭებმა მეტოქეს ამისი საშუალება არ მისცეს. არმიამ შეძლო უპირატესობის მოპოვება, მაგრამ გოლი კი დაუგვიანდა, რაც ილიაუნის მეკარე ბექა გოგსაძის დამსახურება გახლდათ. ერთ-ერთი შეტევისას, ბაკურ ნანეიშვილის გამჭოლი პასი ოთარ ბერეჩიკიძემ გოლით დააფასა და ანგარიში გახსნა, 1:0. ორ წუთში არმიელთა მეკარე ვახტანგ ტერუნაშვლმა სწრაფი იერიში წამოიწყო და თავადვე გოლით დააგვირგვინა, 2:0. მეორე ტაიმი ორმხრივი იერიშებით დაიწყო, მაგრამ არმიელებმა იხეირეს. 23-ე წუთზე ნანეიშვილმა, მეკარესთან პირისპირ გიგა ბერაია  გაიყვანა და კაპიტანმაც სხვაობა გაზარდა 3:0. სტუდენტები ამან გაახელა, მაგრამ არმიელები მეტოქეს მჭიდროდ ეთამაშნენ, ზონები ჩაუკეტეს და 29-ე წუთზე ამირან ცხომარიამ მახვილი კუთხიდან საბოლოო ანგარიში დააფიქსირა, 4:0. ამ მოგების შედეგად, არმია თსუ-ს მხოლოდ ერთი ქულით ჩამორჩება.

კსუ-მ ევროპის უნივერსიტეტს მესამე ტურში 4:2 სძლია, ამჯერად კი უფრო დამაჯერებლად მოუგო. ანგარიში მე-7 წუთზე კავკასიელებმა გახსნეს, გიორგი ტიკურიშვილის გოლს, ნახევარ წუთში გარი წერეთელმა მეორე შეაშველა, 0:2. ევროპელებმა ამას მე-17 წუთზე გიორგი დიაკვნიშვილის გოლით უპასუხეს, 1:2. თუმცა, ტაიმის ბოლოსწინა წუთზე ნოდარ ქურცაძემ ორბურთიანი სხვაობა აღადგინა, 1:3. მეორე ტაიმის 11 წუთიან მონაკვეთში, კავკასიელთაგან ნიკა ხარატიშვილმა, ალექსანდრე ორაგველიძემ და გიორგი ტიკურიშვილმა თითი გოლი გაიტანეს და კსუ-მ დამაჯერებლად 1:6 მოიგო.

ბოლო თამაში ტურის ცენტრალური მატჩი გახლდათ. ნიუ ვიჟენ ჯორჯიანსსა და პსპ-ს შორის, გასულ სეზონში გამართული 3 მატჩიდან ორი ფრედ დასრულდა, ერთი კი ფარმაცევტებმა მოიგეს. ასევე ფრედ დასრულდა მიმდინარე სეზონის შეხვედრაც და მხოლოდ ეს სტატისტიკაც კი საკმარისია საიმისოდ, რომ საინტერესო სანახაობა გველოდა. ცხრილში გაპირველებისთვის, მოქმედ ჩემპიონებს მხოლოდ მოგება უნდოდათ და ეს შეძლეს კიდეც. გუნდებმა თამაში აქტიურად დაიწყეს, მაგრამ ბოლომდე გარისკვას ორივე მოერიდა. მეტოქეებმა თითო საგოლე მომენტი გაცვალეს. პსპ-მ თამაში გაათანაბრა, ის-ის იყო თამაშის სადავეებსაც დაეუფლა. თუმცა, ჯორჯიანსელთა მორიგი იერიში, ზუსტი და ძლიერი დარტყმით გიორგი თოლორდავამ გოლით დააგვირგვინა, 1:0. ფარმაცევტები მდევრის როლს არ შეეგუენ, მალევე ახალაიასა და ზუნტროვს შეეძლოთ გატანა, მაგრამ ჯორჯიანსელთა კიპერმა ბექა ტყემალაძემ ორი მკვდარი ბურთი მოიგერია. სარდანაშვილის დარტყმასაც ტყემალაძე გადაეფარა. პსპ-მ მეკარიანად შეუტია და მათი იერიშის ჩაშლისას, კეკელიას შორეული ზუსტი დარტყმისას, ფარმაცევტების კარი სვანიძემ იხსნა, როცა ბურთი თავით კუთხურზე მოიგერია. მერე სვანიძის დარტმისას ისევ მეკარე ტყემალაძემ იმარჯვა. მეორე ტაიმიც სწრაფ ტემპში დაიწყო. 23-ე წუთზე, მორიგი იერიშისას, ნუკრი ჭუმბურიძემ საჯარიმოში ჩააწოდა ბურთი, რომელიც სვანიძეს მოხვდა და რიკოშეტით კარში აღმოჩნდა, 2:0. პსპ გაცხარდა და კვლავ მეკარიანად შეუტია. ფარმაცევტებმა საგოლე მომენტებიც შექმნეს, მაგრამ არაერთი შანსი ვერ გამოიყენეს. მატჩის დასრულებამდე 7 წამით ადრე, გიორგი ქურდაძემ საკუთარი საჯარიმოდან ცარიელ კარში გაიტანა, 3:0. ავთანდილ ასათიანის ბიჭებმა დამაჯერებლად მოიგეს და ერთპირონულად ცხრილს სათავეში ჩაუდგნენ.

მომდევნო ტურშიც საინტერესო პერიპეტიები გველის. 16 დეკემბერს წლის ბოლო ტურია. ერთმანეთს, მეორე-მესამე ადგილზე მყოფი პსპ და კსუ შეერკინებიან. ცხრილის ლიდერი ნიუ ვიჟენ ჯორჯიანსი, პირველობის შენარჩუნებას თსუ-სთან მატჩში შეეცდება. ასე რომ, ვნახოთ, ვინ გახდება ზამთრის ჩემპიონი.