წლის ბოლო ტური დრამატული გამოდგა. ზამთრის ჩემპიონობის ყველაზე დიდი შანსი, ცხრილის ლიდერსა და მოქმედ ჩემპიონ ნიუ ვიჟენ ჯორჯიანსს ჰქონდა და გამოიყენა კიდეც... როგორც იტყვიან, ზამთარმა ჩემპიონი ვერ შეცვალა. მე-11 ტურში მნიშვნელოვანი მოვლენა იყო, ლიგის დებიუტანტების, ევროპის უნივერსიტეტისა და ქუთაისის მოგებები, მათ მეტოქეებზე რევანში აიღეს. იმერლებმა კი სულაც სეზონის პირველი გამარჯვება იზეიმეს.

ტური თსუ-სა და ნიუ ვიჟენ ჯორჯიანსის მატჩით გაიხსნა. ჯორჯიანსელები მე-3 წუთზე დაწინაურდნენ - კეკელიას მესამე მცდელობამ შედეგი გამოიღო, მან თოდუას გამჭოლი პასი გოლად აქცია, 0:1. სტუდენტები გაცხარდნენ და უპირატესობას დაეუფლნენ, მაგრამ ჯორჯიანსელებმა მატჩის სადავეები დაიბრუნეს. მე-13 წუთზე, თოდუამ ჯვარაშვილის პასი გოლად აქცია, 0:2. მერე თსუ-ს ჯერი დადგა, მაჩიტიძემ ძლიერი დარტყმით, ერთი ბურთი გაქვითა. თუმცა, ავთანდილ ასათიანის ბიჭებმა სამიოდე წუთში კეკელიამ დუბლი შეასრულა და ორბურთიანი ფორა აღადგინა, 1:3. ჯორჯიანსელები ამას არ დასჯერდნენ და მეორე ტაიმი მათი გოლით დაიწყო - ჯვარაშვილმა კეკელიას პასი გოლით დააფასა, 1:4. ამას თსუ-მ ეგრისელაშვილის ერთი გოლით უპასუხა, 2:4.

ლიგის დებიტანტი ევროპის უნივერსიტეტი, მოწინავე ოთხეულში მოსახვერად მებრძოლ არმიასთან შერკინებას არ მოერიდა. სტუდენტებმა მატჩის სტარტზევე გამოაჩინეს ბრჭყალები. პირველივე წუთზე დიაკვნიშვილმა გოგსაძის პასით იხეირა, 0:1. ექვს წუთში კუპრეიშვილმა ფორა გააორმაგა, 0:2. არმიამ მეტოქეზე ზეწოლა გააძლიერა და მე-12 წუთზე ნანეიშვილმა სხვაობა მინიმუმამდე შეამცირა, 1:2.  არმიელები გოლზე დაიგეშნენ, მაგრამ ევროპელთა კარი, ორჯერ ძელმა იხსნა. მე-17 წუთზე ხაბალაევმა კონტრშეტევაზე იმარჯვა და ორბურთიანი ფორა აღადგინა, 1:3. არმიელები გაცხარდნენ, მაგრამ სტუდენტების მეკარე ბაკურ სანიკიძემ, არაერთი მკვდარი ბურთი აიღო. მეორე ტაიმის შუაწელს კუპრეიშვილმა მახვილი კუთხიდან გაიტანა და ევროპელთა უპირატესობა სოლიდური გახადა, 1:4. არმიელებმა შეტევებს სიმწვავე შემატეს, სტუდენტები ხისტ თამაშს ვერ ასცდნენ და 5 გაფრთხილების ლიმიტი მალე ამოწურეს. 33-ე წუთზე ცხომარიამ პენალტი გოლად აქცია, 2:4. არმიელებმა ქამბექი ჩაიფიქრეს და მეტოქეზე ზეწოლა გააძლიერეს. 36-ე წუთზე ცირამუამ სხვაობა მინიმუმამდე შეამცირა, 3:4. მალევე ცხომარიას პენალტი მეკარე სანიკიძემ მოიგერია და არმიამ ანგარიშის გათანარება ვერ შეძლო. დიაკვნიშვილმა მეტოქე დასაჯა, 3:5. არმიელებმა მეკარიანად შეუტიეს და ცირამუამ 38-ე და 39-ე წუთებზე გაიტანა, ჯამში ჰეთ თრიკი მიითვალა და წონასწორობა აღადგინა, 5:5. ბოლოსწინა წუთზე კიკვაძემ გაიტანა, ევროპელებმა 5:6 იმარჯვეს და ილიაუნთან ჩამორჩენა ორ ქულამდე შეამცირეს.

მიმდინარე სეზონის მეოთხე ტურში, ილიაუნმა ქუთაისს იმერეთში, დამაჯერებლად, 2:0 მოუგო. თუმცა, სტუდენტები იმერელთა რევანშს ვერ გადაურჩნენ. თამაში თავიდანვე საინტერესოდ დაიწყო, სტუდენტების კაპიტნის, ნიკა გვაზავას დარტყმისას, იმერელთა კარი ძელმა იხსნა. ამას ქუთაისმა გოლით უპასუხა, მე-4 წუთზე სერგეი პიჩუგინმა კუთხურიდან გამჭოლი გადაცემით ბაკურ გულუა მოძებნა, რომელმაც იმერლები დააწინაურა, 0:1. ამის შემდეგ საგოლე მომენტები ორივე კართან შეიქმნა, მაგრამ შედეგი აღარ შეცვლილა. ქუთაისმა სეზონის პირველი გამარჯვება იზეიმა და ევროპელებთან ჩამორჩენა 3 ქულამდე შეამცირა.

პსპ-სა და კსუ-ს დაპირისპირება ტურის ცენტრალურ მატჩად იყო შერაცხული, მაგრამ მოლოდინი, ამ შეხვედრის მხოლოდ მეორე ტაიმმა გაამართლა. გუნდებმა თამაში აქტიურად დაიწყეს, კავკასიელები უფრო ზუსტნი აღმოჩნდნენ და დაწინაურდნენ კიდეც. მეორე წუთზე სიგუნავას გრძელი პასი ჭანუყვაძემ შეირგო და ანგარიში გახსნა, 0:1. ამის შემდეგ, თამაში მძიმედ წარიმართა და მორიგი გოლი მხოლოდ ტაიმის ბოლოსკენ გავიდა. მე-18 წუთზე თევზაძემ მახვილი კუთხიდან ანგარიში გაათანაბრა, 1:1. მეორე ტაიმის პირველივე წუთზე ჭანუყვაძის ჩინებული პასით სიგუნავამ კსუ წინ გაიყვანა, 1:2. თამაში მხოლოდ შესვენების შემდეგ გახურდა. 27-ე წუთზე ხარატიშვილმა პსპ-ს იერიში ჩაშალა და კონტრშეტევა გოლით დააგვირგვინა, 1:3. ამან ფარმაცევტები გაახელა, მათ შეტევები გაამწვავეს და შედეგიც მოიმკეს - 34-ე წუთზე, ახალაიას პასით, თევზაძემ სხვაობა მინიმუმამდე შეამცირა, 2:3. თამაშმა უფრო მწვავე ხასიათი მიიღო, ბოლო ორ წუთში კი სულაც 3 გოლი გავიდა. 39-ე წუთზე სიგუნავას მიერ წამოწყებული კონტრიერიში ტიკურიშვილმა გოლით დააგვირგვინა, 2:4. პსპ მძიმე მდგომარეობა აღმოჩნდა, ფარმაცევტებმა მაინც ბოლომდე იბრძოლეს და ნახევარ წუთში ნიკოლოზ კურტანიძემ გაიტანა, 3:4. პსპ-მ შეტევები გააგრძელა, მაგრამ მატჩის ბოლოსწინა წამზე, ჭანუყვაძემ მეტოქის იერიში ჩაჭრა და საბოლოო შედეგი დააფიქსირა. კსუ-მ 3:5 მოგებით, ცხრილში მესამედან მეორე ადგილზე აინაცვლა და ლიდერ ჯორჯიანსელებს ორი ქულით ჩამორჩება.