ფუტსალში წელიწადი, თასის 1/4 ფინალური მატჩებით დაიხურა. რვა მონაწილედან 4 სტუდენტური გუნდი იყო. აქედან სამი გათამაშებას გამოეთიშა, მეოთხემ კი დახურა - მეოთხე სტუდენტური გუნდი, რომელსაც ზოგი აუტსაიდერადაც კი მიიჩნევდა, სენსაცია შემოგვთავაზა. სპორტის უნივერსიტეტის გუნდმა სპორტუნიმ, მრისხსანე კსუ-ს ბარიერი გადალახა. ოთხი ნახევარფინალისტიდან ერთი ქვედალიგელი სპორტუნია და ვისთან მოუწევს შეჭიდება, ამას წილისყრა გაარკვევს, მანამდე კი სათასო მატჩები მიმოვიხილოთ. 

თასის 1/4 ფინალური მატჩები თსუ-სა და ნიუ ვიჯენ ჯორჯიანსის დაპირისპირებით გაიხსნა. მიმდინარე სეზონში, ამ გუნდებმა  უკვე ორჯერ ითამაშეს და ორივეჯერ ჯორჯიანსელებმა ერთნაირი ანგარიშით, 4:2 იმარჯვეს. ავთანდილ ასათიანის ბიჭებმა წარმატებული კურსი გააგრძელეს და ამჯერად უფრო სოლიდური სხვაობით მოიგეს. ვახტანგ ჯვარაშვილმა პირველივე წუთზე გახსნა ანგარიში და სტუდენტები დაამწუხრა, 0:1. მერვე წუთზე, თსუ-დან დავით კეფაშვილი გააძევეს, ორწუთიანი რიცხობრივი უპირატესობით თასის მოქმედმა მფლობელმა ისარგებლა და ირაკლი თოდუამ სხვაობა გააორმაგა, 0:2. შესვენებამდე, გიორგი სილაგავამ ჰეთ თრიკი შეასრულა, 0:5. მეორე ტაიმში, 23-ე წუთზე გიორგი ჩიმაკაძემ ერთი ბურთი გაქვითა, მაგრამ 32-ე და 43-ე წუთებზე ნუკრი ჭუმბურიძემ და ნიკოლოზ გაბრიჩიძემ თითო გოლი გაიტანეს და მატჩის ბედიც გადაწყვიტეს, 1:7. ამას თსუ-მ ჩიმაკაძის ერთი გოლით უპასუხა, ნიუ ვიჟენ ჯორჯიანსმა 2:7 მოიგო და ნახევარფინალში გავიდა.

ნახევარფინალის საგზურისთვის მძიმე და დაძაბული დაპირისპირება შედგა პსპ-სა და ილიაუნს შორის. გამარჯვებულის გამოსავლენად ორი ძირითადი ტაიმი საკმარისი არ აღმოჩნდა და ჯერი, კინაღამ პენალტებზე მიდგა. ანგარიში მხოლოდ ტაიმის მიწურულს გაიხსნა. შესვენებამდე 12 წამით ადრე ბექა ონიანმა სტუდენტები დააწინაურა, 0:1. ფარმაცევტები მდევრის როლს არ შეეგუენ, მაგრამ გოლი დაუგვიანდათ, 31-ე წუთზე მელტონ ახალაიამ ანგარიში გაათანაბრა (1:1), მაგრამ სამიოდე წუთში, ლაშა კურტანიძემ ილიაუნი ისევ წინ გაიყვანა, 1:2. ამას პსპ-მ მალევე უპასუხა, 36-ე ლევან სვანიძემ წონასწორობა აღადგინა. დარჩენილ დროში არაფერი შეცვლილა და დამატებითი ტაიმები დაინიშნა, რომელშიც პსპ-მ საკუთარი შანსები გამოიყენა. 43-ე წუთზე ნიკოლოზ კურტანიძემ ფარმაცევტები დააწინაურა, 3:2. კიდევ ორ წუთში, იმავე კურტანიძემ დუბლი მიითვალა და ფარმაცევტებმა 4:2 იმარჯვეს. 

არმიამ ქუთაისის ბარიერი იოლად გადალახა. ლადო ბურდულის ბიჭებმა პირველი ტაიმი 3:7 მოიგეს. ჯამში კი სოლიდური სხვაობით, 4:12 იმარჯვეს. არმიელთაგან შაკო ცირამუამ პოკერი შეასრულა, ამირან ცხომარიამ აქტივში ჰეთ თრიკი ჩაიწერა, ლაშა ფოფხაძემ დუბლი მიითვალა. ბაკურ ნანეიშვილმა, გიგა ბერაიამ და ვანო ბექაურმა თითი ბურთი გაიტანეს. ქუთათურთაგან, ცხომარიას რიკოშეტით ავტოგოლს, ირაკლი გვეტაძემ დუბლი შეაშველა, სერგეი პიჩუგინმა კი ერთი გოლი.

სპორტუნი ერთადერთი გუნდი იყო პირველი ლიგიდან, რომელიც თასის 1/4 ფინალში გავიდა და ზოგი თვლიდა, რომ სტუდენტები კსუ-ს ბარიერს ვერ გადალახავდნენ, მაგრამ სპორტუნმა სენსაციის ავტორობა ითავა და მრისხანე კავკასიელთა ძლევა შეძლო. საბა ტყეშელაშვილისა და ნიკა ხარატიშვილის თითო გოლით კსუ იგებდა, მაგრამ სპორტუნიდან გიორგი ექსეულიძემ და გიორგი მანაგაძემაც თითო ბურთი გაიტანეს და მეტოქეები შესვენებაზე ფრით (2:2) გავიდნენ. მეორე ტაიმის სასტარტო 3 წუთში სპორტუნმა სამი ბურთის გატანა მოახერხა - ექსეულიძემ და მანაგაძემ ისევ თითი გაიტანეს, ერთი გოლიც ბექა ფილფანმა მიითვალა, 5:2. კსუ მდევრის როლში აღმოჩნდა და დიდი გარჯის მიუხედავად, ამ როლიდან თავის დაღწევა ვერ შეძლო. გიორგი ტიკურიშვილმა ერთი ბურთი გაქვითა (5:3), მაგრამ ფილფანმა კიდევ ორი გოლით უპასუხა, 7:3. ტიკურიშვილი კიდევ გამოირჩა გოლებით და ჯამში პოკერი შეასრულა. ვიზავის არც ფილფანი ჩამოუვარდა და ჯამში 5 გოლის ავტორობა ითავა. თითო გოლი, სპორტუნიდან გიორგი კაკულიამ, კსუ-დან კი ლაშა სიგუნავამ გაიტანეს. საბოლოოდ, სპორტუნიმ 9:7 მოიგო და ნახევარფინალში გავიდა.