ერთთვიანი შესვენების შემდეგ, ფუტსალის მთავარი ლიგა, მე-12 ტურის მატჩებით განახლდა, თანაც გოლების სარეკორდო რაოდენობითა და ერთი მოულოდნელი შედეგით. ჯერ გოლებზე ვთქვათ, მე-12 ტურში 43 გოლი გავიდა, რაც საშუალოდ ერთ თამაშში ათ გოლზე მეტის ტოლფასია და ეს მიმდინარე სეზონის აბსოლუტური რეკორდია. მოულოდნელი შედეგი სტუდენტურ დერბიში დაფიქსირდა, თსუ-ს არც მიმდინარე და არც წინა სეზონი კსუ-სთან მოგება არ ჰქონია, ამჯერად კი გამარჯვება იზეიმა და კავკასიელები ცხრილში დააქვეითა.

კსუ-სა და თსუ-ს სტუდენტური დერბი ამ ტურის ცენტრალურ მატჩად იყო მიჩნეული და თამაშმა ეს მოლოდინი სრულად გაამართლა. ამ შეხვედრამდე მეოთხეზე მყოფმა თსუ-ელებმა თავიდანვე დააფიქსირეს, რომ მეორეადგილოსან მეტოქესთან მოგებისთვის იბრძოლებდნენ. მე-3 წუთზე, თსუ-ს კაპიტანმა გიორგი ჩიმაკაძემ ფუტსალის ლიგაში 2023 წლის პირველი გოლი გაიტანა და მატჩში ანგარიში გახსნა. უფრო მეტიც, ჩიმაკაძემ ამ შეხვედრაში 5 გოლი მიითვალა და თავისი გუნდის გამარჯვებაში ლომის წვლილი დაიდო. ჩიმაკაძემ შესვენებამდე მეორეც გაიტანა. საბა მაჩიტიძემ, ლაშა ერქომაიშვილმა და საბა ეგრისელაშვილმა თითო გოლი მიითვალეს (0:5) და თსუ შესვენებაზე დიდი ფორით გავიდა. ჩიმაკაძე 27-ე წუთზე კიდევ გაიტანა (0:6) და მერე უკვე კავკასიელთა ჯერი დადგა. 5-წუთიან მონაკვეთში ნიკა ხარატიშვილმა, საბა ტყეშელაშვილმა თითო, ხოლო ლაშა სიგუნავამ ორი გოლით გამოირჩა, კსუ-მ ანგარიშში ჩამორჩენა ორამდე შეამცირა, 4:6. კავკასიელებს მატჩის გადასარჩენად 8 წუთი ჰქონდათ და მათი მხრიდან ქამბექის შესრულება, უკვე რეალური გახდა, მაგრამ თსუ-სთვის გარდამტეხი როლი ისევ კაპიტანმა ჩიმაკაძემ ითამაშა. ჯერ სიგუნავამ საკუთარ კარში ჩაჭრა ბურთი (4:7), მერე კი ჩიმაკაძემ კსუ-ს შეტევა ჩაშალა და საკუთარი საჯარიმოდან თავადვე გაიტანა, 4:8. კავკასიელებმა მატჩის გადარჩენისთვის ბოლომდე იბრძოლეს, ორ წუთში ხარატიშვილმა სხვაობა სამამდე შეამცირა, 5:8 და კსუ-ს ქამბექისთვის საკმარისი დრო, არასრული 5 წუთი ჰქონდა. თუმცა, თსუ-ს მხსნელად ისევ ჩიმაკაძე მოევლინა, რომელმაც 37-ე წუთზე, საჯარიმო დარტყმიდან ეფექტური გოლით, ამ მატჩის ბედი გადაწყვიტა, 5:9. კსუ-მ ამას გიორგი ტიკურიშვილის ერთადერთი გოლით უპასუხა, 6:9. თსუ-მ იმარჯვა, მეოთხეზე დარჩა და ცხრილში კსუ-სთან ჩამორჩენა 4 ქულამდე შეამცირა.

ილიაუნის წინააღმდეგ მატჩში, ნიუ ვიჟენ ჯორჯიანსის გამარჯვებას ირაკლი თოდუამ დაუდო სათავე და საბოლოო წერტილიც მან დაუსვა. პირველივე წუთზე, თოდუას სწრაფი გოლით  გახსნილ ანგარიშს, მე-7 წუთზე ნუკრი ჭუმბურიძე ულამაზესი გოლით შეაეშველა და ჯორჯიანსელები შესვენებაზე ორბურთიანი ფორით გავიდნენ. მეორე ტაიმი მშრალად დაიწყო, მაგრამ ბოლო 11 წუთში 5 გოლი გავიდა. 29-ე წუთზე დავით ხეჩიკაშვილმა ლამაზი კომბინაცია გოლით დააგვირგვინადა ჯორჯიანსელთა ფორა სოლიდური გახადა, 3:0. ილიაუნს ხელი არ ჩაუქნევია და სტუდენტები მატჩის გადარჩენას შეეცადნენ. 34-ე წუთზე ნიკა გვაზავამ ერთი ბურთი გაქვითა, 3:1. ავთანდილ ასათიანის ბიჭები არ მოდუნებულან, სტუდენტები მეკარე ბექა გოგსაძემ არაერთხელ იხსნა და თანაგუნდელებს მატჩის გადასარჩენად დიდი სტიმული მისცა. 37-ე წუთზე ლაშა კურტანიძემ სხვაობა მინიმუმამდე შეამცირა, 3:2. ამან ჯორჯიანსელები გაახელა და მატჩის ბოლოსწინა წუთზე ვახტანგ კეკელიამ მატჩის ბედი გადაწყვიტა, 4:2. ბოლოს თოდუამ კიდევ ერთი გაიტანა, ჯორჯიანსელებმა 5:2 მოიგეს და ცხრილს უკვე 4-ქულიანი ფორით ლიდერობენ.

ქუთაისთან მატჩში, არმიამ სტარტზევე გვარიანი ფორა მოიპოვა. მე-3 წუთზე თამაზ გოგსაძემ გახსნა ანგარიში, წუთში გიგა ბერაიამ სხვაობა გააორმაგა. მე-8 წუთზე დავით კოხრეიძემ არმიელთა უპირატესობა სამამდე გაზარდა. მე-17 წუთზე არმიელთა ფორა, შაკო ცირამუამ უფრო გაზარდა, 0:4. ტაიმის ბოლოს კი კოხრეიძემ კიდევ ერთი გაიტანა და არმია შესვენებაზე ხუთბურთიანი მშრალი ფორით გავიდა. მეორე ტაიმიც არმიის უპირატესობით დაიწყო. 23-ე წუთზე ოთარ ბერეჩიკიძემ სხვაობა სოლიდური გახადა, 0:6. კიდევ სამ წუთში ცირამუამ დუბლი მიითვალა და მატჩის ბედიც გადაწყვიტა, 0:7. იმერლებს მატჩის გადასარჩენად საკმაო დრო, 14 წუთი ჰქონდათ და ქამბექიც სცადეს. 29-ე წუთზე ბაკურ გულუამ ორი ბურთის გატანა შეძლო და ქუთათურებს ბრძოლის გაგრძელების სტიმული მისცა, 2:7. ორ წუთში ამირან ცხომარიას გოლით, არმიელებმა ფორის გაზრდა მაინც შეძლეს, 2:8. იმერლებს ქამბექისთვის არასრული 9 წუთი ჰქონდათ და მათ ბრძოლა გააგრძელეს. 36-ე წუთზე გულუამ კიდევ ერთის გატანით ჰეთ თრიკი შეასრულა. მატჩის ბოლოსწინა წუთზე კი ავთანდილ ჭიჭინაძემ ორი ბურთი მიითვალა, 5:8. არმიამ მოიგო, მეხუთეზე დარჩა და მეოთხე საფეხურზე მყოფ თსუ-ს მხოლოდ ქულით ჩამორჩება.

მიმდინარე სეზონის მეხუთე ტურში, ევროპის უნივერსიტეტი პსპ-ს უგებდა და ფარმაცევტებმა მხოლოდ ბოლო წუთებზე გატანილი გოლების წყალობით 6:5 მოიგეს. ამჯერად პსპ-მ ბევრად უკეთ ითამაშა. მე-9 წუთზე ლევან სვანიძემ გახსნა ანგარიში, 3 წუთში ნიკოლოზ კურტანიძემ სხვაობა გააორმაგა, 0:2. ევროპელებმა მეორე ტაიმი უკეთ დაიწყეს და 27-ე წუთზე ბადრი კალანდაძემ ანგარიშში სხვაობა მინიმუმამდე შეამცირა. თუმცა, ნახევარ წუთში სტუდენტთა მცველმა და მეკარემ ერთმანეთს ვერ გაუგეს და ავტოგოლით, პსპ-ს ორბურთიანი ფორა აღდგა, 1:3. წუთიც არ იყო გასული და მიხეილ თევზაძემ ეფექტური გოლით პსპ-ს ფორა გაზარდა, 1:4. კიდევ ნახევარ წუთში მელტონ ახალაიამ ფარმაცევტთა უპირატესობა სოლიდური გახადა, 1:5. უნივერსიტეტელებს 12 წუთი ჰქონდათ მატჩის გადასარჩენად, მაგრამ მათ ეს ვერ შეძლეს. 38-ე წუთზე გიორგი ზუნტუროვმა ევროპელთა კარის ბადე მექვსედ შეარხია, 1:6. ამას სტუდენტებმა მხოლოდ ერთი, ნიკოლოზ ბოლქვაძის გოლით უპასუხეს. პსპ-მ 2:6 მოიგო და კსუ-ს მარცხის ფონზე, მესამედან მეორე ადგილზე აინაცვლა.