ფუტსალის მთავარი ლიგის მე-13 ტური ზოგისთვის ნავსიანი გამოდგა, ზოგისთვის კი სარევანშო. თსუ-მ  პსპ-სთან მიმდინარე სეზონის მატჩში ნაჩვენები შედეგი (მოგება) ვერ გაიმეორა, ისევე როგორც ევროპის უნივერსიტეტმა ქუთაისთან. ილიაუნმა კსუ ამ სეზონის მე-6 ტურში ფრე გაახერხა, ამჯერად კი დამარცხდა... თუმცა, სჯობს ყველაფერს თანმიმდევრობით მივყვეთ.

წლის რიგით მეორე ტური ილიაუნისა და კსუ-ს სტუდენტური დერბით დაიწყო. ამ გუნდების წინა სეზონის დაპირისპირებიდან ორი კავკასიელებმა მოიგეს, ერთში კი ილიაუნმა იმარჯვა. მიმდინარე სეზონში ეს მეტოქეები ფრეზე გაიყარნენ და  აქედანაც ნათლად ჩანს, რომ ორივე გუნდი მოგებისთვის იბრძოლებდა. ასეც მოხდა, დაძაბული და საინტერესო მატჩი კავკასიელთა უპირატესობით დაიწყო, მაგრამ ილიაუნმა ხუთ წუთში თამაში გაათანაბრა. ორმხრივ შეტევებში ანგარიშის გახსნა ორივე გუნდს შეეძლო, მაგრამ პირველი გოლი მხოლოდ ტაიმის ბოლოს გავიდა. მე-16 წუთზე ლაშა სიგუნავამ პრესინგისას იმარჯვა, მეტოქის გადაცემა ჩაჭრა და კავკასიელები დაწინაურდნენ, 0:1. ამან ილიაუნელები გამოაცოცხლა, მაგრამ შესვენებამდე არაფერი შეცვლილა. მეორე ტაიმიც მშრალად დაიწყო. კსუ-მ ისევ პრესინგით იხეირა, 27-ე წუთზე ნიკა ხარატიშვილმა მეტოქის პასი ჩაჭრა, ლევან კობაიძემ კი სხვაობა გააორმაგა, 0:2. ილიაუნელებმა შეტევები გაამწვავეს და წუთნახევრიან მონაკვეთში წონასწორობის აღდგენაც მოახერხეს. 25-ე წუთზე რომან კუხიანიძის ჩაწოდებისას ლაშა კურტანიძემ ყველას დაასწრო და სხვაობა მინიმუმამდე შეამცირა, 1:2. მალევე კუხიანიძემ უკვე თავად გაიტანა, 2:2. დარჩენილი 4 წუთი ორმხრივი იერიშებში მიილია. ორივე გუნდმა მეკარიანად შეუტია. 37-ე წუთზე სიგუნავამ აუტიდან მოწოდებული ბურთი გოლად აქცია (2:3) და ბომბარდირთა დავას 14 გოლით სათავეში ჩაუდგა. ილიაუნმა მეტოქეზე ზეწოლა გააძლიერა, მაგრამ მათი იერიში კობაიძემ ჩაჭრა და ბოლო წუთზე ცარიელ კარში გაიტანა. 2:4. კსუ-მ იმარჯვა და მესამე ადგილზე დარჩა.

ჯორჯიანსელებს არმიასთან არც მიმდინარე და არც გასულ სეზონში მარცხი არ ჰქონიათ და ნიუ ვიჟენ ჯორჯიანსი ფავორიტად იყო მიჩნეული. ავთანდილ ასათიანის ბიჭებმა ეს სტატუსი სრულად გაამართლეს. უკვე მეორე წუთზე, შოთა თოფურიამ მეტოქის იერიში ჩაჭრა, ირაკლი თოდუამ კი მისი პასი გოლად აქცია, 0:1. შვიდ წუთში თოფურიას გამჭოლი გადაცემა, თოდუამ გოლით დააფასა და დუბლი მითვალა, 0:2. კიდევ 7 წუთში თოდუას პასით ვახტანგ კეკელიამ გაიტანა, 0:3. მეორე ტაიმიც ჯორჯიანსელთა კარნახით წარიმართა. 26-ე წუთზე კეკელიას პასი, დავით ხეჩიკაშვილმა გოლით დააფასა, 0:4. სამ წუთში გიორგი სილაგავას გადაცემით კახაბერ მაისაიამ სხვაობა სოლიდური გახადა, 0:5. წუთის შემდეგ არმიელებმა მოპოვებული პენალტით იხეირეს, ამირან ცხომარიამ პრესტიჟის გოლი გაიტანა, 1:5. დარჩენილ დროში ნიკოლოზ გაბრიჩიძემ დუბლი მიითვალა, ჯორჯიანსელებმა 1:7 იმარჯვეს, რითაც ცხრილში პირველობა და მდევართან 4 ქულიანი ფორა შეინარჩუნეს.

ლიგის დებიუტანტები, ქუთაისი და ევროპის უნივერსიტეტი მიმდინარე სეზონში მეორედ დაუპირისპირდნენ ერთმანეთს. თუკი მე-6 ტურში ევროპელებმა ქუთათურებს 6:4 სძლიეს, ამჯერად იმერლებმა მეტოქე დიდი ანგარიშით დაამარცხეს. ქუთაისმა სტუდენტებს თითო ტაიმში 5-5 გოლი გაუტანა. იმერელთაგან, კაპიტანმა ირაკლი გვეტაძემ და სერგეი პიჩუგინმა 3-3 ბურთი გაიტანეს. ნიკა ხარაიშვილმა, ლაშა გელოვანმა, გიორგი ბედენაშვილმა და ავთანდილ ჭიჭინაძემ თითო გოლი ავტორობა ითავეს. ევროპელთაგან ბადრი კალანდაძემ დუბლი მიითვალა, ერთი გოლი კი გიორგი ქურხულმა გაიტანა. ქუთათურებმა 10:3 იმარჯვეს, ევროპელების დარად 7 ქულა დააგროვეს და ცხრილში მათ ნაცვლად მე-7 ადგილი დაიკავეს.

ტურის ცენტრალურ მატჩად თსუ-სა და პსპ-ს დაპირისპირება იყო მიჩნეული. პსპ-ს ძლევა, მიმდინარე სეზონში თსუ-მ მოახერხა. გასულ სეზონში კი ამ გუნდების 3 დაპირისპირებიდან ორი ფარმაცევტებმა მოიგეს, ერთი კი სტუდენტებმა. ამ მეტოქეთა ჭიდილი ამჯერადაც მძიმე და დრამატული გამოდგა. მატჩის სტარტი და მომდევნო წუთები მშრალად წარიმართა. მე-7 წუთზე, თსუ-ს კაპიტან გიორგი ჩიმაკაძის ქუსლით დარტყმული მცირედით ასცდა მიზანს. მალევე ლაშა ერქომაიშვილის ძლიერი დარტყმისას ბურთი კარს გადასცდა. ამას პსპ-მ შტურმით უპასუხა. მიხეილ თევზაძისა და ლევან სვანიძის დარყმებს სტუდენტების მეკარე დავით კეფაშვილი გადაეფარა, მელტონ ახალაიას გასროლისას კი უძლური აღმოჩნდა და ანგარიშიც ასე გაიხსნა, 0:1. თსუ-მ მეტოქეზე ზეწოლა გააძლიერა, მაგრამ შესვენებამდე ანგარიში აღარ შეცვლილა, რაც ფარმაცევტების მეკარე ნიკოლოზ ფხაკაძის დამსახურებაა. მეორე ტაიმის სტარტზე ნიკოლოზ კურტანიძის იშვიათი პასით, ახალაიას მეორე ბურთის გატანა შეეძლო, მაგრამ ააცილა.  სტუდენტებმა თამაშს უმატეს და 25-ე წუთზე ჯანიკო გიორგაიას წაქცევისთვის დანიშნული პენალტით, სტუდენტების კაპიტანმა გიორგი ჩიმაკაძემ ანგარიში გაათანაბრა. ზუსტად წუთში ჩიმაკაძეს თსუ-ს დაწინაურება შეეძლო, მაგრამ პსპ-ს მეკარე ფხაკაძემ იმარჯვა. ნოდარ ქურცაძის დარტყმული ბურთიც ფხაკაძემ მოიგერია. სტუდენტებისგან განსხვავებით ფარმაცევტებმა თავისი შანსი გამოიყენეს. 29-ე წუთზე ნიკოლოზ კურტანიძემ სტუდენტთა გადაცემა ჩაჭრა, მისი პასი კი თევაძემ გოლად აქცია. დარჩენილ 11 წუთში გოლის გატანა ორივე გუნდს შეეძლო, მაგრამ ანგარიში აღარ შეცვლილა. პსპ-მ 1:2 იმარჯვა და ცხრილში მეორე ადგილი შეინარჩუნა, თსუ კი მეოთხეზე დარჩა.